28 ناۋرىز 2019, 10:37 925 0 كولىك Túrkistan Gazeti

قىزىلوردا وبلىسىندا اپاتقا ۇشىراعان اسكەري تىكۇشاق ەكيپاجى قازا تاپتى

27 ناۋرىز، سارسەنبى كۇنى اقتاۋدان شىمكەنتكە ۇشىپ بارا جاتقان قازاقستان قارۋلى كۇشتەرىنىڭ تىكۇشاعى قىزىلوردا وبلىسىندا اپاتقا ۇشىراپ، ەكيپاجى تۇگەل قازا تاپقان. بۇل تۋرالى قازاقستاننىڭ ۋاقىتشا پرەزيدەنتى قاسىم-جومارت توقاەۆ Twitter الەۋمەتتىك جەلىسىندەگى پاراعىندا حابارلادى.

"تىكۇشاق ەكيپاجى قازا تاپتى. تەرگەۋ باستاۋ تۋرالى بۇيرىق بەردىم. قازا تاپقانداردىڭ ءۇي-ىشىنە كوڭىل ايتامىن. ولارعا ماتەريالدىق كومەك كورسەتىلەدى" دەپ جازدى توقاەۆ.

قورعانىس مينيسترلىگى اسكەري تىكۇشاق بورتىندا 13 ادام بولعان جانە قازا تاپقاندار بار دەپ حابارلادى. الايدا ناقتى قانشا ادامنىڭ مەرت بولعانى تۋرالى دەرەك بەرمەگەن.

رەسمي اقپاراتتا اسكەري جاتتىعۋعا قاتىسقان ءتورت تىكۇشاقتىڭ ەكەۋى قىزىلورداعا قونىپ، بىرەۋى اپات بولعان اۋماققا ورالعانى ايتىلعان. تىكۇشاقتار قاس قارايعان ءارى اۋا رايى قولايسىز ۋاقىتتا ارنايى اسكەري جاتتىعۋعا قاتىسقان دەپ مالىمدەدى مينيسترلىك.

قورعانىس ءمينيسترى نۇرلان ەرمەكباەۆتىڭ بۇيرىعىمەن قۇرىلعان ارنايى كوميسسيا تىكۇشاق اپاتقا ۇشىراعان قىزىلوردا وبلىسى جالاعاش اۋدانىنا اتتانعان.

اپاتقا مي-8 اسكەري تىكۇشاعى ۇشىراعان دەپ حابارلاندى. قازاقستان ىشكى ىستەر مينيسترلىگى توتەنشە جاعدايلار جونىندەگى كوميتەتىنىڭ وكىلى نۇرسۇلتان نۇرمۇحامەتوۆتىڭ ريا "نوۆوستي" اگەنتتىگىنە ايتۋىنشا، "قۇلاعان تىكۇشاق تۇگەلدەي جانىپ كەتكەن".

اقپارات كوزى: centralasian.org.

سوڭعى جاڭالىقتار