6 تامىز, 13:33 21889 0 ايماق انار لەپەسوۆا

قازاقستاننىڭ ءۇش وبلىسىندا كارانتين جەڭىلدەتىلدى

سۋرەت ينتەرنەتتەن الىندى
سۋرەت ينتەرنەتتەن الىندى

كوروناۆيرۋس جۇقتىرۋ دەرەكتەرىنىڭ ازايۋىنا بايلانىستى ەلىمىزدىڭ بىرقاتار وڭىرىندە كارانتين جەڭىلدەتىلدى. 

اتاپ ايتقاندا، الماتى وبلىسىندا قۇرىلىس ماتەريالدارى مەن كولىكتىڭ قوسالقى بولشەكتەرىن ساتاتىن بازارلاردى اشۋعا رۇقسات بەرىلدى. الايدا عيماراتتىڭ ىشىندە ورنالاسقان بازارلار ازىرشە اشىلمايدى.

قاراعاندى وبلىسىندا جابىق مۇز ايدىنى بار سپورت كەشەندەرىندە جاتتىعۋلاردى وتكىزۋگە بولادى. سپورتشىلار حوككەي، مانەرلەر سىرعاناۋ جانە تاعى باسقا سپورت تۇرلەرى بويىنشا جاتتىعا الادى.

ال اقمولا وبلىسىندا تۋريستىك نىسانداردىڭ ايماعىندا ورنالاسقان جاعاجايلاردا سۋعا تۇسۋگە سالىنعان تىيىمنىڭ كۇشى جويىلدى.  دەسە دە، سانيتارلىق نورمالار قاتاڭ ساقتالۋى قاداعالانادى. جاعاجايدىڭ جالپى اۋدانىن ادام سانىنا بولگەندە، ءاربىر دەمالۋشىعا 4 شارشى مەتردەن كەم بولماۋى ءتيىس.

كۋرورتتىق ايماققا تەك جولداماسى بارلار عانا كىرە الادى. جاعاجايعا كىرەردىڭ الدىندا دەنە قىزۋىن تەكسەرىلەدى. دەمالىس ورىندارىنىڭ يەلەرى شەزلونگتار مەن ورىندىقتاردىڭ ءبىر-بىرىنەن الشاق قويىلۋىن، زالالسىزداندىرۋ جۇمىستارىنىڭ ۇدايى جۇرگىزىلۋىن قاداعالاۋى ءتيىس.

ەسكە سالا كەتەيىك، 3 تامىزدان باستاپ ەلوردادا قوعامدىق كولىك قوزعالىسى قايتا جاندانعانىن حابارلاعانبىز.

قوعامدىق كولىكتەرگە ماسكاسىز كىرۋگە تىيىم سالىنادى. كولىكتىك باقىلاۋ ءبولىمىنىڭ قىزمەتكەرلەرى كۇن سايىن رەيدتەر جۇرگىزىپ، جۇرگىزۋشىلەر دە، جولاۋشىلار دا ماسكا رەجيمىن ساقتايتىن بولادى. جۇرگىزۋشىلەرگە جولاۋشىلاردى سالونعا ماسكاسىز كىرگىزۋگە قاتاڭ تىيىم سالىنادى. اۆتوبۋستان تەك الدىڭعى ەسىكتەن شىعادى. جول ءجۇرۋ اقىسى بانكتىك اۋدارىم ارقىلى جاسالادى.

 

سوڭعى جاڭالىقتار