19 ءساۋىر 2018, 00:07 1820 0 ءوندىرىس انار لەپەسوۆا

سارىاعاشتا «سول يانگ» جايقالادى

سارىاعاشتا بيىل بوي كوتەرگەن قۇلپىناي جىلىجايى العاشقى ءونىمىن بەرە باستادى. ءبىر جارىم گەكتار القاپتى الىپ جاتقان كەشەن وڭتۇستىككورەيالىق تەحنولوگيامەن جابدىقتالعان.

جىلىجايدا نەگىزىنەن قۇلپىنايدىڭ كورەيالىق جانە يتاليالىق سۇرىپتارى وسىرىلەدى. العاش رەت كورەيالىق «سول يانگ»، يتالياندىق «البيون»، نەمىستىڭ «كارپي» جانە جەرگىلىكتى «ۆيكتوريا» سورتتارى ەگىلگەن. جەرگىلىكتى سورتتار جىلىنا ءبىر-اق رەت كوكتەم مەزىلىندە ءونىم بەرسە، شەتەلدىك تۇقىمدار قىستا دا پىسە بەرەدى. بۇگىندە جىلىجاي ونىمدەرى الماتى، تاراز، شىمكەنت قالالارىنا جونەلتىلۋدە.

كەشەندە كورەيالىق تەحنولوگيا قولدانىلعاندىقتان، سول ەلدەن ارنايى ماماندار دا شاقىرىلعان. «ءبىزدىڭ قۇلپىناي – قىستىق سۇرىپ. جەلتوقساننان باستاپ مامىر ايىنا دەيىن ءونىم الامىز. قىس ايلارىندا جاڭا كوكونىستەر وسپەيتىندىكتەن، ءبىزدىڭ ءتاتتى شىرىنعا سۇرانىس جوعارى. ونىڭ ۇستىنە كورەيالىق تەحنولوگيا دا وسى قىستىق سورتقا ارنالعان. ءبىز ونى ءوز ەلىمىزدە ءساتتى ىسكە اسىردىق. ەندىگى ارمانىمىز – بولاشاقتا سارىاعاشتى قۇلپىنايدىڭ وتانىنا اينالدىرۋ»، ‒ دەيدى كورەيالىق مامان كيم دجان شيك.

قۇلپىناي وزگە كوكونىستەر سياقتى جىلۋدى اسا قاجەت ەتپەيدى. نەبارى 5-6 گرادۋس جىلۋدا ءوسىپ شىعادى. ال قىستىڭ سۋىعىندا 10-15 گرادۋستىق جىلىلىق جەتكىلىكتى. سارىاعاش جىلىجايىندا جينالعان قۇلپىنايلاردىڭ ەڭ كىشىسى – 30-35 گرامم بولسا، ىرىلەرىنىڭ سالماعى 55-60 گرامعا دەيىن جەتەدى. قازىر جىلىجاي قىزمەتكەرلەرى ءبىر جارىم گەكتار القاپتان تاۋلىگىنە 350-400 كەلى ءونىم جيناۋدا. وڭىردەگى بىردەن-ءبىر قۇلپىناي وسىرەتىن جىلىجاي بولعاندىقتان، ونىمگە سۇرانىس تا جوعارى.

العاشقى جىل بولعاندىقتان جىلىجاي جۇمىسىندا ازداعان قاتەلىكتەر دە كەتىپتى. «باستاپقىدا جىلۋدىڭ ناقتى مولشەرىن بىلمەگەندىكتەن، ءونىم جوسپارلاعاننان ازداۋ بولعالى تۇر»، – دەيدى ماماندار. جىلىجاي قىزمەتكەرلەرى بيىل گەكتارىنا 20 توننادان قۇلپىناي جيناماق نيەتتە. ال كەلەسى جىلى ءونىم كولەمىن 40 تونناعا جەتكىزۋگە بەكىنگەن.

 

سوڭعى جاڭالىقتار