3 تامىز, 09:21 494 0 دەنساۋلىق انار لەپەسوۆا

ەلوردادا پنەۆمونياعا شالدىققاندار سانى 5 ەسە ازايدى

پنەۆمونيامەن اۋىراتىندار سانى 5 ەسە ازايدى، دەپ حابارلايدى ەلوردا اكىمدىگىنىڭ رەسمي سايتى.

قابىلدانعان كارانتين شارالارى مەن اۋرۋحانالارداعى امبۋلاتوريالىق ەمدەۋدىڭ ناتيجەسىندە، ەلوردادا ناۋقاسقا شالدىققاندار مەن جەدەل جاردەم شاقىرۋ سانىنىڭ تومەندەۋ تەندەنتسياسى بايقالادى. قالادا 11 254 ىندەت جۇقتىرۋ جاعدايى تىركەلسە، ولاردىڭ 74,1%-ى – 8 340 ادام ساۋىعىپ شىققان.

«دەنساۋلىق ساقتاۋ ۇيىمدارى مەن دارىگەرلەرگە تۇسەتىن جۇكتەمەنىڭ ايتارلىقتاي تومەندەۋى بايقالدى. جەدەل جاردەمگە قوڭىراۋلار سانى كۇنىنە 4300-دەن 1500-گە دەيىن، ياعني 3 ەسە ازايدى. سونىمەن بىرگە جەدەل جاردەمگە كۆي بويىنشا تۇسەتىن شاقىرۋ سانى 500-دەن 51-گە دەيىن، ياعني 10 ەسە ازايدى. پنەۆمونيامەن اۋىراتىندار سانى 5 ەسە ازايدى. قالاداعى كوروناۆيرۋس ىندەتىنىڭ ازايۋ ديناميكاسىن ساقتاپ قالۋ ءۇشىن، سانيتاريا نورمالارىن قاتاڭ ساقتاۋ قاجەت»، – دەدى قوعامدىق دەنساۋلىق ساقتاۋ باسقارماسى باسشىسى تيمۋر مۇراتوۆ.

28 شىلدەدە پسيحيكالىق دەنساۋلىق ورتالىعىنىڭ بازاسىندا ورنالاسقان قالاداعى العاشقى جۇقپالى اۋرۋلار ستاتسيونارى جابىلدى. 1 تامىزدا قر قورعانىس مينيسترلىگىنىڭ باس كلينيكالىق اۋرۋحاناسى بازاسىندا 100 ورىندىق پروۆيزورلىق ستاتسيونار جانە «رامادا پلازا» قوناقۇي كەشەنى بازاسىنداعى جۇقپالى اۋرۋلار ستاتسيونارى جابىلدى.

ءبىر اپتا ىشىندە ءۇش اۋرۋحانا جوسپارلى مەديتسينالىق كومەك كورسەتە باستادى: №1, № 2 كوپبەيىندى قالالىق بالالار اۋرۋحاناسى جانە №2 كوپبەيىندى اۋرۋحانا. سونىمەن بىرگە، دەنساۋلىق ساقتاۋ باسقارماسى باسشىسىنىڭ ايتۋىنشا، ينفەكتسيالىق جانە پروۆيزورلىق اۋرۋحانالار، قاجەت بولعان جاعدايدا، جەتكىلىكتى ورىندارمەن اشىلۋعا دايىن بولادى. رەزەرۆتە قوسىمشا نىساندار قاراستىرىلعان.

 

سوڭعى جاڭالىقتار