27 ماۋسىم 2019, 14:12 971 0 ىشكى ساياسات Túrkistan Gazeti

ەل كۇتكەن ەرەن جارلىق

كۇنى كەشە پرەزيدەنت قاسىم-جومارت توقاەۆ الەۋمەتتىك جاعدايى تومەن قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ جونىندە جارلىققا قول قويدى.

وسىدان 15 كۇن بۇرىن ۇلىقتاۋ راسىمىندە قاسىم-جو­مارت كەمەلۇلى حالىقتىڭ الەۋمەتتىك تۇرمىس جاعدايى تومەندەپ كەتكەندىگىنە توقتالىپ، ءتيىستى شارالار قولداناتىنىن ايتقان-دى. ونىڭ ىشىندە بانكتەرگە بەرەشەگى ارتقان تۇرعىندار تاعدىرى دا نازاردان تىس قالماعان ەدى. ۇلىقتاۋ راسىمىندە «حالىقتى تولعاندىرىپ وتىرعان باستى ماسەلە – تابىس كولەمىنىڭ ازايۋى. حالىقارالىق قارجى نارىقتارىنىڭ تۇراقسىزدانۋى، تەڭگەنىڭ دەۆالۆاتسياسى حالىقتىڭ تابىسىنا كەرى اسەر ەتتى. ميلليوننان استام ازاماتتارىمىز بانكتەن نەسيە الۋعا ءماجبۇر بولدى. تابىسى جوعارى جانە تومەن ازاماتتاردىڭ اراسىنداعى الشاقتىق – ءبىزدىڭ قوعامدى مازالايتىن تاعى ءبىر وزەكتى ماسەلە. ارينە، مۇنداي قۇبىلىستار بۇكىل الەمدە بار، دەگەنمەن توقمەيىلسىپ وتىرا بەرۋگە بولمايدى. سوندىقتان، ءدال وسى وتكىر الەۋمەتتىك-ەكونوميكالىق جانە ساياسي ماسەلەنى شەشۋ ءۇشىن ورتامەرزىمدى كەشەندى شارالار قابىلداۋ قاجەت»، – دەگەن بولاتىن قاسىم-جومارت توقاەۆ.

پرەزيدەنتتىڭ سوڭعى قاۋلىسىندا الەۋمەتتىك كومەككە ايرىقشا ءزارۋ ازاماتتاردىڭ ەكىنشى دەڭگەيلى بانكتەر مەن ميكروقارجى ۇيىمدارىنان العان قارىزدارىنا جەڭىلدىك بولاتىنى ايتىلعان. ءوز كەزەگىندە كوپبالالى وتباسىلار، اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار، مۇگەدەك بالالارى بار، 18 جاستان اسقان، بالا جاسىنان مۇگەدەكتەر بار وتباسىلار، اتاۋلى مەملەكەتتىك الەۋمەتتىك كومەك الاتىندار، جەتىم بالالار، اتا-اناسىنان كامەلەتتىك جاسقا دەيىن ايرىلعان، جيىرما توعىز جاسقا تولماعان، اتا-انانىڭ قامقورلىعىنسىز قالعان بالالار بەرەشەگىنەن بوساتىلادى. بىراق قارىز بويىنشا جالپى بەرەشەگى 2019 جىلعى 1 ماۋسىمداعى جاعداي بويىنشا ءۇش ميلليون تەڭگەدەن اسپاۋ كەرەك. سونداي-اق، ءبىر قارىز الۋشىعا 2019 جىلعى 1 ماۋسىمداعى جاعداي بويىنشا نەگىزگى بورىشى ءۇش ءجۇز مىڭ تەڭگەدەن اسپاسا بىرجولعى تارتىپتە قارىزدار وتەلەتىن بولادى. قاسىم-جومارت توقاەۆتىڭ قاۋلىسىنا سايكەس قازاقستان رەسپۋبليكاسىنىڭ ۇكىمەتى مەن قازاقستان رەسپۋبليكاسىنىڭ ۇلتتىق بانكى بانكتەردە جانە ميكروقارجى ۇيىمدارىندا كەپىلسىز تۇتىنۋشىلىق قارىزدارى بار جوعارىدا ايتىلعان قازاق­ستان رەسپۋبليكاسى ازاماتتارىنىڭ 2019 جىل­عى 1 ءشىل­دەدەگى جاعداي بويىنشا ەسەپتەلگەن ايىپپۇلدارى مەن ءوسىمپۇلدارىن ەسەپتەن شىعارادى.

