6 تامىز 2019, 15:40 621 0 كولىك دينارا مىڭجاسارقىزى

OCCRP: "استانا LRT" كومپانياسىنىڭ بۇرىنعى باسشىسىن ينتەرپول ىزدەۋدە

ۇيىمداسقان قىلمىس پەن جەمقورلىقتى زەرتتەۋ جونىندەگى جوبانىڭ (OCCRP) 5 تامىزدا حابارلاۋىنشا، "استانا LRT" كومپانياسىنىڭ بۇرىنعى باسشىسى تالعات ارداندى ينتەرپول ارقىلى ىزدەستىرىپ جاتىر.

اردان قازاقستاندا العاشقى جەڭىلرەلستى كولىك جۇيەسى (LRT) قۇرىلىسىن جۇرگىزگەن مۋنيتسيپالدى كولىك كومپانياسىن ءۇش جىل باسقارعان. ول بۇل قىزمەتتەن 2017 جىلى شىعارىلعان.

ءبىر جىلدان سوڭ پروكۋراتۋرا كومپانيانىڭ ەكس-مەنەدجەرىن تەكسەرگەن. بيىل قازاقستاننىڭ جەمقورلىققا قارسى كۇرەس قىزمەتى اردانعا قىلمىستىق ءىس قوزعاپ، كۇدىكتىنى قاماۋعا الۋ تۋرالى سوتقا ارىز ءتۇسىردى. سوت شەشىم شىعارعان. وتكەن اپتادا ينتەرپول ونى حالىقارالىق ىزدەۋدەگىلەردىڭ تىزىمىنە قوستى.

Astana Times باسىلىمىنىڭ 5 تامىزدا حابارلاۋىنشا، LRT قۇرىلىسى تەجەلگەن، استانا بيلىگى ونىڭ قۇرىلىسىنا بولىنگەن بيۋدجەت جوباسىن 350 ميلليون دوللارعا قىسقارتقان. دەگەنمەن قالا اكىمشىلىگى بىرنەشە اي بويى توقتاپ تۇرعان قۇرىلىستى قايتا جالعاستىرۋعا تىرىسىپ جاتىر.

قازاقستاننىڭ بۇرىنعى پرەزيدەنتى نۇرسۇلتان نازارباەۆ پەن ەلدىڭ قازىرگى باسشىسى قاسىم-جومارت توقاەۆ بۇل جوبانى سىناپ، ونىڭ باستاپقى قۇنى 1,8 ميلليارد دوللار بولعانىن، ونىمەن بايلانىستى ينۆەستيتسيالىق اۋىرتپالىقتى ايتقان.

2015 جىلى قازاقستان ۇكىمەتى 1,5 ميلليارد دوللاردى قىتايدىڭ دامۋ بانكىنەن LRT جوباسىن جۇزەگە اسىرۋ ءۇشىن قارىزعا العان. شامامەن 250 ميلليون دوللار "استانا بانكىندە" بۇعاتتالعان، ال قارجى مەكەمەسىنىڭ باسشىلارىن اقشا جىمقىردى دەپ ايىپتاعان. 2018 جىلى بانك جۇمىسى توقتادى.

نۇر-سۇلتان اكىمى التاي كۇلگىنوۆتىڭ حابارلاۋىنشا، ۇنەمدەۋ ماقساتىندا LRT باعىتىنداعى ايالداما سانى 18-دەن 11-گە قىسقاردى، ال كولىك سانى 19-دان 12-گە ازايدى. قارجى مينيسترلىگى قۇرىلىستى اياقتاپ، قىتايعا قارىزدى وتەۋ ءۇشىن وبليگاتسيالار شىعارۋدى ۇسىنعان.

سوڭعى جاڭالىقتار