23 تامىز, 15:00 401 0 جاڭالىقتار Túrkistan Gazeti

مەملەكەت باسشىسى «سارىارقا» ارنايى ەكونوميكالىق ايماعىنا جانە «ءالفارۋح» لوگيستيكالىق ورتالىعىنا باردى

قاراعاندى وبلىسىنا جۇمىس ساپارىمەن كەلگەن پرەزيدەنت قاسىم-جومارت توقاەۆ «سارىارقا» ارنايى ەكونوميكالىق ايماعىنداعى بىرقاتار نىساندى ارالاپ كوردى. بۇل تۋرالى اقوردانىڭ ءباسپاسوز قىزمەتى حابارلادى.

ءوڭىردىڭ يندۋستريالىق الەۋەتىمەن تانىسۋ «بيومەر ارماتۋرا» جاۋاپكەرشىلىگى شەكتەۋلى سەرىكتەستىگىنەن باستالدى. بۇل – نەمىس تەحنولوگياسى بويىنشا شارلى ىلمەكتى ارماتۋرا شىعاراتىن بۇكىل ورتالىق ازيادا تەڭدەسى جوق كاسىپورىن. اتالعان ءونىم ءتۇرى مۇناي-گاز سەكتورى مەن تۇرعىن ءۇي-كوممۋنالدىق شارۋاشىلىق سالاسىندا سۇرانىسقا يە.

مەملەكەت باسشىسى سودان كەيىن «Recycling Company» جاۋاپكەرشىلىگى شەكتەۋلى سەرىكتەستىگىنە قاراستى قازاقستانداعى ەسكى كولىك قۇرالدارىن وڭدەيتىن تۇڭعىش زاۋىتتا بولدى. جىلىنا 50 مىڭ اۆتوموبيلگە دەيىن قايتا وڭدەۋگە مۇمكىندىك بەرەتىن بالقىتۋ تسەحىنىڭ جۇمىسى مەن شرەدەرلىك قۇرىلعى پرەزيدەنتتىڭ ەرەكشە قىزىعۋشىلىعىن تۋعىزدى. ماشينالاردى جيناپ، وڭدەۋدىڭ كەشەندى ءادىسى ەلىمىزدىڭ اۆتوموبيل پاركىن جاڭارتۋعا، ەكولوگيالىق احۋالدى جاقسارتۋعا مۇمكىندىك بەرەدى.

«ءالفارۋح» كوتەرمە-ءبولۋ ورتالىعىندا قاسىم-جومارت توقاەۆ كروسس-دوك، كليماتتىق قويما مەن كوتەرمە-بولشەك ورتالىعىن ارالاپ كوردى. پرەزيدەنت اتالعان نىساننىڭ ترانزيتتىك-لوگيستيكالىق مۇمكىندىكتەرىن كەڭەيتۋدىڭ ماڭىزدىلىعىن جانە قاراعاندىنىڭ تاجىريبەسىن باسقا وڭىرلەرگە ەنگىزۋ قاجەتتىگىن اتاپ ءوتتى.

سونداي-اق، مۇندا قاراعاندىداعى تۇرعىن ءۇي قۇرىلىستارىنىڭ جۇرگىزىلۋ بارىسىنا ارنالعان تانىستىرىلىم ءراسىمى ءوتتى. مەملەكەت باسشىسىنا الداعى ۋاقىتتا وبلىس ورتالىعىنىڭ اجارىن اشا تۇسەتىن جاڭا ساۋلەت جوبالارى كورسەتىلدى. وبلىس اكىمى ەرلان قوشانوۆ قاراعاندىنىڭ جاڭا ورتالىعىندا بوي كوتەرەتىن تۇرعىن ۇيلەر، الەۋمەتتىك نىساندار مەن سپورت كەشەندەرى تۋرالى باياندادى.

سوڭعى جاڭالىقتار