31 شىلدە, 09:31 832 0 جاڭالىقتار اسىل تۇمار

مەملەكەت باسشىسى قازاقستاندىقتاردى قۇربان ايت مەرەكەسىمەن قۇتتىقتادى

قر پرەزيدەنتى قاسىم-جومارت توقاەۆ قازاقستاندىقتاردى قۇربان ايت مەرەكەسىمەن قۇتتىقتادى، – دەپ حابارلادى اقوردا.

قۇرمەتتى وتانداستار!

بارشاڭىزدى قاسيەتتى قۇربان ايت مەرەكەسىمەن شىن جۇرەكتەن قۇتتىقتايمىن!

اسىل ءدىنىمىز بەن سالت-ءداستۇرىمىزدىڭ ساباقتاستىعىن بەكەمدەپ، رۋحاني قۇندىلىعىمىزدىڭ اجىراماس بولىگىنە اينالعان قاستەرلى مەيرامنىڭ كۇللى مۇسىلمان الەمىندە الاتىن ورنى ەرەكشە.

تاريحىمىزبەن تامىرلاس، تانىمىمىزبەن وزەكتەس قۇربان ايت قازاقستان حالقىن بەيبىتشىلىك پەن تاتۋلىققا، ءوزارا سىيلاستىققا، بەرەكە-بىرلىككە ۇندەيدى. يماندىلىق پەن پاراساتتىلىقتى، جاسامپازدىق پەن مەيىرىمدى دارىپتەپ، جاقسىلىققا جول اشادى.

بۇگىندە جالپى ادامزاتقا اۋىر سالماق سالىپ وتىرعان قاۋىپتى ىندەتتى جەڭىپ شىعۋ ءۇشىن بىزگە تاس-ءتۇيىن اۋىزبىرشىلىك پەن تەمىردەي ءتارتىپ قاجەت. قازىرگىدەي كۇردەلى كەزەڭدە ءبىر-بىرىمىزگە قول ۇشىن بەرىپ، بارىمىزدى ءبولىسىپ، جۇرتىمىزدىڭ امان-ساۋلىعىن ويلاپ، جاۋاپكەرشىلىك تانىتۋىمىز اسا ماڭىزدى.

تىلەگىمىز ءبىر، نيەتىمىز ورتاق بولسا، ماقساتىمىزعا جەتەمىز. بىرلىگىمىزدى بەكەمدەپ، ىنتىماعىمىزدى ارتتىراتىن بۇل مەرەكەنىڭ ءمان-ماعىناسى دا وسىندا ەكەنىن باسا ايتقىم كەلەدى.

«سابىر – ساۋلەتتى بايلىق» دەيدى حالقىمىز. رۋحى اسقاق ەل رەتىندە بارلىق سىناقتى ەڭسەرەتىنىمىزگە سەنەمىن. ءار شاڭىراققا قۇت-بەرەكە تىلەيمىن!

حالقىمىزدىڭ اماندىعى ءۇشىن شالعان قۇرباندىقتارىڭىز قابىل بولسىن!

قۇربان ايت بارشامىزعا جاقسىلىق اكەلسىن!

سوڭعى جاڭالىقتار