4 ءساۋىر 2019, 13:44 1542 0 تەحنولوگيالار "تۇركىستان" گازەتىنىڭ اۆتورلارى

جولدىڭ جايىن جان-جاقتى ويلايتىن جىگىت

«قازاقستاندىقتار سالاتىن جاڭا ماگيسترالدى جولدار ءبىزدىڭ ەكونوميكامىز بەن قوعامىمىزدى جاڭارتادى. ولار ءبىزدىڭ ەلىمىزدىڭ بارلىق تۇكپىرىن ورتالىقپەن بەرىك بايلانىستىرادى. انىعى، جۇك تاسىمالى جەدەلدەيدى جانە ۇلعايادى. ەل ارقىلى ترانزيت كولەمى ارتادى. ءبىزدىڭ ازاماتتارىمىز زاماناۋي جانە ساپالى اۆتوماگيسترالدارمەن ءجۇرىپ، كەز كەلگەن وڭىرگە قاۋىپسىز جانە تەز جەتەتىن بولادى. الەۋمەتتىك ينفراقۇرىلىم جاقسارادى، جاڭا جانە زاماناۋي مەكتەپتەر مەن اۋرۋحانالار جوعارى ساپالى قىزمەتتەر كورسەتەدى»، – دەپ ەلباسىنىڭ اتاپ كورسەتكەنى بەكەر ەمەس. ويتكەنى ەل ەكونوميكاسىنىڭ دامۋى كولىك قاتىناسىنىڭ وركەندەۋىمەن تىعىز بايلانىستى ەكەنى ءسوزسىز. راسىندا دا جول ءترانزيتى ەل الەۋەتىن ارتتىرادى. سوندىقتان ەلىمىز ترانزيتتىك تاسىمالدان وراسان زور پايدا تاۋىپ وتىر. مۇنى جوققا شىعارا المايمىز. ءدال قازىرگى ۋاقىتتا ەلباسى تاپسىرماسىنا وراي، رەسپۋبليكامىزدىڭ تۇكپىر-تۇكپىرىندە ساپالى جول سالۋعا قاتىستى جۇمىستار قارقىندى جۇرگىزىلۋدە. ولاردىڭ باسى-قاسىندا وسى سالانى جەتىك بىلەتىن بىلىكتى باسشىلار، مىقتى ماماندار ءجۇر. سولاردىڭ ءبىرى – «قازاۆتوجول» ۇلتتىق كومپانياسى» اكتسيونەرلىك قوعامى شىعىس قازاقستان وبلىسى فيليالىنىڭ ديرەكتورى ايبەك امانبەكۇلى انۋاربەكوۆ.

