31 شىلدە, 18:57 883 0 جاڭالىقتار اسىل تۇمار

ءباا يتتەردىڭ كومەگىمەن كوروناۆيرۋستى انىقتاپ جاتىر

بىرىككەن اراب امىرلىگىندە ء(باا) Covid-19-دىڭ تارالۋىن شەكتەۋ بويىنشا جۇرگىزىلىپ جاتقان پروفيلاكتيكالىق جانە الدىن-الۋ جۇمىستارىندا جاڭا جەتىستىككە قول جەتكىزدى. بۇل تۋرالى قازاقپارات WAM-عا سىلتەمە جاساپ جازدى. 

ءباا اۋەجايلارىندا پوليتسيا يتتەرىن كوروناۆيرۋستى جۇقتىرعان جولاۋشىلاردى انىقتاۋ ءۇشىن پايدالانا باستادى. ءباا الەمدە بۇل ءادىستى تاجىريبەدە قولدانعان العاشقى ەل بولىپ سانالادى.

ايتا كەتۋ كەرەك، ادام اعزاسىندا ولىمگە اكەلەتىن ۆيرۋستى انىقتاۋعا ارنالعان بۇل ءادىس الەمنىڭ كوپتەگەن ەلدەرىندە زەرتتەلىپ جاتىر. ءباا ءادىسى ادامنىڭ جانە جانۋارلار دەنساۋلىعى قاۋىپسىزدىگىنىڭ ەڭ جوعارى ستاندارتتارىنا سايكەس يتتەر مەن زاتتار اراسىنداعى تىكەلەي بايلانىستىڭ الدىن الاتىنىمەن ەرەكشەلەنەدى.

تاجىريبەلىك قولدانۋ الدىندا قاجەتتى زەرتتەۋلەر، سونىمەن قاتار ءارتۇرلى ەلدەردىڭ ساراپشىلارىمەن ىنتىماقتاستىق ورناتىلدى. Covid-19 جاعدايىن انىقتاۋدا يتتەردى قولدانۋ تۋرالى پىكىرتالاستار مەن تەوريالىق زەرتتەۋلەر كۇشتى ءيىس سەزىمىن ەسكەرە وتىرىپ جۇرگىزىلدى.

وسىلايشا، يتتەردى پوليتسيا پاترۋلدەرىمەن قاتار ساۋدا ورتالىقتارىندا، ءىس-شارالاردا، اۋەجايدا جانە باسقا دا ومىرلىك ماڭىزدى نىسانداردا پايدالانۋعا بولادى دەگەن شەشىم قابىلداندى.

اۋەجايلاردا كوروناۆيرۋستى انىقتاۋ ءادىسىنىڭ ەلگە كەلەتىن جولاۋشىلارعا ناقتى قولدانىلۋىن باقىلاۋ ءۇشىن ارنايى توپتار جۇمىس ىستەيدى. بىرنەشە سەكۋندتىڭ ىشىندە يت ادامدا ۆيرۋستىڭ بولۋ-بولماۋىن ونىڭ قولتىعىنان الىنعان ءيىستى سىناماسىن يىسكەۋ ارقىلى انىقتاي الادى.

بۇل ءادىس حالىقارالىق اۋەجايلاردىڭ بىرتىندەپ اشىلۋى مەن رەيستەر سانىنىڭ ءوسۋى جاعدايىندا اۋەجايدا جولاۋشىلاردىڭ قاۋىپسىزدىگىن جاقسارتۋعا ارنالعان قوسىمشا شارا رەتىندە قاراستىرىلادى.

 

سوڭعى جاڭالىقتار