26 ءساۋىر 2019, 13:43 1275 0 ءوندىرىس Túrkistan Gazeti

جاڭا تەڭگە مونەتالارى اينالىمدا

26 ءساۋىر – «TÚRKISTAN» weekly. قر ۇلتتىق بانكى ديزاينى وزگەرتىلگەن نومينالدىق قۇنى 1, 2, 5, 10, 20, 50 جانە 100 تەڭگەلىك مونەتالاردى اينالىمعا شىعاردى.

مونەتالاردىڭ ديزاينىن قر پرەزيدەنتى قاسىم-جومارت توقاەۆ 20 ناۋرىزدا ماقۇلداعان.

«2018 جىلعى 29 ماۋسىمداعى №162-VI قرز «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» قر كونستيتۋتسيالىق زاڭىنا سايكەس قازاقستان رەسپۋبليكاسىنىڭ مەملەكەتتىك ەلتاڭباسىنا وزگەرىس ەنگىزىلدى. وعان سايكەس مەملەكەتتىك تىلدەگى «قازاقستان» دەگەن ءسوز لاتىن گرافيكاسىنىڭ نەگىزىندەگى ءالىپبي پايدالانىلا وتىرىپ «QAZAQSTAN» دەپ جازىلدى. «QAZAQSTAN» دەگەن جازۋى بار مەملەكەتتىك ەلتاڭبانى پايدالانۋ تۋرالى تالاپ 2018 جىلعى 1 قاراشادان باستاپ قولدانىسقا ەنگىزىلدى. قر مەملەكەتتىك ەلتاڭباسى تەڭگە مونەتالارى ديزاينىنىڭ مىندەتتى ەلەمەنتى بولىپ تابىلاتىندىقتان، ۇلتتىق بانك 2019 جىلعى ۇلگىدەگى ديزاينى وزگەرتىلگەن مونەتالاردى اينالىمعا شىعارۋ تۋرالى شەشىم قابىلدادى. ولارداعى جازۋلار لاتىن گرافيكاسىنىڭ نەگىزىندەگى ءالىپبي پايدالانىلا وتىرىپ مەملەكەتتىك تىلدە ورىندالعان»، – دەلىنگەن ۇلتتىق بانك تاراتقان مالىمەتتە.

اينالىمداعى مونەتالاردىڭ سىرت جاعىندا (رەۆەرسىندە) «QAZAQSTAN» دەگەن ءسوزى بار قر مەملەكەتتىك ەلتاڭباسى بەينەلەنگەن. سونداي-اق شىعارعان ەلدى بىلدىرەتىن «QAZAQSTAN RESPÝBLIKASY» دەگەن جازۋ بار.

مونەتالاردىڭ بەت جاعىندا (اۆەرسىندە) مونەتالار نومينالىنىڭ تسيفرلىق بەينەلەنۋى، سونداي-اق ۇلتتىق ۆاليۋتانىڭ «TEŃGE» دەگەن اتاۋى مەن شىعارعان بانك اتاۋىنىڭ قىسقارتىلعان بەلگىسى «QUB» (Qazaqstan Ulttyq Banki) بار ماتىندىك جازۋلار ورنالاسقان.

2019 جىلعى ۇلگىدەگى ديزاينى وزگەرتىلگەن نومينالدىق قۇنى 100 تەڭگەلىك مونەتانىڭ قىرىندا (گۋرتىندا) «JÚZ TEŃGE» دەگەن جازۋ بار. «تەحنيكالىق جانە زاتتاي ولشەمدەرى: ماسساسى، ديامەترى، قالىڭدىعى، مەتالل قۇيماسى وزگەرىسسىز ساقتالعان. تولەم تەرمينالدارىن جانە باسقا دا كاسسانى قوسىمشا قايتا تەڭشەۋ تالاپ ەتىلمەيدى. ەسكى جانە جاڭا ۇلگىدەگى مونەتالار زاڭدى تولەم قۇرالى بولىپ تابىلادى جانە بارلىق تولەم تۇرلەرى بويىنشا قابىلدانۋعا مىندەتتى!»، - دەپ اتاپ ءوتتى ۇلتتىق بانك وكىلدەرى.

سوڭعى جاڭالىقتار