– راسىندا «نۇرلى جول» مەملەكەتتىك باعدارلاماسى وسى سالانىڭ دامۋىنا مول سەرپىن بەردى. ويتكەنى ەلباسىنىڭ جەتكىلىكتى كوڭىل ءبولۋىنىڭ ارقاسىندا ترانزيتتىك الەۋەتىمىز ارتتى. جاڭادان جۇمىس ورىندارى اشىلدى. سەرۆيستىك قىزمەت ساپالى تۇردە جولعا قويىلدى. سوندىقتان ءبىزدىڭ باستى مىندەتىمىز – جولدىڭ دۇرىس، ساپالى سالىنۋىن قاداعالاۋ. سونىمەن قاتار، توزىعى جەتكەن جولداردى قايتا جوندەۋ. قازاقستان حالىقارالىق دالىزدە ورنالاسقاندىقتان جولدىڭ ساپالى بولۋىنا باستى نازار اۋدارامىز. بۇل رەتتە مەملەكەت وسى سالاعا ەلباسى تاپسىرماسىنا وراي وراسان زور قولداۋ كورسەتىپ جاتىر. بۇل وتە قاجەت، – دەيدى «قازاۆتوجول» ۇلتتىق كومپانياسى» اكتسيونەرلىك قوعامى شقو فيليالىنىڭ ديرەكتورى ايبەك امانبەكۇلى. راسىندا دا قازىرگى ۋاقىتتا شىعىس قازاقستانعا قارايتىن ايماقتا جول سالاسىندا قارقىندى جۇمىس جۇرگىزىلۋدە. «نۇرلى جول» باعدارلاماسىنىڭ اياسىندا رەسپۋبليكالىق ماڭىزى بار 6 ۋچاسكەدە، اتاپ ايتار بولساق، «ومبى-مايقاپشاعاي، تاسكەسكەن-باقتى، وسكەمەن-زىريانوۆسك-راحمان قاينارى» باعىتىندا جولدىڭ ۇستىڭگى قاباتىن جابۋ جۇمىستارى جولعا قويىلدى. بۇل باعىتتاعى جولداردى قايتا جوندەۋگە جەرگىلىكتى «گوردوستروي» جانە «زايسان» جول قۇرىلىس كومپانيالارى مەن باسقا دا فيرمالار اتسالىستى. قازىرگى ۋاقىتتا ومبى-مايقاپشاعاي ورتالىق-شىعىس ءدالىزىن قايتا جوندەۋ جۇمىستارى اياقتالۋعا جاقىن. سونداي-اق ايماقتاعى اپاتتى جاعدايداعى 5 كوپىرگە كۇردەلى جوندەۋ جۇمىستارىن جۇرگىزۋ ءۇشىن جوبالىق-سمەتالىق قۇجاتتارى بىتۋگە تاياۋ. مۇنى دا جەرگىلىكتى كاسىپورىندار اتقارۋدا. بۇل عانا ەمەس، جول سالاسىندا قايتا قارايتىن جۇمىستار دا جەتكىلىكتى. ءبىر عانا مىسال، ۇلكەندى-كىشىلى ماشينالار كوپ جۇرەتىن بولعاندىقتان، جول ويدىم-ويدىم شۇڭقىرعا اينالىپ كەتەدى. مۇنداي جەرلەردى ۋاقتىلى قاراپ، جوندەپ تۇرۋ كەرەك. سونداي-اق جول جيەگىندەگى ارنايى بەلگىلەردى ورناتۋ مەن ولاردىڭ جويىلىپ كەتپەۋىن قاداعالاۋ دا «قازاۆتوجول» قىزمەتكەرلەرىنىڭ ەنشىسىندە. سالىنعان كوپىرلەر، جول جيەگىندە قورشاۋلار، جولاستى سۋاعارلارىنىڭ بارلىعىن دا نازاردان تىس قالدىرۋعا بولمايدى. ولارعا دا باقىلاۋ كەرەك، توزعانىن جاڭارتىپ، قۇلاعانىن ورنىنا قويۋ قاجەت. مۇنىڭ بارلىعى دا ۇنەمى قاداعالاۋدى قاجەت ەتەدى. سوندىقتان «قازاۆتوجول» قىزمەتكەرلدەرىنىڭ جۇمىسى تەك قانا جول سالۋمەن شەكتەلەدى دەسەك، ول دۇرىس ەمەس. مۇنىڭ بارلىعى دا تياناقتىلىقتى قاجەت ەتەتىن كەشەندى جۇمىس. جىلدىڭ قاي مەزگىلىندە دە جول سالاسىنداعىلار ءۇشىن جۇمىس توقتاماق ەمەس. قار قالىڭ جاۋسا، قىسقى جولدى تازالاۋ، قار قۇرساۋىندا قالىپ قويعان كولىكتەردى اپاتتان قۇتقارۋ، وقىس جاعدايدا ولاردى دىتتەگەن جەرىنە جەتكىزۋ مۇنىڭ بارلىعىندا سالا قىزمەتكەرلەرىنىڭ جۇمىسى وراسان. سوندىقتان اسىرەسە قىس ايلارىندا ولاردىڭ جۇمىسى كوبەيەدى. قازىرگى ۋاقىتتا قىسقى جولداردى ساقتاۋعا جانە ونى قاداعالاۋعا قاتىستى شىعىس قازاقستان وبلىسىندا «قازاۆتوجولدىڭ» 12 بولىمشەسى جۇمىس ىستەيدى. اتالعان مەكەمەلەردىڭ بارلىعى دا ارنايى تەحنيكامەن قامتاماسىز ەتيىلگەن. ارنايى جابدىعى بار قار تازالاۋمەن اينالىساتىن 162 تەحنيكا بار. سونىمەن قاتار، جەرگىلىكتى باسقا دا كاسىپورىنداردان 26 تەحنيكا جالعا الىنعان. مۇنىڭ بارلىعى دا جولعا شىققان جۇرگىنشىلەردىڭ ءتيىستى جەرىنە جەتۋى ءۇشىن جاسالىنىپ وتىر. ارينە، جول – مۇراتى جەتۋ. بىراق جولدا ءارتۇرلى جاعدايلار بولىپ جاتادى. كۇن سۋىتادى، بۇرقاسىن بولادى. كوكتايعاق بولادى. سوندىقتان جۇرگىزۋشىلەر مەن جولاۋشىلار جولدا قالىپ كەتپەس ءۇشىن ارنايى ولارعا تىنىعۋ الاڭدارى جاسالىنىپ قويىلعان. – بيىلعى 2019 جىلدا العا قويىلعان ماقسات كوپ، جوسپار بار. باستى ماسەلە – جۇمىستى ساپالى جۇرگىزۋ. بۇل ورايدا ءبىزدىڭ ماماندار مىقتى، تاجىريبەلى ەكەنىن ماقتانىشپەن ايتا الامىز. تالاي سىننان وتكەن قىزمەتكەرلەر. ولار ءوز ءىسىن جەتىك بىلەدى. سوندىقتان ءبىزدىڭ جۇمىستا كىنارات بولمايدى، – دەيدى «قازاۆتوجول» ۇلتتىق كومپانياسى» اكتسيونەرلىك قوعامى شىعىس قازاقستان وبلىسى فيليالىنىڭ ديرەكتورى ايبەك امانبەكۇلى انۋاربەكوۆ.

