17 قازان 2016, 12:09 3627 0 سىرتقى ساياسات دينارا مىڭجاسارقىزى

قازاقستاندا 2018 جىلى دۇنيەجۇزىلىك تاۋ-كەن كونگرەسى وتەدى

2016 جىلدىڭ قازان ايىندا برازيليانىڭ ريو-دە-جانەيرو قالاسىندا 24-ءشى دۇنيەجۇزىلىك تاۋ-كەن كونگرەسى جانە XXIV World Mining Congress & Expo 2016 (WMC) تاۋ-كەن ونەركاسىبى ءۇشىن مامانداندىرىلعان تەحنولوگيالار مەن جابدىقتار كورمەسى وتەدى. اتالمىش شاراعا الەمنىڭ تۇپكىر-تۇپكىرىنەن 4500-دەن استام مامان قاتىسادى، دەپ حابارلايدى دۇنيەجۇزىلىك تاۋ-كەن كونگرەسىنىڭ ءباسپاسوز قىزمەتى.

ءىس-شارا اياسىندا 2018 جىلى استانادا دۇنيەجۇزىلىك تاۋ-كەن كونگرەسىن وتكىزۋ قۇقىعىنىڭ ەستافەتاسىن سالتاناتتى تۇردە قازاقستانعا تاپسىرۋ ءراسىمى بولادى. قازاقستان دەلەگاتسياسىنىڭ قۇرامىنا مەملەكەتتىك قۇرىلىم مەن ءىرى تاۋ-كەن مەتاللۋرگيالىق كەشەن كومپانيالارىنىڭ وكىلدەرى كىرەدى.

«2018 جىلى قازاقستاندا دۇنيەجۇزىلىك تاۋ-كەن كونگرەسىن وتكىزۋ ەلىمىزدىڭ تاۋ-كەن سالاسى بويىنشا ينۆەستيتسيالىق الەۋەتىن ايشىقتاۋعا، الەمدىك جانە باستاۋىش كومپانيالاردى تارتۋعا مۇمكىندىك بەرەدى. استانادا وسىعان دەيىن جەتى رەت تاۋ-كەن مەتاللۋرگيالىق كونگرەسىن وتكىزدىك. بىزدە ۇلكەن ماسشتابتا حالىقارالىق ءىس-شارا ۇيىمداستىرۋ تۇرعىسىنان مول تاجىريبە بار»، - دەدى قر ينۆەستيتسيالار جانە دامۋ ءمينيسترىنىڭ ءبىرىنشى ورىنباسارى - 2018 جىلى دتك ۇلتتىق ۇيىمداستىرۋ كوميتەتى توراعاسىنىڭ ورىنباسارى ا.راۋ.

قازاقستاندىق دەلەگاتسيا الەمدىك تاۋ-كەن ءوندىرۋ كومپانيالارىنىڭ، تاۋ-كەن ينستيتۋتتارى مەن ۋنيۆەرسيتەتتەرىنىڭ باسشىلارىمەن ەكىجاقتى كەزدەسۋلەر وتكىزەتىن بولادى. وندا عىلىمي سالاداعى ءوزارا ءىس-قيمىلدار مەن بىرلەسكەن جوبالاردىڭ جايى تالقىلانادى. سونىمەن قاتار، قازاقستاننىڭ تاۋ-كەن مەتاللۋرگيالىق الەۋەتىن تانىستىرىپ، 2018 جىلى دۇنيەجۇزىلىك تاۋ-كەن كونگرەسىن وتكىزۋ كەزەڭدەرىنە دايىندىق ماسەلەلەرىن تالقىلايتىن جابىق جيىن وتەدى.

قر يدم ءباسپاسوز قىزمەتىنەن حابارلاعانداي، بۇدان بولەك، قازاقستاندىق دەلەگاتسيانىڭ ريو-دە-جانەيروعا بارعانداعى ماقساتتارىنىڭ ءبىرى حالىقارالىق سەرىكتەستەرمەن ىنتىماقتاستىقتى كەڭەيتۋ جانە قازاقستانعا الەمدىك تاۋ-كەن بيزنەسى مەن عىلىمىن تارتۋ بولىپ تابىلادى.

ەسكە سالا كەتەيىك، 2013 جىلى مونرەالدا دۇنيەجۇزىلىك تاۋ-كەن كونگرەسىنىڭ 23-ءى وتىرىسى وتكەن بولاتىن (World Mining Congress 2013).  ول كەزدە قازاقستان رەسپۋبليكاسىنىڭ ءوتىنىشى رەتىندە كۇن تارتىبىندەگى ءبىر ماسەلە 2018 جىلى استانادا 25-ءشى دۇنيەجۇزىلىك تاۋ-كەن كونگرەسىن وتكىزۋ بولاتىن. كونگرەستى ۇيىمداستىرۋ كوميتەتىنىڭ مۇشەلەرى ءبىراۋىزدان قازاقستاننىڭ وتىنىشىنە قولداۋ ءبىلدىرىپ، داۋىس بەردى.

سوڭعى جاڭالىقتار