17 قازان 2016, 11:12 1337 0 سىرتقى ساياسات دينارا مىڭجاسارقىزى

قازاقستان مەن تاجىكستان ستراتەگيالىق ارىپتەستىگىن رەسمي تۇردە بەكىتتى

قازاقستان پارلامەنتىنىڭ جوعارعى پالاتاسى تاجىكستانمەن ستراتەگيالىق ارىپتەستىك تۋرالى كەلىسىمدى ماقۇلدادى. ەكى ەل اراسىندا جاسالعان قۇجاتقا وتكەن جىلى 14 قىركۇيەكتە نۇرسۇلتان نازارباەۆتىڭ دۋشانبەگە ساپارى بارىسىندا قول قويىلعان ەدى.

قازاقستان سەناتىنىڭ ءباسپاسوز قىزمەتى تاراتقان رەسمي اقپارات بويىنشا، قابىلدانعان قۇجاتتا تاراپتار ءبىر-بىرىنە قارسى كۇش قولدانباۋعا نەمەسە قوقان-لوقى كورسەتپەۋگە، ءۇشىنشى ءبىر ەلمەن ەكىنشى تاراپتىڭ تاۋەلسىزدىگى مەن اۋماقتىق تۇتاستىعىنا كەسىرى تيەتىن كەلىسىمگە وتىرماۋعا مىندەتتى ەكەنىن راستايدى.

قازاقستان سىرتقى ىستەر ءمينيسترىنىڭ ءبىرىنشى ورىنباسارى مۋحتار تىلەۋبەردىنىڭ سەناتتىڭ جالپى وتىرىسىندا ايتۋىنشا، ساياسي ديالوگتى جەتىلدىرۋ، ەكى جاقتى قارىم-قاتىناس ماسەلەلەرى مەن حالىقارالىق وزەكتى پروبلەمالار بويىنشا ۇستانىمدارىن كەلەسىپ وتىرۋ وسى قۇجاتتا قاراستىرىلعان.

"تاياۋ شىعىستاعى وقيعالار، اۋعانستانداعى جاعداي، سونداي-اق تەررورلىق ۇيىمداردىڭ كۇشەيۋىنە بايلانىستى، قازاقستان ورتالىق ازيادا، اسىرەسە اۋعانستانمەن شەكارالاس تاجىكستاندا تۇراقتىلىقتىڭ ساقتالۋىنا اسا مۇددەلى", - دەدى ول.

تاجىكستان پارلامەنتى بۇل قۇجاتتى بىلتىر جەلتوقسان ايىندا ماقۇلداعان بولاتىن.

سوڭعى جاڭالىقتار