5 تامىز, 14:25 484 0 جاڭالىقتار اسىل تۇمار

جانۋارلارعا جاۋاپكەرشىلىكپەن قاراۋ تۋرالى بىردە-ءبىر زاڭ جوق – مينيستر

سۋرەت عالامتوردان الىندى
سۋرەت عالامتوردان الىندى

ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ جانۋارلاردى قورعاۋداعى ازاماتتىق باستامالاردى قارجىلاندىرۋ يدەياسىن ىلگەرىلەتۋ شارالارى قابىلداناتىنىن ايتتى. 

«بۇگىن ءبىز پارلامەنت ءماجىلىسىنىڭ ءبىر توپ دەپۋتاتتارى ازىرلەگەن ءۇي جانۋارلارىن قورعاۋ تۋرالى زاڭ جوباسىن قوعاممەن تالقىلاۋعا جينالىپ وتىرمىز. قازاقستاندا جانۋارلاردى قورعاۋ تۋرالى جاڭا زاڭ جوباسىنىڭ قاجەتتىلىگى الدەقاشان جەتىلگەن. قازىرگى ۋاقىتتا بارلىق جانۋارعا، ونىڭ ىشىندە، ءۇي، جابايى جانە اۋىل شارۋاشىلىعى جانۋارلارىنا جاۋاپكەرشىلىكپەن قاراۋ تۋرالى بىردە-ءبىر زاڭ جوق. جانۋارلارعا قاتىگەزدىك كورسەتكەن ادامدار تۋرالى حابارلامالار الەۋمەتتىك جەلىلەردە ءجيى كەزدەسىپ جاتىر. الايدا، بۇگىندە قازاقستانداعى جانۋارلارعا قاتىگەزدىك كورسەتكەنى ءۇشىن تاعايىندالاتىن جازا تىم جەڭىل. سوندىقتان، مەملەكەت باسشىسى قاسىم-جومارت كەمەلۇلىنىڭ تاپسىرماسى بويىنشا، ءبىرىنشى كەزەكتە، جانۋارلاردى حايۋاناتتار باعىندا ۇستاۋعا قويىلاتىن تالاپتاردى قاتاڭداتۋدى العا قويىپ وتىرمىز. سونداي-اق، جانۋارلاردى قورعاۋداعى ازاماتتىق باستامالاردى قارجىلاندىرۋ، زوولوگيالىق ۆولونتەرلىكتى قولداۋ مەن وقۋشىلار، ستۋدەنتتەر اراسىندا دا جانۋارلارعا جاۋاپكەرشىلىكپەن قاراۋ يدەياسىن ىلگەرىلەتۋ شارالارىن قابىلداۋ جوسپاردا بار»، – دەدى مينيستر ونلاين رەجيمدە ءوتىپ جاتقان تالقىلاۋدا.

وسى ورايدا ول سوڭعى كەزدەرى جانۋارلارعا قاتىگەزدىكپەن قاراۋ فاكتىلەرى قوعامدا كەڭىنەن تالقىلانعانىن ەسكە سالدى.

«شىن مانىندە پروبلەما وتە كۇردەلى. زەرتتەۋلەرگە قاراعاندا، جانۋارلارعا قاتىستى جاسالعان قاتىگەزدىك سالدارى كەيىننەن ادامدارعا دا قاتىگەزدىكپەن قاراۋ سەكىلدى قايعىلى جاعدايلارعا الىپ كەلەدى. ياعني قوعامدا پسيحيكاسى بۇزىلعان ادامداردىڭ پايدا بولۋىنا ىقپال ەتۋى مۇمكىن. وسى ورايدا قوعامدا ونەگەلىلىك قاعيدالارىن، بارلىق جانۋارلارعا جاۋاپكەرشىلىكپەن قاراۋ نورمالارىن كەڭىنەن ناسيحاتتاۋ كەرەك»، – دەدى م. مىرزاعاليەۆ.

ونىڭ سوزىنە قاراعاندا، وسى پروتسەسكە قوعامدى كوپتەپ تارتۋ كەرەك.

«وسى سالادا ءتۇرلى جاعىمسىز كورىنىستەرگە ناقتى زاڭنامالىق توسقاۋىل قويۋىمىز كەرەك جانە زاڭدى بۇزعاندارعا ءتيىستى جازاسىن بەرۋ قاجەت. وزدەرىڭىز بىلەسىزدەر، وسى سيپاتتاعى قىلمىستار ءۇشىن جازا وتە جەڭىل. سوندىقتان ونى قاتاڭداتقان دۇرىس. وسى ماسەلەنى ەسكەرە وتىرىپ، زاڭ جوباسىن جان-جاقتى پىسىقتاۋ ءۇشىن بۇگىنگى تالقىلاۋدى ۇيىمداستىردىق. وسى ورايدا زاڭ جوباسىنىڭ نورمالارىن تالقىلاۋ مەن قالىپتاستىرۋعا بەلسەندى قاتىسۋعا شاقىرامىز»، – دەدى ۆەدومستۆو باسشىسى.

سوڭعى جاڭالىقتار