2 شىلدە, 13:43 519 0 نۇر وتان ارايلىم بيمەنديەۆا

Birgemiz

دۇنيەنىڭ دەگبىرىن قاشىرعان دەرتتىڭ ءالى دە سايابىر تاباتىن ءتۇرى باي­قالار ەمەس. اتى جامان اۋرۋ قا­لىپتى ءتىرشى­لىگى­­­مىزدەن اي­نىتىپ، ءبارىمىزدى الاڭ كوڭىل ەتتى. وڭاي ەمەس. اسىرەسە، ونسىز دا «شىقپا، جانىم شىق­پالاپ» وتىرعان الەۋمەتتىك از قامتىلعان وتباسىلار ءۇشىن بۇل اۋىر سىناق بولىپ تۇرعانى راس. دەسە دە، ءبىر جاعىنان ۇكىمەت، ءبىر جاعىنان ەلباسىنىڭ باستاماسىمەن قۇرىل­عان Birgemiz قوعامدىق قورى سىن شاقتا سىرت قالماي، كومەككە مۇقتاج جان­دارعا كومەك، قولداۋ ءبىلدىرىپ جاتقانى كوڭىل­گە مەدەۋ. جاقىندا قوردىڭ ەسەبىنەن ءبىر­جولعى اتاۋلى كومەك كورسەتۋدىڭ ءتورتىن­شى كەزەڭى باستالماق. بۇل كومەك اۋىلداعى اسا مۇقتاج وتباسىلارعا باعىتتالادى.

ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن Birgemiz قوعامدىق قورى قۇرىلعانى ءمالىم. 2020 جىلعى 20 ناۋرىزداعى ۇندەۋىندە ەل­باسى ن.نازارباەۆ: «ەلىمىزدىڭ كومەككە مۇق­تاج ءاربىر ازاماتىنا قامقورلىق كورسەتىلۋى ءتيىس. قا­زاقستاندىقتار قيىن كەزەڭدەردە ءاردايىم ءبىر-بىرىنە جاردەمدەسكەن. تۇتاس­تىعىمىزدى تاعى ءبىر دالەلدەيتىن كۇن تۋدى»، – دەدى.

قوردى قۇرۋداعى ءاۋ باستاعى ماقسات ازا­ماتتارعا، ونىڭ ىشىندە COVID-19 ىندەتىنەن زارداپ شەككەندەرگە اتاۋلى جانە الەۋمەتتىك قولداۋ كورسەتۋ، سونىمەن قاتار رەسپۋبليكا­لىق جانە ايماقتىق دەڭگەيدە جۇمىس جۇرگىزۋ بولاتىن. يگى باستامانى ەلىمىزدەگى ءىرى كومپانيالار، تانىمال كاسىپكەرلەر  قول­داپ، قوماقتى قارجىلىق كومەك كورسەتكەنى بارشامىزعا ءمالىم. بۇگىندە قورعا تۇسكەن قاراجات اسا مۇقتاج وتباسىلارعا بەلگىلى مولشەردە بەرىلىپ كەلە جاتىر.

قىسىلتاياڭ ساتتە قينالعانعا قول ۇشىن بەرۋ – حالقىمىزدىڭ قانىنا سىڭگەن قاسيەت. كاسىپكەرلەر مەن قالتالى ازاماتتاردان باستاپ، نيەتى ءتۇزۋ، جۇرەگى كەڭ، مۇقتاجعا كو­مەك قولىن سوزعىسى كەلەتىن ەلىمىزدىڭ ءار­بىر ازاماتى ەلباسىنىڭ ۇندەۋىن قولدادى. قور­عا قارجى اۋدارعانداردان بولەك، الەۋ­مەت­تىك از قامتىلعان ازاماتتارعا كومەك­تەس­كەن ەرىكتىلەردىڭ دە ەڭبەگى زور ەكەنىن اتاپ وتكەنىمىز ءجون.

قور جۇمىسىنىڭ اشىقتىعىن كورسەتۋ ماق­ساتىندا Birgemiz قوعامدىق قورى ءتۇس­كەن قاراجات پەن ايماقتار بويىنشا كور­سەتىلگەن كومەك تۋرالى بارلىق اقپارات تۇراق­تى تۇردە جاريالانىپ وتىراتىن birgemiz2020.kz رەسمي سايتىن ىسكە قوستى.  سايتقا كىرگەن كەز كەلگەن ازامات بانكتىك ءۇزىندى كوشىرمەلەرىمەن بىرگە ۇسىنىلاتىن ەسەپتەردى تابا الادى.

