20 تامىز, 21:00 398 0 ىشكى ساياسات Túrkistan Gazeti

ورتالىق ازيا ەلدەرىمەن ورتاق تاۋار وندىرۋشىلەر پۋلىن قۇرۋ ۇسىنىلدى

قازاقستان مەن ورتالىق ازيا ەلدەرى تاۋارلاردى تاراتۋ ورتالىقتارىنىڭ بىرىڭعاي پۋلىن قۇرا الادى. بۇل ۇسىنىستى قر ساۋدا جانە ينتەگراتسيا ءمينيسترى باقىت سۇلتانوۆ ايتتى، دەپ حابارلايدى قازاقپارات ءتىلشىسى.

«ماسەلەن، ءبىر عانا شيە قازاقستاننىڭ وڭتۇستىگىنەن نەمەسە وزگە ورتالىق ازيا ەلدەرىنەن جەتكىزىلەدى. شەكارادا بىرقاتار ماسەلە تۋىندايدى، وندا شامامەن 200 كولىك تۇرۋى مۇمكىن. ءجۇزىم سالىنعان توڭازىتقىش كولىكتى كەدەنشىلەر اشقاندا، وتتەگىدەن تاۋاردىڭ 20% بۇلىنەدى. ونىڭ ۇستىنە، ۇلكەن قالاعا كەلىپ، كوتەرمە ساتىپ الۋشى تاپقانشا تاۋاردىڭ تاعى ءبىر بولىگى جارامسىز بولادى. سوڭعى تۇتىنۋشىعا جەتكەنشە ءجۇزىم سولعىن تارتىپ قالادى. سوندىقتان، قازىر ورتالىق ازياداعى ارىپتەستەرىمىزبەن وندىرۋشىلەر پۋلىن قۇرۋ بويىنشا كەلىسسوزدەر جۇرگىزىپ جاتىرمىز. بۇل قازاقستاندىق وندىرۋشىلەر ءۇشىن دە، باسقالار ءۇشىن دە ءتيىمدى»، - دەدى باقىت سۇلتانوۆ ۇكىمەت ۇيىندە وتكەن ءباسپاسوز ءماسليحاتىندا. ونىڭ ايتۋىنشا، شەكاراداعى كەدەرگىلەردى جويۋعا كومەكتەسەتىن بىرىڭعاي ديستريتۋتسيا جۇيەسى قۇرىلادى. «بىرىڭعاي جۇيە ارقىلى باعالاردى تۇراقتى ۇستاپ، نارىققا ساپالى ازىق-تۇلىك جەتكىزۋگە ىقپال ەتە الامىز. وسىلايشا، باعانىڭ كۇرت وزگەرۋىن ازايتامىز»، - دەپ اتاپ ءوتتى مينيستر.

ايتا كەتەيىك، بۇگىنگى ۇكىمەت وتىرىسىندا پرەمەر-مينيستر اسقار مامين الەۋمەتتىك ماڭىزى بار تاۋارلاردىڭ قىمباتتاۋىن سىنعا الىپ، اكىمدەرگە تاپسىرمالار بەردى.

سوڭعى جاڭالىقتار