5 تامىز, 09:16 11275 0 جاڭالىقتار اسىل تۇمار

بەيرۋتتاعى جارىلىس نەدەن بولعانى انىقتالدى

سۋرەت عالامتوردان الىندى
سۋرەت عالامتوردان الىندى

ليۆان استاناسى بەيرۋت پورتتا بولعان ەكى جارىلىس سالدارىنان 78 ادام قازا تاۋىپ، 4 مىڭنان استام ادام جاراقات العان، قالانىڭ بىرنەشە اۋدانى تولىقتاي قيراعان. بيلىك مالىمدەمەسىنە سايكەس، امموني نيتراتىنىڭ ۇلكەن پارتياسى (اممياك سەليتراسى دەپ تە اتالايدى) پورتتا ۇزاق ۋاقىت قاۋىپسىزدىك شارالارىنسىز ساقتالعاننان كەيىن جارىلعان، – دەپ جازدى قازاقپارات ۆۆس-گە سىلتەمە جاساپ.

جارىلىستىڭ كوپتەگەن كۋاگەرلەرى الەۋمەتتىك جەلىلەردە پورتتىڭ ۇستىندە الدىمەن ءتۇتىنى كورىنىپ، سودان كەيىن جويقىن جارىلىس بولعانى، كەيىننەن قالانى ساڭىراۋقۇلاق ءتارىزدى بۇلت باسقانى ءتۇسىپ قالعان كادرلاردى جاريالادى. جارىلىس تولقىنى كوپتەگەن عيماراتتاردى، سونىڭ ىشىندە پورتتان بىرنەشە شاقىرىم قاشىقتىقتا ورنالاسقان نىسانداردى دا قيراتىپ، كولىكتەرگە دە زيان كەلتىرگەن.

جەرگىلىكتى بۇقارالىق اقپارات قۇرالدارىنىڭ حابارلاۋىنشا، زارداپ شەككەندەردىڭ سانى ءالى ارتۋى مۇمكىن، ويتكەنى ادامدار عيمارات قيراندىلارىنىڭ استىندا قالعان.

بي-بي-سي ءتىلشىسى وقيعا ورنىنان بەيرۋت پورتىنا قاتتى زاقىم كەلگەنىن جانە ونىڭ ءالى جۇمىس ىستەمەيتىنىن حابارلايدى.

«جاقىن ماڭداعى بارلىق عيماراتتار قيرادى. ماعان قاراڭعىدا اينەكتەر مەن ولاردىڭ سىنىقتارىنىڭ ۇستىمەن جۇرۋگە تۋرا كەلدى»، – دەدى كۋاگەرلەردىڭ ءبىرى فرانس پرەسس اگەنتتىگىنە.

جارىلىستىڭ كۇشتى بولعانى سونشالىق، ول بەيرۋتتان 240 شاقىرىم جەردە ورنالاسقان جەرورتا تەڭىزىنىڭ كيپر ارالىنا دا ەستىلگەن. ليۆان قىزىل كرەستى بەيرۋتتاعى اۋرۋحانالاردىڭ ادامعا تولىپ كەتكەنىن حابارلادى.

ليۆان پرەزيدەنتى ميشەل اۋن ەلدە ءۇش كۇنگە سوزىلاتىن ازا تۇتۋ كۇنىن جاريالادى. سونداي-اق وقيعانىڭ سالدارىن جويۋ ءۇشىن 100 ميلليارد ليرا (66 ميلليون اقش دوللارى) بولۋگە ۋادە بەردى. بەيرۋت اپات ايماعى دەپ جاريالاندى. ال بيلىك اسكەردى قاۋىپسىزدىك ءۇشىن پايدالانۋ قۇقىعىن الدى.

سوڭعى جاڭالىقتار