31 شىلدە, 16:41 487 0 جاڭالىقتار اسىل تۇمار

«Nur Otan» پارتياسى قازاقستاندىقتاردى قۇربان ايت مەرەكەسىمەن قۇتتىقتادى

«Nur Otan» پارتياسىنىڭ الماتى قالالىق فيليالى بارشا قازاقستاندىقتاردى الەمدەگى كۇللى مۇسىلماندار ءۇشىن قاسيەتتى قۇربان ايت مەرەكەسىمەن شىن جۇرەكتەن قۇتتىقتايدى! قۇربان ايت – ىزگىلىك پەن مەيىرباندىقتىڭ، جاقسىلىق پەن قايىرىمدىلىقتىڭ مەيرامى.

جۇرەگىنە يمان ۇيالاعان ءاربىر ادام جاقسى ىستەر جاساۋعا، كومەككە مۇقتاج جاندارعا قولۇشىن سوزىپ، اينالاسىنا قۋانىش سىيلاۋعا تىرىسادى.
مەملەكەت باسشىسى قاسىم-جومارت توقاەۆ «تاريحىمىزبەن تامىرلاس، تانىمىمىزبەن وزەكتەس قۇربان ايت قازاقستان حالقىن بەيبىتشىلىك پەن تاتۋلىققا، ءوزارا سىيلاستىققا، بەرەكە-بىرلىككە ۇندەيدى. يماندىلىق پەن پاراساتتىلىقتى، جاسامپازدىق پەن مەيىرىمدى دارىپتەپ، جاقسىلىققا جول اشادى» دەپ ايتقان بولاتىن.

وسى ۇستانىمنان «Nur Otan» پارتياسىنىڭ مۇشەلەرى دە شەت قالىپ جاتقان جوق. پارتيا مۇشەلەرى دولكۋنتاي ابدۋحاليل المالى اۋداندىق فيليالىمەن بىرىگىپ، قالاداعى 300-گە جۋىق مەديتسينا قىزمەتكەرى مەن اۋداننىڭ 150 كومەككە اسا مۇقتاج تۇرعىنىنىڭ ارقايسىسىنا سالماعى 30 كەلىنى قۇرايتىن ازىق-تۇلىك سەبەتتەرىن تابىستاسا، «DacoMotorsKZ» كومپانياسىنىڭ ديرەكتورى نۇرىمبەك تاۋ دا 10 وتباسىنا كومەكتەستى. نۇرىمبەك مىرزانىڭ جالپى سانى 50 وتباسىعا كومەكتەسۋ جوسپارى بار.

سونىمەن قاتار، پارتيا مۇشەلەرى، قالالىق ءماسليحات دەپۋتاتى ءامىرجان نابيەۆ قۇرباندىققا شالعان مال ەتىن اسا مۇقتاج 5 وتباسىنا شۇباتپەن قوسىپ تاراتسا، ەنەرگەتيكا كوللەدجىنىڭ ديرەكتورى مۇحامەدجان تايتولەەۆ وتكەن اپتادان باستاپ اۋەزوۆ اۋدانىنىڭ تۇرمىسى تومەن جانە كوپبالالى 20 وتباسىنا ازىق-تۇلىك سەبەتتەرىن، مەديتسينالىق ماسكا، قاجەتتى ءدارى-دارمەك پەن ەت جەتكىزدى.

سونداي-اق ادامدار كوپ شوعىرلاناتىن جەرلەردەگى تۇرعىندارعا جالپى سانى 2500 بەتپەردە تاراتتى.

«ءبىزدى ۇمىتپاي، ۇنەمى قولداۋ ءبىلدىرىپ، كومەك كورسەتىپ جاتقانى ءۇشىن مەنىڭ «Nur Otan» پارتياسىنا ايتار العىسىم شەكسىز. 50 مىڭ تەڭگە ماتەريالدىق كومەك تە الدىم. ەندى قاسيەتتى مەرەكەنىڭ قارساڭىندا تاعى دا مەنىڭ ۇلكەن وتباسىما كومەكتەستى»، – دەدى كوپبالالى انا.

بۇل مەرەكە قازاقستان حالقىنىڭ ۇلتتىق بىرەگەيلىگىن، يگى قۇندىلىقتارىن، سان عاسىرلىق مادەني جانە تاريحي مۇرالارىن ساقتاپ، ودان ءارى دامىتا تۇسۋگە سەپتىگىن تيگىزەدى.

بۇگىنگى قاسيەتتى مەيراممەن قۇتتىقتاي وتىرىپ، «Nur Otan» پارتياسىنىڭ الماتى قالالىق فيليالى بارشا قازاقستاندىقتارعا زور دەنساۋلىق، باقىت، تىنىشتىق، اماندىق پەن ءوسىپ-وركەندەۋدى تىلەيدى!
ايت قابىل بولسىن!

سوڭعى جاڭالىقتار