6 قىركۇيەك, 11:55 332 0 قاۋىپسىزدىك Túrkistan Gazeti

قازاقستاندا وندىرىستىك جاراقات سانى ازايدى

2019 جىلدىڭ 7 ايىندا وندىرىستە جاراقاتتانۋ وتكەن جىلدىڭ سايكەس كەزەڭىمەن سالىستىرعاندا 11% - عا تومەندەگەن. بۇل تۋرالى inbusiness.kz حابارلادى.

بۇل تۋرالى قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ەلوردانىڭ جەكەلەگەن كاسىپورىندارىنداعى ەڭبەك قاتىناستارىنىڭ پروبلەمالىق ماسەلەلەرىنە ارنالعان كەڭەس بارىسىندا مالىمدەدى.  «بيىلعى جىلعى 1 تامىزداعى جاعداي بويىنشا ەل كاسىپورىندارىندا 749 ادام زارداپ شەكتى، بۇل وتكەن جىلدىڭ سايكەس كەزەڭىنەن 11% تومەن (2018 جىلدىڭ 7 ايىندا – 842 ادام), ونىڭ ىشىندە ولىممەن اياقتالعان – 82 ادام، بۇل وتكەن جىلدىڭ سايكەس كەزەڭىنەن 28% تومەن (2018 جىلى – 114 ادام). الايدا نۇر-سۇلتان قالاسىندا وندىرىستىك جاراقات الۋ كورسەتكىشى ايتارلىقتاي ءوسىپ وتىر»، –  دەدى ب. نۇرىمبەتوۆ.

2019 جىلى قالا كاسىپورىندارىندا 34 قىزمەتكەر زارداپ شەكتى، بۇل وتكەن جىلدىڭ سايكەس كەزەڭىمەن سالىستىرعاندا 70%-عا ارتىق (2018 جىلدىڭ 8 ايىندا – 20 ادام), ونىڭ ىشىندە 7 ادام قازا بولدى (2018 جىلدىڭ 8 ايىندا – 5 ادام). «بۇل، ەڭ الدىمەن، 23 مامىردا «استانا سۋ ارناسى» مكك-دە ورىن العان، 4 ادام قايتىس بولىپ، 1 ادام قاتتى ۋلانعان توپتىق جازاتايىم وقيعاعا بايلانىستى. تەرگەۋ ناتيجەلەرى بويىنشا جازاتايىم وقيعانىڭ نەگىزگى سەبەبى كارىز ىشىندەگى اۋا تالداۋىنىڭ گازتالداعىشپەن جۇرگىزىلمەگەنى، قىزمەتكەرلەرگە گازقاعارلاردىڭ بەرىلمەگەنى، سونداي-اق، نارياد-رۇقساتناما بەرمەي جۇمىسقا جىبەرىلگەنى انىقتالدى.وسى سەبەپتەرگە سۇيەنە وتىرىپ، جۇمىس بەرۋشى لاۋازىمدى تۇلعالاردىڭ كىناسى 100% دالەلدەندى» – دەدى ول.

كەڭەستى قورىتىندىلاي كەلە، ءبىرجان نۇرىمبەتوۆ ەلوردا اكىمدىگىنە: 2019 – 2023 جىلدارعا ارنالعان ەڭبەك جانجالدارىن بولدىرماۋ جونىندەگى كەشەندى ءىس-شارالار جوسپارىنىڭ جانە وندىرىستىك جاراقاتتانۋدى تومەندەتۋ جونىندەگى جول كارتاسىنىڭ ورىندالۋىن قامتاماسىز ەتۋ جونىندە شارالار قابىلداۋدى; جالاقى، وندىرىستىك جاراقاتتانۋ، ەڭبەك جانجالدارى بويىنشا بەرەشەكتىڭ سەبەپتەرىنە تۇراقتى نەگىزدە تالداۋ جۇرگىزۋدى جانە ولاردى جويۋ جونىندە ۋاقتىلى شارالار قابىلداۋدى; جۇمىس بەرۋشىلەردىڭ ەڭبەكاقى بويىنشا بەرەشەكتەردى جويۋ جونىندە ناقتى جوسپارلار جاساۋدى; وندىرىستىك تاۋەكەلدىڭ جوعارى دەڭگەيى بار ءاربىر كاسىپورىندا قاۋىپسىز ەڭبەك جاعدايلارىن قامتاماسىز ەتۋ جونىندەگى ءىس-شارالار جوسپارىن بەكىتۋدى ۇسىندى.

سوڭعى جاڭالىقتار