 

 

ومىرلىك قيىن جاعدايدا قالعان قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ جونىندە ۋاقتىلى كومەك كورسەتۋ ماقساتىندا قاۋلى ەتەمىن:

 

  1. قازاقستان رەسپۋبليكاسىنىڭ ۇكىمەتى ەكىنشى دەڭگەيدەگى بانكتەردەگى جانە ميكروقارجى ۇيىمدارىنداعى كەپىلسىز تۇتىنۋشىلىق قارىزدارى بويىنشا مىناداي جاعدايلاردا:

1) اتالعان قارىزدار بويىنشا بورىشكەرلەر كوپبالالى وتباسىلار، اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار، مۇگەدەك بالالارى بار، 18 جاستان اسقان، بالا جاسىنان مۇگەدەكتەر بار وتباسىلار،  اتاۋلى مەملەكەتتىك الەۋمەتتىك كومەك الاتىندار، جەتىم بالالار، اتا-اناسىنان  كامەلەتتىك جاسقا دەيىن ايرىلعان، جيىرما توعىز جاسقا تولماعان، اتا-انانىڭ قامقورلىعىنسىز قالعان بالالار;

2) قارىز بويىنشا  جالپى بەرەشەگى 2019 جىلعى 1 ماۋسىمداعى جاعداي بويىنشا 3 000 000 ء(ۇش ميلليون) تەڭگەدەن اسپايتىن بولسا;

3) ءبىر قارىز الۋشىعا 2019 جىلعى 1 ماۋسىمداعى جاعداي بويىنشا نەگىزگى بورىشى مەن وعان ەسەپتەلگەن سىياقىدان تۇراتىن وتەلەتىن بەرەشەگىنىڭ مولشەرى  300 000 ء(ۇش ءجۇز مىڭ) تەڭگەدەن اسپايتىن بولسا، ولاردى وتەۋ بويىنشا  بىرجولعى تارتىپتە شارالار قابىلداسىن.

  1. قازاقستان رەسپۋبليكاسىنىڭ ۇكىمەتى، قازاقستان رەسپۋبليكاسىنىڭ ۇلتتىق بانكى:

1) بانكتەردە جانە ميكروقارجى ۇيىمدارىندا كەپىلسىز تۇتىنۋشىلىق قارىزدارى     بار   قازاقستان   رەسپۋبليكاسى   ازاماتتارىنىڭ   2019   جىلعى 1 شىلدەدەگى جاعداي بويىنشا ەسەپتەلگەن  ايىپپۇلدارى مەن  ءوسىمپۇلدارىن ەسەپتەن شىعارۋ;

2) نۇر-سۇلتان، الماتى، شىمكەنت قالالارىنىڭ جانە وبلىستاردىڭ اكىمدەرىمەن بىرلەسىپ وسى جارلىقتى ىسكە اسىرۋ جونىندە وزگە دە شارالاردى قابىلداسىن.

  1. قازاقستان رەسپۋبليكاسىنىڭ ۇلتتىق بانكى وزىنە شەكتەن تىس تاۋەكەلدەردى العان قارجى ۇيىمدارىنىڭ جاۋاپكەرشىلىگىن كۇشەيتۋ بويىنشا:

1)  مەرزىمى وتكەن بەرەشەگى 90 كۇننەن اسىپ كەتكەن جەكە تۇلعالاردىڭ بارلىق كەپىلسىز تۇتىنۋشىلىق قارىزدارى بويىنشا كرەديتتى بەرۋمەن جانە وعان قىزمەت كورسەتۋمەن بايلانىستى  تۇراقسىزدىق ايىبىن، كوميسسيالار مەن وزگە دە تولەمدەردى ەسەپتەۋگە تىيىم سالۋدى;

2) تابىسى كۇنكورىس دەڭگەيىنەن تومەن ازاماتتارعا قارىزدار بەرۋگە تىيىم سالۋدى;

3) كەپىلسىز تۇتىنۋشىلىق قارىزداردى بەرۋ كەزىندەگى رەتتەۋدىڭ قوسىمشا شارالارىن كوزدەيتىن رەتتەۋشىلىك سيپاتتاعى قاتاڭ شارالار قابىلداسىن.

