4 تامىز, 11:37 538 0 جاڭالىقتار اسىل تۇمار

ۇكىمەت باسشىسى تامىزدىڭ سوڭىنا دەيىن ينتەرنەت ساپاسى مەن جىلدامدىعىن رەتتەۋدى تاپسىردى

سۋرەت عالامتوردان الىندى
سۋرەت عالامتوردان الىندى

پرەمەر-مينيستر اسقار مامين 25 تامىزعا دەيىن وقۋشىلار مەن مۇعالىمدەر وقۋ جىلىنىڭ قاشىقتان باستالۋىنا تولىق دايىن بولۋى كەرەگىن ايتتى.

«ءبىلىم جانە عىلىم مينيسترلىگى اكىمدىكتەرمەن بىرلەسىپ، وسى جىلدىڭ 25 تامىزىنا دەيىن وقۋشىلار مەن مۇعالىمدەردىڭ وقۋ جىلىنىڭ قاشىقتان باستالۋىنا تولىق دايىن بولۋىن قامتاماسىز ەتسىن. مۇعالىمدەر ءتيىستى وقۋدان وتكىزىلسىن. ينتەرنەت-پلاتفورمالاردا جانە تەلەديداردا قاجەتتى كونتەنت تولىق كولەمدە دايىندالسىن»، – دەپ تاپسىردى ا.مامين ۇكىمەت وتىرىسىندا.

سونىمەن قاتار پرەمەر-مينيستر وقۋلىقتار 25 تامىزعا دەيىن بەرۋدى تاپسىردى. وقۋلىقتاردىڭ قاعاز جۇزىندەگى نۇسقاسى مىندەتتى تۇردە ەلەكتروندىق فورماتتا بولۋى تيىستىگىن ءارى ولار قولجەتىمدى بولۋى كەرەگىن باسا ايتتى.

«تسيفرلىق دامۋ مينيسترلىگى اكىمدىكتەرمەن جانە بايلانىس وپەراتورلارمەن بىرلەسىپ، ءبىلىم بەرۋ رەسۋرستارىنىڭ قولجەتىمدىلىگى مەن ورنىقتىلىعىن، سونداي-اق ەلدىمەكەندەردە ينتەرنەتتىڭ ساپاسى مەن جىلدامدىعىن قامتاماسىز ەتسىن»، – دەدى ۇكىمەت باسشىسى.

«اكىمدىكتەر مەن دەنساۋلىق ساقتاۋ مينيسترلىگى وقۋ ورىندارىندا، اسىرەسە وقىتۋدى ءداستۇرلى اشىق تۇردە جالعاستىراتىن جانە «كەزەكشى» باستاۋىش سىنىپتارى بار مەكتەپتەردە سانيتارلىق-ەپيدەميولوگيالىق نورمالاردى قاتاڭ ساقتاۋ بويىنشا بارلىق قاجەتتى شارالاردى قابىلداسىن. جالپى، جاڭا وقۋ جىلىنىڭ باستالۋىنا بارلىعىمىز ۇلكەن جاۋاپكەرشىلىكپەن قاراۋىمىز كەرەك»، – دەدى اسقار مامين.

سوڭعى جاڭالىقتار