28 ماۋسىم 2019, 15:24 662 0 سىرتقى ساياسات دينارا مىڭجاسارقىزى

 وساكادا "ۇلكەن جيىرمالىق" ءسامميتى باستالدى

28 ماۋسىمدا جاپونيانىڭ وساكا قالاسىندا "ۇلكەن جيىرمالىق" - G20 ءسامميتى اشىلدى. شارا ەكى كۇنگە سوزىلادى.

وعان الەمدىك ەكونوميكاعا ىقپال ەتەتىن ءىرى مەملەكەتتەردىڭ ليدەرلەرى قاتىسادى. G20 توبىندا اقش، رەسەي، فرانتسيا، قىتاي، ءۇندىستان، گەرمانيا، جاپونيا جانە مەكسيكا سەكىلدى ەلدەر كىرەدى.

سامميت بارىسىندا اقش جانە رەسەي پرەزيدەنتتەرى دونالد ترامپ پەن ۆلاديمير پۋتين كەزدەسەدى دەپ كۇتىلەدى.

رەسەي پرەزيدەنتىنىڭ وكىلى تاراپتار ايماقتىق كيكىلجىڭ ماسەلەسىن تالقىلايدى دەگەن. اتاپ ايتقاندا ۋكراينا، سيريا، كورەي تۇبەگى، اۋعانستان جانە ۆەنەسۋەلاداعى جاعدايدى قاراماق. اق ۇيدە دونالد ترامپ تا ۆلاديمير پۋتينمەن كەزدەسۋدى جوسپارلاپ وتىرعانىن ايتقان.

بىلتىر بۋەنوس-ايرەستە وتكەن "ۇلكەن جيىرمالىق" سامميتىندە ترامپ پەن پۋتين كەزدەسپەدى. وعان رەسەي باسىپ العان قىرىم جاعالاۋىندا رەسەيلىك شەكاراشىلاردىڭ 24 ۋكراين تەڭىزشىسىن ۇستاپ الۋى سەبەپ بولدى. ۋكراينا تەڭىزشىلەرى ءالى تۇرمەدە وتىر.

ترامپ پەن پۋتين سوڭعى رەت 2018 جىلدىڭ شىلدە ايىندا حەلسينكيدە كەزدەستى. تاراپتار كەزدەسۋ جاقسى ءوتتى دەپ مالىمدەگەن. 2018 جىلدىڭ قاراشا ايىندا پاريجدە ءبىرىنشى دۇنيەجۇزىلىك سوعىستىڭ اياقتالۋىن ەسكە الۋ شاراسى كەزىندە قىسقا عانا سويلەسكەن.

سوڭعى جاڭالىقتار