  1. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
  2. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ پرەزيدەنتى ق.توقاەۆ

 

جادىرا الدابەرگەنقىزى،  5 بالانىڭ اناسى:

64 مىڭ جالاقىنىڭ 59 مىڭىن نەسيەگە تولەيمىز

پرەزيدەنت قاسىم-جومارت توقاەۆتىڭ كەشەگى قاۋلىسىن ەستىپ شىنى كەرەك ەرەكشە قۋانىپ جاتىرمىز. العاش انا بولعاندا وسىلاي قۋانعان شىعارمىن. ءوزىم بەس بالانىڭ اناسىمىن. اللا تاعالا سىنادى، باسىمىزعا ءىس ءتۇسىپ قينالعاندا، كەرەك بولىپ اقشالاي نەسيە الدىق. وسى ۋاقىتقا دەيىن بالالاردىڭ اۋزىنان جىرىپ تولەپ جاتىرمىز. ەكى جىلدان بەرى قاتتى قينالعانىمىزدى قالاي جاسىرايىن. ءتىپتى جەۋگە ۇن دا الا الماي قالعان كۇندەر بولدى. دۇكەننىڭ بارىنە قارىز بولدىق. سوڭىندا باسىمىزداعى ءۇيدى دە كەپىلگە قويدىق. مەن ءۇي شارۋاسىمەن وتىرامىن، جۇبايىم جارتى ستاۆكامەن مەكتەپتە جۇمىس ىستەيدى. الاتىن جالاقىسى 64 مىڭ تەڭگە بولسا، ونىڭ 59 مىڭىن نەسيەگە تولەپ ءجۇرمىز. وتباسىمىزداعى وسىنداي قيىنشىلىق كەزەڭدە قولداۋ كورسەتكەلى جاتقان مەملەكەتىمىز بەن پرەزيدەنتىمىز قاسىم-جومارت كەمەلۇلىنا ەرەكشە العىس بىلدىرەمىن.

 

اتىركۇل يمانبەرديەۆا، پەدوگوگ، كوپبالالى انا:

نەسيەگە بەرەتىن اقشانى بالالارىمىزعا بەرەمىز

پرەزيدەنتىمىزدىڭ كەشە جاريالاعان قاۋلىسىنا ءدۇيىم جۇرت رازى بولىپ قالدى دەپ ويلايمىن. ونىڭ ىشىندە كوپبالالى انالار ەرەكشە قۋانعان شىعار. تابىس تابامىز دەگەنمەن دە شىعىننان قاشىپ، نە اينالىپ كەتە المايمىز. قاجەت بولعان كەزدە تۇرمىستىق قاجەتتىلىكتەرگە بايلانىستى مەملەكەتتەن ارنايى نەسيە دە الدىق. سول قارجى مەملەكەت باسشىسىنىڭ قاۋلىسىنا ساي كەشىرىلەدى دەگەندە شىنى كەرەك ابدىراپ قالعانىمىز راس. ويتكەنى بالالارىمىز بىرىنەن كەيىن ءبىرى ەرجەتىپ، بويجەتىپ ستۋدەنت اتانىپ جاتىر. بالانى وقىتىپ، كيىمىن كوك، تاماعىن توق ەتۋ اتا-انانىڭ پارىزى. سوندىقتان بەس بالا تاربيەلەپ وتىرعان انا رەتىندە جۇبايىم ەكەۋمىز بالالارىمىزدىڭ وقىپ، ۇلكەن ازامات بولىپ ەرجەتكەنىن قالايمىز. ەندىگى ازىناۋلاق قارجىمىزدى سول التىندارىمىزعا ءبولىپ بەرەمىز دەپ وتىرمىز.

ارمان قالمۇحانمەتۇلى

سوڭعى جاڭالىقتار