قور توراعاسى رۋسلان ساكەەۆتىڭ ءمالىم­دەۋىنشە، ەلباسىنىڭ ۇندەۋىنە قولداۋ ءبىل­دىرگەن مەتسەناتتاردىڭ ارقاسىندا Birgemiz قورىنىڭ ەسەپشوتىندا 28,5 ملرد تەڭگەدەن استام قاراجات جيناقتالعان.

تۇڭعىش پرەزيدەنتتىڭ تاپسىرماسى بويىنشا وسى قاراجات ەسەبىنەن بۇگىنگى تاڭدا 7 سانات بويىنشا 470 مىڭنان استام وت­باسى نەمەسە 1,6 ملن قازاقستاندىق اتاۋ­لى كومەكپەن قامتىلعان. 23 قالانىڭ جانە ولارعا ىرگەلەس اۋىلدار مەن ەلدى مەكەن­دەر­دىڭ اسا مۇقتاج وتباسىلارى 50 مىڭ تەڭ­گە­دەن بىرجولعى تولەماقى الدى. سونىمەن بىرگە كوروناۆيرۋسپەن كۇرەسكە جۇمىل­دىرىل­عان 2 112 مەديتسينا قىزمەتكەرى دە قور قاراجاتىنان 50 مىڭ تەڭگەدەن الدى.

جالعىزباستى قارتتارعا، تۇرمىسى ءتو­مەن كوپبالالى وتباسىلارعا، ەرەكشە قاجەت­تىلىكتەرى بار ازاماتتار مەن باسقا دا مۇق­تاج جاندارعا الەۋمەتتىك پاكەتتەردى  ۇلەس­تىرىپ بەرۋگە ەرىكتى تۇردە اتسالىسىپ جۇرگەن «Jas Otan» ەرىكتىلەرى دە قور جۇمىسىنا بەلسەنە ارالاستى. ولار قورعانىسى ءالسىز 100 مىڭنان استام وتباسىعا Birgemiz قو­رى­نىڭ قاراجاتىنا ساتىپ الىنعان 5 ميلليون ماس­كانى تەگىن جەتكىزىپ بەردى.

سونداي-اق نۇرسۇلتان نازارباەۆتىڭ باس­تاماسى بويىنشا تۇركىستان وبلىسىنىڭ ماق­تاارال اۋدانىندا سۋ باسۋدان زارداپ شەك­كەن دوستىق اۋىلىنىڭ تۇرعىندارىنا ار­نال­عان جاڭا ۇيلەردىڭ قۇرىلىسى ءجۇر­گىزىلىپ جاتىر.

 

ماقسات  حالىق،  GSB UIB ديرەكتورىنىڭ ورىنباسارى، ەكونوميست:

ەڭ باستىسى – اتقارىلعان جۇمىستار

– جالپى، كەز كەلگەن قوعامدىق قور قۇرىل­عاننان كەيىن ونىڭ ەڭ نەگىزگى ماڭىز­دى ءرولى ول – قور جۇمىسىنىڭ مۇمكىندىگىنشە اشىق بولۋى. شىعىستاردىڭ قانداي ءبو­لىكتەردە قايدا جۇمسالىپ جاتقانى تۋرالى اقپاراتتىڭ قولجەتىمدى بولعانى وتە ماڭىزدى. وسى تۇرعىدان كەلگەندە  Birgemiz  قو­رىنىڭ قانشالىقتى اشىق جۇمىس ىستە­گەنىن ءالى دە كورەمىز دەپ ويلايمىن. قور جۇ­مىسى تۋرالى قوعامدا سىني پىكىرلەر دە بول­دى. سىننىڭ بولۋى دا ورىندى. ويتكەنى ءبىر جىل بۇرىن بولعان ارىستاعى وقيعاعا باي­لانىستى قۇرىلعان قور قارجىسىنىڭ قولدى بولىپ كەتكەنىن بايقادىق. سوندىق­تان بارىنشا اشىق، جاريالى ءارى شىنايى بولعانى ءجون.

