3 ءساۋىر 2019, 15:31 1152 0 دەنساۋلىق Túrkistan Gazeti

مەدبيكە مۇگەدەك جاساۋشى ما؟ نەمەسە ولاردىڭ بىلىكتىلىگى نەگە قاداعالانبايدى؟

جەلىدە  1 جاسار نۇريسلام تاسبولاتتىڭ كليزما جاساۋ كەزىندە كۇيىپ قالعانى جايلى اقپارات قىزۋ تالقىعا تۇسۋدە. ول شىمكەنتتەگى قالالىق جۇقپالى اۋرۋلار اۋرۋحاناسىنا 25 ناۋرىز كۇنى تۇسكەن.  

بالا قۇسىپ، قىزۋى كوتەرىلگەننەن كەيىن دارىگەرلەر جرۆي دياگنوزىن قويعان. بىرنەشە كۇن تامىردان ءدارى قابىلداعان. 28 ناۋرىزدا دارىگەر كليزما جاساۋ كەرەكتىگىن ايتقان. ويتكەنى بالا 3 كۇن بويى ۇلكەن دارەتكە بارماعان. ال مەيىرىمسىز مەدبيكە ءوز ىسىنە سالعىرت قاراپ ىستىق سۋمەن كليزما جاساعان. بۇل جايىندا اناسى اراينۇر قالقامان: "كليزما جاسالعانىنا 5 كۇن بولسا دا بالادا مازا جوق. جىلاپ جاتىر، دارەتكە وتىرعاندا قان تۇسەدى. دارىگەرلەر بارلىق جاعدايدى جاسايمىز، الاڭداما دەپ ايتتى. ارينە، ماعان بالامنىڭ تەز جازىلىپ كەتكەنى كەرەك. وسىعان قۇزىرلى ورىندار نازار اۋدارسا دەپ سۋرەتى مەن ۆيدەوسىن جەلىگە سالدىرتقانىم راس»، – دەدى باق وكىلدەرىنە بەرگەن سۇحباتىندا. ال اكەسى ەربولات سامەنوۆ: «قۇزىرلى مەكەمە قىزمەتكەرلەرى كەشىرىم سۇراپ جاتىر، بىراق ماعان بالامنىڭ دەنساۋلىعى كەرەك»، – دەيدى.

وقىس وقيعادان دەنساۋلىق ساقتاۋ ءمينيسترى ەلجان ءبىرتانوۆ تا قۇلاعدار بولعان. «بۇل تۋرالى ماعان بۇگىن تاڭعى 7-دە مالىمەت كەلىپ ءتۇستى. قازىر بۇل باعىتتا جۇمىس جاساپ جاتىرمىز. كىمنىڭ كىنالى ەكەنىن انىقتايتىن بولامىز. بۇل جايتقا قاتىستى تولىق مالىمەتتى كەشكە دەيىن بەرۋگە تىرىسامىز»، – دەدى مينيستر جۋرناليستەرگە بەرگەن سۇقباتىندا.

