5 شىلدە 2019, 12:01 704 0 ادەبيەت "تۇركىستان" گازەتىنىڭ اۆتورلارى

ەردەن قاجىبەك: ءمينيستردى شاتاستىرعان

ەردەن قاجىبەك، ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى:

– مادەنيەت جانە سپورت ءمينيسترىنىڭ سوزىنە كەلەر بولساق، وعان تەرمين ماسەلەسىن بايقاۋسىزدا ايتقىزىپ جىبەرگەن سياقتى. وعان وسىدان بەس-التى جىل بۇرىنعى مالىمەتتەردى بەرىپ، شاتاستىرعان. مينيستر سوعان بايلانىستى كەشىرىم سۇراپ، ءوزىنىڭ ءسوزىن ۇسىنىس رەتىندە ايتىلعانىن ءتۇسىندىردى. ەشكىم تابان استىندا تەرميندەردى اۋىستىرا سالمايدى. ول ماسەلەنى شەشەتىن ۇلكەن باستىقتار ەمەس. سەبەبى تەرميندەردىڭ جاسالۋى، ۇسىنىلۋى، قولدانىلۋى ەشقانداي بۇيرىقپەن، ساياسي شەشىممەن رەتتەلىپ نە بەكىتىلمەيدى. تەرميندەردى قولدانۋعا ۇسىنىس جاسايتىن عالىمدار بولسا، قولدايتىن، قولداناتىن حالىق. دۇنيەجۇزىندە سولاي.

قازىرگى كەزدە تەرميندەر ماسەلەسىندە جوعارىداعىداي شەشىمدەردىڭ شىعۋىنا عالىمدار كىنالى ەمەس، كەرىسىنشە، ونداي باستامالارعا قارسى. ءبىر جاعىنان، بۇل ماسەلەگە حالىقتىڭ ورە تۇرەگەلىپ، قارسىلىق بىلدىرگەنى دە دۇرىس بولدى. سەبەبى ءتىلدىڭ يەسى حالىق قوي!

جالپى، تەرمين ماسەلەسىندە بىزدە كسرو زامانىنان قالعان ادەت بار. مىسالى كومپيۋتەر، سكانەر، پرينتەر سوزدەرىن وزگەرتۋگە بولمايدى سولاي اتاۋ كەرەك دەگەن سەكىلدى. بۇل ورىس ءتىلىنىڭ ءپرينتسيپى عوي، ولار سول سوزدەردى اعىلشىنشادان وزگەرتپەي العان. ال اعىلشىن تىلىمەن تۋىستاس فرانتسۋز، نەمىس، يسپان، يتاليان تىلدەرىن قاراساڭىز، بىرەۋى دە كومپيۋتەر، سكانەر، پرينتەر سوزدەرىن ولاي اتامايدى. ءبىز دە سول ۇستانىمدا بولساق، نەسى ارتىق؟ ينتەرنەتتى «عالامتور»، گيمندى «ءانۇران» دەپ كەرەمەت اۋدارىپ الدىق ەمەس پە؟ تىلگە ءسىڭىپ كەتتى، جۇرت ەش توسىرقاماستان قابىلداپ، پايدالانىپ كەتتى. بۇل – تەرميندى قازاقىلاندىرۋدا عالىمدارىمىزدىڭ ەرەن ەڭبەگىن، ءساتتى ىزدەنىستەرىن كورسەتەدى. دەمەك، تەرميندەردى قازاقشالاۋ ءىسىن تەك قانا قولداۋ كەرەك. ول ءتىلدىڭ مىقتىلىعىن دا، ۇزدىكسىز دامىپ جاتقانىن دا كورسەتەدى. تەك ونىمەن ماماندار اينالىسسىن.

سوڭعى جاڭالىقتار