9 قىركۇيەك, 16:54 352 0 الەۋمەت انار لەپەسوۆا

بورىشى كەشىرىلمەگەندەر قوسىمشا تىزىمگە قالاي ەنەدى؟

پرەزيدەنت قاسىم-جومارت توقاەۆتىڭ قيىن جاعدايعا تاپ بولعان ازاماتتاردىڭ نەسيەسىن كەشىرۋ تۋرالى جارلىعىنان كەيىن التى سانات بويىنشا 507 مىڭعا جۋىق بورىشكەردىڭ قارىزى كەشىرىلدى. الايدا كومەككە شىن مۇقتاج كەيبىر ازاماتتار ءوز ەسىمدەرىن بۇل تىزىمنەن تاپپاي دال. وقىرماندار ساۋالىنىڭ كوبەيۋى ءالى دە اقپاراتتاندىرۋ شارالارىن ارتتىرا ءتۇسۋ قاجەتتىگىن كورسەتىپ وتىر.

بىرىنشىدەن، جارلىقتا ايقىندالعان التى توپتىڭ بىرىنە كىرەسىز بە، كىرمەيسىز بە – سونى انىقتاپ الۋ كەرەك.  ولار – كوپ بالالى وتباسىلار; اسىراۋشىسىنان ايىرىلۋ جاعدايىنا بايلانىستى تولەم الاتىن وتباسىلار; مۇگەدەك بالالارى بار، 18 جاستان اسقان بالا جاسىنان مۇگەدەكتەر بار وتباسىلار; اتاۋلى مەملەكەتتىك əلەۋمەتتىك كومەك الاتىندار; جەتىم بالالار; اتا-اناسىنان كامەلەتتىك جاسقا دەيىن ايىرىلعان، 29 جاسقا تولماعان، اتا-انانىڭ قامقورلىعىنسىز قالعان بالالار.

ەكىنشىدەن، نەسيەڭىز كەپىلسىز بولۋى شارت.

ۇشىنشىدەن، بيىل 1 ماۋسىمعا دەيىنگى قايتارىلماعان بەرەشەگىڭىز 3 ملن تەڭگەدەن اسپاۋى ءتيىس.

تورتىنشىدەن، نەگىزگى بورىش پەن وعان ەسەپتەلگەن سىياقىسى 300 مىڭ تەڭگەدەن اسپاۋى قاجەت.

ەگەر وسى ءتورت تالاپتىڭ بارلىعىنا ساي كەلىپ، بىراق مەملەكەت بورىشىڭىزدى كەشىرمەسە، ءسىزدىڭ مارتەبەڭىز تۋرالى اقپارات ورتالىق مەملەكەتتىك ورگانداردىڭ اقپاراتتىق جۇيەلەرىندە جوق دەگەن ءسوز.

ەڭبەك جانە الەۋمەتتىك قورعاۋ مينيسترلىگى ءباسپاسوز قىزمەتىنىڭ حابارلاۋىنشا، جوعارىدا كورسەتىلگەن ساناتتاعى ازاماتتاردىڭ ءتىزىمى ورتالىق مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە جۇزەگە اسىرىلعان. اتاپ ايتقاندا، ءبىلىم جانە عىلىم مينيسترلىگى جەتىم بالالاردىڭ، اتا-اناسىنىڭ قامقورلىعىنسىز قالعان، كامەلەتكە تولعانعا دەيىن اتا-انالارىنان ايىرىلعان 29 جاسقا تولماعان بالالاردىڭ، 23 جاسقا دەيىنگى ستۋدەنتتەردىڭ ءتىزىمىن ۇسىنعان. ادىلەت مينيسترلىگى «ازاماتتىق حال اكتىلەرىنىڭ جازبالارى» اقپاراتتىق جۇيەسىندە ەرلى-زايىپتىلار نەمەسە اتا-انالار بويىنشا وزەكتى ازاماتتىق حال اكتىلەرى (نەكە جانە تۋ تۋرالى) بويىنشا مالىمەتتەردى تەكسەرۋدى جۇزەگە اسىرعان. وسىلايشا مينيسترلىك 2 ميلليوننان اسا ادامنىڭ ءتىزىمىن ۇلتتىق بانك پەن مەملەكەتتىك كرەديتتىك بيۋروعا بەرگەن. ۇلتتىق بانك كرەديتى جوق، جالپى قارىزى 3 ملن تەڭگەدەن اساتىن، بەرەشەكتەرى كوللەكتورلىق ۇيىمدارعا بەرىلگەندەردى تىزىمنەن الىپ تاستادى. ءسويتىپ 630 633 قارىزدار مەن ميكروكرەديتتەر بويىنشا بەرەشەكتى وتەيتىن 506 941 بورىشكەردىڭ ءتىزىمى جاسالعان.

ەگەر ءسىز جوعارىدا اتالعان بارلىق شارتتارعا ساي كەلەتىنىڭىزگە سەنىمدى بولساڭىز، الايدا قارىزى كەشىرىلگەن بورىشكەرلەر تىزىمىنەن ەسىمىڭىزدى تاپپاساڭىز، بانك بولىمشەلەرىنە نەمەسە حالىققا قىزمەت كورسەتۋ ورتالىقتارىنا سابىلۋدىڭ قاجەتى جوق. 111 call-ورتالىعىنا حابارلاسىپ وزىڭىزبەن قوسا وتباسى مۇشەلەرى تۋرالى اقپاراتتى بەرەسىز. بۇدان كەيىن مەملەكەتتىك ورگاندار ءسىز تۋرالى اقپاراتتى تەكسەرىپ، اتالعان التى ساناتتىڭ بىرىنە كىرەتىنىڭىز انىقتالسا تىزىمگە قوسادى. تىزىمگە ەنگەننەن كەيىن ۇلتتىق بانك شارتتارىنا سايكەستىگىڭىز تەكسەرىلىپ، ءتيىستى شەشىم شىعارىلادى.

 

 

سوڭعى جاڭالىقتار