5 تامىز, 13:28 596 0 جاھان انار لەپەسوۆا

بەيرۋتتاعى جارىلىس قۇرباندارىنىڭ سانى 100-دەن استى

بەيرۋت پورتىنداعى جارىلىستان كوز جۇمعاندار سانى 100-دەن استى. بۇل تۋرالى ليۆان قىزىل كرەس قوعامىنا سىلتەمە جاساپ Sky News Arabia تەلەارناسى حابارلادى.

اپات ورنىندا ىزدەۋ-قۇتقارۋ جۇمىستارى جالعاسۋدا. مامانداردىڭ ايتۋىنشا، جارىلىستان زارداپ شەككەن عيماراتتار قيراندىسىن ارشىعان سايىن قۇربانداردىڭ سانى ارتا ءتۇسۋى مۇمكىن.

ەسكە سالا كەتەيىك، بۇعان دەيىن ليۆان بيلىگى جارىلىس سەبەبىن ايتقان بولاتىن. بيلىك مالىمدەمەسىنە سايكەس، امموني نيتراتىنىڭ ۇلكەن پارتياسى (اممياك سەليتراسى دەپ تە اتالايدى) پورتتا ۇزاق ۋاقىت قاۋىپسىزدىك شارالارىنسىز ساقتالعاننان كەيىن جارىلعان.

ليۆانداعى جارىلىس سالدارىنان قازاقستاننىڭ ديپلوماتيالىق ميسسياسى عيماراتىنا زيان كەلگەنىن حابارلاعانبىز.

ءسىم حابارلاماسىنا سۇيەنسەك، جارىلىس كەزىندە ديپلوماتيالىق ميسسيانىڭ قىزمەتكەرلەرى جۇمىس كۇنى اياقتالعاننان كەيىن جۇمىس ورنىنان كەتىپ قالعان. جۇمىستا قالعان كونسۋل جارىلىس تولقىنى سالدارىنان جەڭىل جاراقات الدى.

اپات تۋرالى اقپاراتتى العاننان كەيىن پرەزيدەنت قاسىم-جومارت توقاەۆ سىرتقى ىستەر مينيسترلىگىنە ليۆانداعى قازاقستاندىق ازاماتتاردىڭ قاۋىپسىزدىگىن قامتاماسىز ەتۋدى تاپسىردى.

سوڭعى جاڭالىقتار