ەڭ باستىسى – ول اتقارىلعان جۇمىستار. جۇمىس ورىندى اتقارىلعان بولسا، ەرتە مە، كەش پە حالىق ءبارىبىر باعالايتىن بولادى. Birgemiz قورىنىڭ قۇرىلۋىنىڭ ناتيجە­سىندە ءبىراز قارجىلاندىرۋ پروتسەسى ءجۇردى. وسىعان اتسالىسقان ازاماتتار، اسىرەسە ەرىك­تىلەردىڭ قىزمەتىن ەرەكشە باعالاپ وتكىم كەلەدى. ولار وزدەرىنە ەشقانداي تابىس الماسا دا، وسى قوردان بولىنگەن قاراجاتقا الىنعان ازىق-تۇلىكتى ءتيىستى جەرلەرگە دەيىن جەتكىزىپ، الەۋمەتتىك وسال توپتارعا قول ۇشىن بەرۋ ماسەلەسىنە بارىنشا ۇلەس قوستى. وسى جاعىنان كەلگەن كەزدە اتالعان قوردىڭ اتىنا ساي بىرلىككە، تۇتاستىققا ۇندەگەن ىزگى ارەكەتى قۇپتاۋعا، قولداۋعا تۇرارلىق.

 

جولتاي الماشۇلى، قازاقستاننىڭ ەڭبەك سىڭىرگەن قايراتكەرى، جازۋشى:

قور بولگەن قارجى حالىققا قولداۋ بولدى

– COVID-19 ىندەتى الەۋمەتتىك ءالسىز توپ­تارعا، اسىرەسە ءبىر كۇندىك جالاقىعا جۇمىس ىستەيتىن قاراپايىم ازاماتتارعا اۋىر سوق­قى بولدى. حالىق جۇمىس ىستەمەيىن، تابىس تاپپايىن دەپ جاتقان جوق. بۇگىنگى ىندەت جاعدايى حالىقتىڭ ءوز بەتىنشە جۇمىس ىستەپ، ناپاقاسىن تابۋىنا مۇمكىندىك بەرمەي وتىر.  وسىنداي سىن ساعاتتا ەلباسىنىڭ باس­تاماسىمەن قۇرىلعان Birgemiz قورى COVID-19 ىندەتىنەن زارداپ شەككەن ازا­ماتتارعا اتاۋلى جانە الەۋمەتتىك قولداۋ كور­سەتۋدى ماقسات تۇتتى. توتەنشە جاعداي كەزەڭىندە بۇل قاراپايىم حالىققا ماتە­ريالدىق تۇرعىدان ۇلكەن كومەك دەپ ويلاي­مىن. قور بەرگەن قارجى حالىقتى بايىتىپ جىبەرمەسە دە، قولداۋ بولدى. حالىقتىڭ جانىنا جارا، كوڭىلىنە قاياۋ تۇسىرمەۋدى ويلاعان ەلباسى قالتالى ازاماتتارعا ۇندەۋ تاستاپ، حالىققا قارايلاسۋعا شاقىردى.

قاي زاماندا دا وسىنداي قيىن كەزەڭدە قالتالى ازاماتتار قاراپايىم حالىققا قول ۇشىن بەرىپ، قولداۋ كورسەتكەن. ونداي مى­سالداردى تاريحتان كوپ كەزدەستىرۋگە بولادى. Birgemiz  قورى ۇيىمداستىرعان شارا­لار – سونداي كومەكتىڭ ءبىر ءتۇرى. ادام­دار كارى بولسىن، جاس بولسىن، باي بولسىن نەمەسە كەدەي بولسىن، مۇندايدا ءبارىنىڭ جاع­دايى بىردەي. «كەمەدەگىنىڭ جانى ءبىر» دەپ قازاق بەكەر ايتپاعان. ءبارىمىز ءبىر جۇدى­رىق­تاي جۇمىلىپ قيىندىقتى بىرگە جەڭىپ، ءبىر جەڭنەن قول، ءبىر جاعادان باس شىعارساق، عا­نيبەت ەمەس پە؟! ەلباسىنىڭ باستاماسىن قول­داعانىمىز دۇرىس. قور جۇمىسى الداعى ۋاقىتتا دا جالعاسا بەرسە، ءتىپتى جاقسى بولار ەدى.

 

سوڭعى جاڭالىقتار