17 قىركۇيەك, 20:37 473 0 دەنساۋلىق انار لەپەسوۆا

الماتىدا تەلەمەديتسينا ورتالىعى اشىلدى

بۇدان بىلاي الماتىلىقتار مەديتسينالىق كەڭەستى تەلەمەديتسينا كومەگىمەن الا الادى. بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ مالىمدەدى.

باسقارما باسشىسىنىڭ ايتۋىنشا، كوروناۆيرۋستىڭ ەكىنشى تولقىنىنا دايىندىق اياسىندا اشىلعان تەلەمەديتسينا ورتالىعىنىڭ مىندەتى – COVID-19 جۇقتىرۋى ىقتيمال جانە ىندەتكە شالدىققانى راستالعان ناۋقاستارعا كەڭەس بەرۋ جانە مونيتورينگ جۇرگىزۋ.

«بۇل COVID-19 ۆيرۋسىن ەمدەۋ بويىنشا بىرەگەي قىزمەت بولىپ وتىر. ول ءۇشىن مەديتسينالىق اقپاراتتىق جۇيەلەرمەن ينتەگراتسيالاناتىن باعدارلاما ازىرلەنۋدە. تەلەمەديتسينا ورتالىعىنىڭ دارىگەرى بەينەكەڭەس جۇرگىزەدى، ناۋقاستىڭ جاعدايىن باعالايدى، ەم تاعايىنداپ، ناۋقاستىڭ ەلەكتروندىق كارتاسىنا وزگەرىستەر ەنگىزىپ وتىرادى. بۇل سونىمەن قاتار بارلىق COVID-19 جاعدايلارىنىڭ بىرىڭعاي ەلەكتروندىق بازاسى بولادى»، - دەيدى ك.نادىروۆ.

جاڭا ورتالىقتىڭ تاعى ءبىر ماڭىزدى قىزمەتى – ناۋقاستاردىڭ كارانتين رەجيمىن ساقتاۋىن باقىلاۋ. ورتالىق قىزمەتكەرلەرى امبۋلاتوريالىق دەڭگەيدە ەم الىپ جاتقان ناۋقاستارعا بەينەقوڭىراۋ شالىپ تۇرادى. ءۇي رەجيمىنىڭ بۇزىلۋى انىقتالعان جاعدايدا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ اۋماقتىق دەپارتامەنتىنە ءتيىستى سيگنال بەرىلەدى، ودان ءارى قالالىق باس مەملەكەتتىك سانيتار دارىگەرىنىڭ قاۋلىسىنا ساي ءتارتىپ بۇزۋشىعا ايىپپۇل جازىلادى. ءتارتىپتى ورەسكەل بۇزۋشىلار قالا ەمحانالارىنىڭ بىرىنە ءماجبۇرلى تۇردە جاتقىزىلادى.

ايتا كەتەيىك، پاندەميا باستالعالى الماتىدا 14 329 ادامنان كوروناۆيرۋس انىقتالدى. ىندەت جۇقتىرعانداردىڭ 14 مىڭعا جۋىعى ەمدەلىپ شىقتى، دەرتى اسقىنعان 270 ناۋقاس قايتىس بولدى.

ال رەسپۋبليكا بويىنشا ىندەتكە شالدىققاندار سانى 107 مىڭنان استى. قاتەرلى ۆيرۋستان 1671 وتانداسىمىز كوز جۇمدى.

ىندەتتى اۋىزدىقتاۋ ءۇشىن الەمنىڭ تۇكپىر-تۇكپىرىندە ۆيرۋسقا قارسى ۆاكتسينالار ازىرلەنىپ جاتىر. سونىڭ ءبىرى – قر بعم عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىندا ازىرلەنگەن QazCovid-in ەكپەسى. مينيسترلىك ۆاكتسينانىڭ كلينيكالىق سىناعى باستالعانىن حابارلادى.

ۆاكتسينانىڭ قاۋىپسىزدىگىن انىقتاۋعا باعىتتالعان زەرتتەۋدىڭ I فازاسىنا كوروناۆيرۋسپەن اۋىرماعان جانە انتيدەنەلەرى جوق 44 ەرىكتى قاتىسادى. يممۋنوگەندىلىكتى زەرتتەۋگە باعىتتالعان ەكىنشى فازادا 200 ەرىكتىنى قاتىستىرۋ جوسپارلانعان.

سوڭعى جاڭالىقتار