ەربولات سامەنوۆتىڭ تۋعان اعاسى بەكبولات قاراجان جانايقايىن الەۋمەتتىك جەلى ارقىلى جەتكىزدى. «ماعان بالانىڭ اكەسى، ءوزىمنىڭ تۋعان ءىنىم ەربولات كوڭىل كۇيى بۇزىلىپ قازىر حابارلاستى. كەشەگى شىمكەنتتەگى «جۇقپالى اۋرۋلار اۋرۋحاناسىنداعى» دارىگەرلەردىڭ نەمقۇرايلىلىعى مەن بىلىكسىزدىگىنەن بالاعا قايناعان سۋمەن كليزما جاساپ، رەانيماتسيادان شىعارىپ، تەرميالىق كۇيىككە شالدىققان بالاپانىمىزدىڭ جاعدايى تۋرالى تەلەارنادا اۋرۋحانانىڭ باس دارىگەرى امانگەلدى نۇرلىباەۆ اقپارات بەرگەن بولاتىن. ول ءوزىنىڭ ايتۋىنشا، بالانىڭ جاعدايى قالىپتى، قاناعاتتانارلىق دەپ توقتاپتى. كەشە مينيسترلىك تاراپىنان بالانى شىمكەنت قالاسىنداعى «ءنۇرسات» مولتەك اۋدانىنداعى ارنايى اۋرۋحاناعا اۋىستىرىپ ەدى. مەن قازىر بالانىڭ اناسىنا ءوزىم حابارلاسىپ جاعدايىن ءبىلدىم. بالا قان قۇسىپتى. ۇلكەن دارەتى دا قان ارالاس بولىپ شىققان. ۇلكەن دارەت كەزىندە بالا قاتتى قينالىپ، شىرقىراپ جىلايدى. كىشكەنتاي عانا نارەستە نە ايتىپ، قالاي جەتكىزەرىن بىلمەيدى. ەندى جاعداي وسىلاي بولا تۇرا اۋرۋحانانىڭ باس دارىگەرى بالانىڭ دەنساۋلىعى قاتىپتى، قاناعاتتانارلىق دەپ قالاي ايتىپ وتىر؟ مۇنى قالاي تۇسىنەمىز، امانگەلدى مىرزا؟ ءبىز TengriNews-قا ەشقانداي دا نارازىلىعىمىز جوق، ەشقانداي دا داۋىمىز جوق دەپ اقپارات بەرمەگەن ەدىك. ولاردىڭ ايتىپ وتىرعانى نە ماسقارا؟ مەن وسى اقپاراتتاردى وقىپ وتىرىپ، جاعامدى ۇستاپ وتىرمىن. بالانىڭ جاعدايى جاقسى، انا-اناسىنىڭ ەشقانداي دا داۋى مەن قارسىلىعى جوق دەپ ولار قانداي نەگىزبەن سويلەپ وتىر؟ الدە ءبىزدىڭ قۇلاعىمىز كەرەڭ، كوزىمىز كور مە؟ الدە ارنايى تاپسىرما الدى ما؟ مۇنداي ارانداتۋلارىن دوعارماسا، ولاردىڭ ۇستىنەن وسى اقپاراتتى تاراتقانى ءۇشىن جاۋاپقا تارتاتىنىمىزدى قاتاڭ ەسكەرتەمىز. بالانىڭ اتا-اناسى ەشقانداي دا سايتقا قارسىلىعىمىز جوق دەپ سۇحبات بەرگەن جوق. سىزدەر وسى حالىققا قىزمەت ەتىپ وتىرسىزدار ما؟ مىناۋ سايتتىڭ تاراتقان اقپاراتتارى قىلمىستىق ءىس جۇرگىزۋگە نەگىز بولاتىنان اتاپ وتەمىز. جاۋاپ بەرىڭىز وسى سۇراقتارعا، امانگەلدى مىرزا! جاندارىڭ اۋىرمايتىن قانداي دارىگەرسىڭدەر؟ بالانىڭ شىبىن جانى شىرقىراپ جاتقاندا، ونىڭ تاعدىرىمەن ويناعاندى دوعارماساڭدار، الداعى ۋاقىتتا باتىر ەكەندەرىڭدى كورەمىز... مەن بۇل جازبانى مينيستر ءبىرتانوۆتىڭ، مينيسترلىكتىڭ رەسمي سايتىنا تاعى دا جولدايمىن. بالانى بۇگىن الماتىداعى اۋرۋحاناعا جان جاقتى تەكسەرۋگە ۇشاقپەن الىپ بارادى. دەنساۋلىق ساقتاۋ مينيستر ەلجان ءبىرتانوۆ مىرزا بۇل جاعدايدى ءوز قۇزىرىنا الىپ، بارلىق شارالاردى جاساپ وتىرعانىن ايتىپ وتەمىز. مەن قازىر ەلورداداعى «نۇروتان» حدپ قوعامدىق قابىلداۋ كەڭەسى باسشىسىنىڭ ورىنباسارى ارىستانعالي سانسىزباەۆپەن حابارلاستىم. ارىستانعالي مىرزا بالانى الماتىدا نەمەسە ەلوردادا قالدىراتىنى جايىندا دارىگەر مامانداردىڭ ءوزى شەشىم قابىلدايتىنىن، ءوزى مينيسترلىك تاراپىنان بۇل جاعدايدى تاعى دا قاتاڭ قاداعالاۋعا الدىراتىنىن ايتتى. مەن بۇلاردىڭ مىناۋ سوراقى سوزدەرىنەن كەيىن شىمكەنتتەگى اۋرۋحانالارعا اسا سەنىمسىزدىك ءبىلدىرىپ، بالانى قايتكەندە دە نۇر-سۇلتان قالاسىنداعى «انا مەن بالانى وڭالتۋ» ورتالىعىنا الدىرىپ، دۇرىس قاراۋعا، ەم-دومىنا جاعداي جاساڭىزدار دەپ ءوتىنىش ءبىلدىردىم. سەبەبى، بالانىڭ شىمكەنتتەگى اۋرۋحانادا قايتا قالدىرىلاتىنىنا الاڭداپ وتىرمىز. سەنبەيمىز. بىزگە قازىرگى ۋاقىتتا بالانىڭ دەنساۋلىعىنىڭ جاقسارۋى عانا ۇلكەن ماسەلە بولىپ وتىر» دەيدى ب. قاراجان.

سوڭعى جاڭالىقتار