ارينە، مۇنداي ىسكەر، تاجىريبەلى باسشى قاي جەرگە بولسا دا قاجەت. وسىنى ەسكەرگەن بولۋى كەرەك، «قازاۆتوجولدىڭ» باسشىلىعى ايبەك امانبەكۇلى انۋاربەكوۆتى جاقىندا باسقارماعا قىزمەتكە شاقىردى. بۇل ارينە ۇلكەن ابىروي. ول قازىر «قازاۆتوجول» ۇلتتىق كومپانياسى باسقارماسىنىڭ جول پايدالانۋ دەپارتامەنتىنىڭ ديرەكتورى بولىپ قىزمەت ىستەيدى. بۇل زور جاۋاپكەرشىلىك، باسشىلىق تاراپىنان ايبەككە ارتىلعان ۇلكەن سەنىم دەپ ويلايمىز. بۇرىن ايبەك امانبەكۇلى شىعىس ءوڭىردى، كەندى التاي ايماعىنىڭ جولدارىن باسقارسا، ەندى ول تىكەلەي رەسپۋبليكالىق جانە حالىقارالىق ماڭىزى بار جولدارعا باسشىلىق ەتەتىن بولادى.

ول جۋىردا شىعىس قازاقستان، اقمولا وبلىستارىنىڭ جول، كوپىر قۇرىلىستارىن كورىپ، ارالاپ قايتتى. ويتكەنى كۇن جىلىندى، كوكتەم كەلدى، قار ەرىپ، سۋ تاسيدى. سوندىقتان تاعى ءبىر باقىلاپ، قايتپاسا، بولمايدى. وسىعان بايلانىستى تاپسىرمالار بەردى.

شىعىس قازاقستان وبلىسىندا ءوز كولىگىمەن ءجۇرىپ، سالىنعان جولداردى كورىپ، ارالاپ، جۇمىستىڭ ساپاسىنا كوپ كوڭىل اۋداراتىن ايبەكتىڭ بۇل قىزمەتتە دە ابىروي بيىگىنەن كورىنەتىنىنە بەك سەنەمىز. ەلىمىزدىڭ تۇڭعىش پرەزيدەنتى، ۇلت كوشباسشىسى نۇرسۇلتان نازارباەۆ بيىل «جاستار جىلى» دەپ جاريالاعان تۇستا ايبەكتەي ىسكەر ازاماتتىڭ «قازاۆتوجول» باسقارماسىنا كەلۋى دە زاڭدى قۇبىلىس دەپ ويلايمىز. ويتكەنى، «جاس كەلسە – ىسكە» دەيدى حالىق دانالىعى. بۇل لاۋازىمدا دا ايبەك امانبەكۇلى ءوزىن ىسكەر باسشى رەتىندە دالەلدەپ، كورسەتە الادى. وعان ءبىزدىڭ سەنىمىمىز مول. ويتكەنى ول جولدىڭ جايىن جاقسى بىلەتىن جىگىت. ال مۇنداي ازاماتتاردىڭ جوعارى لاۋازىمعا كەلۋىنە تەك قانا قۋانا ءبىلۋىمىز كەرەك. ويتكەنى ايبەك امانبەكۇلى انۋاربەكوۆ بۇل قىزمەتتە دە ءوزىنىڭ زور الەۋەتىن كورسەتەدى دەپ ويلايمىز.

 

ميرا مىرزاعاليقىزى،

شىعىس قازاقستان وبلىسى

سوڭعى جاڭالىقتار