9 قىركۇيەك, 10:49 218 0 ىشكى ساياسات دينارا مىڭجاسارقىزى

"بايتەرەك" زىمىران كەشەنى نازارباەۆ اتىمەن اتالدى

بايقوڭىردان ۇشاتىن زىمىران-عارىش كەمەسى نازارباەۆ اتىمەن اتالدى. رەسەي پرەزيدەنتى ۆلاديمير پۋتين 7 قىركۇيەكتە قازاقستاننىڭ ءبىرىنشى پرەزيدەنتى نۇرسۇلتان نازارباەۆپەن بىرگە ماسكەۋدەگى ۆدنح كورمەسىن ارالاپ، قازاقستان مەن رەسەي بىرلەسىپ سالىپ جاتقان "بايتەرەك" زىمىران كەشەنىن نازارباەۆ اتىمەن اتاۋدى ۇسىندى.

رەسەيلىك اقپارات قۇرالدارىنىڭ جازۋىنشا، اۋەلى پۋتين نازارباەۆتان كەشەننىڭ "بايتەرەك" دەپ اتالۋىنىڭ سەبەبىن سۇراعان. ال نازارباەۆ "بايتەرەك" ءسوزىنىڭ ءمانىن تۇسىندىرگەن.

"ەندەشە "نۇرسۇلتان" دەپ اتايىق. بۇل جوبانى ءسىز جاسادىڭىز عوي" دەگەن پۋتين. ال قازاقستاننىڭ بۇرىنعى پرەزيدەنتى "نۇرسۇلتان بولماي-اق قويسىن. باسقاشا اتاڭىزدار. "نازارباەۆ" دەپ اتاڭىزدار" دەپ جاۋاپ بەرگەن. پۋتين كەلىسكەن.

نۇرسۇلتان نازارباەۆ، قازاقستاننىڭ پرەمەر-ءمينيسترى اسقار ءمامين، ۆلاديمير پۋتين جانە رەسەيدىڭ پرەمەر-ءمينيسترى دميتري مەدۆەدەۆ سەنبى كۇنى ۆدنح كورمەسىندەگى "قازاقستان" دەپ اتالاتىن پاۆيلوندى ارالاپ كورگەن. وندا روسكوسموس جەتەكشىسى دميتري روگوزين، قازاقستاننىڭ تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى اسقار جۇماعاليەۆ بايقوڭىرداعى "بايتەرەك" جوباسىنىڭ دامۋ بارىسىن بايانداعان.

كوپ كەشىكپەي روسكوسموس رەسەيلىك كورپوراتسياسى بايقوڭىردان ۇشاتىن ورتاشا جانە جارتىلاي اۋىر كاتەگورياسىنداعى زىمىران-عارىش كەمەسى نازارباەۆ اتىمەن اتالاتىنىن حابارلادى.

"بايتەرەك" كەشەنىن سالۋ تۋرالى اڭگىمە 15 جىلدان بەرى ايتىلىپ كەلەدى، جوبانىڭ بيۋدجەتى بىرنەشە رەت ۇلعايتىلىپ، ونى اياقتاۋ مەرزىمى بىرنەشە رەت كەيىنگە شەگەرىلدى. 2004 جىلى استانا مەن ماسكەۋ عارىشقا ۋلى وتىنمەن ۇشاتىن "پروتون" زىمىراندارىنىڭ ورنىنا ەكولوگيالىق تازا عارىش اپپاراتىن دايىنداۋ جايلى ورتاق جوسپار جاريالاعان.

اۋەل باستا بۇل جوبا اياسىندا ۋكراينالىق "زەنيت" زىمىرانىن قولدانۋ جوسپارلاندى. بىراق 2014 جىلى ۋكراينا مەن رەسەي اراسىنداعى جاعداي ۋشىققاننان كەيىن "بايتەرەك" جوباسىمەن اينالىسقان ماماندار "زەنيت" جوباسىنان باس تارتتى.

سول كەزدە رەسەيلىك "انگارا" جوباسىن قولدانۋ تۋرالى شەشىم قابىلداندى. الايدا 2016 جىلى رەسەيلىك "سويۋز-5" جاڭا زىمىران-تاسىعىشىن پايدالانۋ بويىنشا كەلىسسوزدەر باستالدى. 2017 جىلى ماۋسىم ايىندا قازاقستاندىق-رەسەي كوميسسياسى بۇل شەشىمدى ماقۇلدادى. سول كەزدە قازاقستاننىڭ عارىش اپپاراتىن ازىرلەۋگە 300 ميلليوننان استام قاراجات سالۋى مۇمكىن ەكەنى ايتىلدى.

رەسەي بايقوڭىردى جالعا العانى ءۇشىن قازاقستانعا جىلىنا 115 ميلليون دوللار تولەيدى.

سوڭعى جاڭالىقتار