30 ماۋسىم, 21:11 437 0 جاڭالىقتار اسىل تۇمار

اسقار مامين ەۋرازيالىق دامۋ بانكى كەڭەسىنىڭ وتىرىسىن وتكىزدى

قر پرەمەر-ءمينيسترى اسقار ءماميننىڭ توراعالىعىمەن بەينەكونفەرەنتسيا بايلانىسى رەجيمىندە ەۋرازيالىق دامۋ بانكى (ەادب) كەڭەسىنىڭ وتىرىسى ءوتتى، دەپ جازدى قازاقپارات ۇكىمەت باسشىسىنىڭ ءباسپاسوز قىزمەتىنە سىلتەمە جاساپ.

وتىرىسقا بانك اكتسيونەرلەرىنىڭ وكىلەتتى وكىلدەرى: ارمەنيادان قارجى ءمينيسترىنىڭ ورىنباسارى ارمەن ايراپەتيان، بەلارۋستەن قارجى ءمينيسترى يۋري سەليۆەرستوۆ، قىرعىزستاننان قارجى ءمينيسترى باقتىگۇل جەەنباەۆا، رەسەيدەن قارجى ءمينيسترى انتون سيلۋانوۆ، تاجىكستاننان قارجى ءمينيسترى فايزيددين كاححورزودا قاتىستى. وتىرىستى اشقان اسقار مامين جاقىندا ەادب باسقارما توراعاسى قىزمەتىنەن كەتكەن اندرەي بەليانينوۆقا ناتيجەلى جۇمىسى ءۇشىن العىس ايتىپ، جاڭادان تاعايىندالعان بانك باسشىسى نيكولاي پودگۋزوۆقا تابىس تىلەدى.

وتىرىس بارىسىندا كەڭەس ەادب تسيفرلىق باستامالار قورى تۋرالى ەرەجەنى بەكىتتى. جاڭا قوردىڭ ماقساتى — ەۋرازيالىق ەكونوميكالىق وداقتىڭ 2025 جىلعا دەيىنگى تسيفرلىق كۇن ءتارتىبىنىڭ نەگىزگى باعىتتارى اياسىندا ىسكە اسىرىلاتىن، ونىڭ ىشىندە جوبالاردى ازىرلەۋگە جانە قارجىلاندىرۋعا قاتىسۋ جانە اقپاراتتىق رەسۋرستاردى ينتەگراتسيالاۋ ارقىلى تسيفرلىق ترانسفورماتسيا قۇرالدارى مەن تاجىريبەلەرىن قالىپتاستىرۋعا بانككە قاتىسۋشى ەلدەرگە كومەك كورسەتۋ.

حالىقارالىق دامۋ بانكتەرىنىڭ ۇزدىك تاجىريبەلەرىنە سايكەس ەادب كەڭەسى جانىنان كادرلار جونىندەگى كوميتەت قۇرىلدى، ول تۋرالى ەرەجە كەڭەس وتىرىسى اياسىندا بەكىتىلدى.

كەڭەس ەۋرازيالىق دامۋ بانكىنىڭ 2019 جىلعى جۇمىسىن قورىتىندىلادى – ەادب قازىرگى ينۆەستيتسيالىق پورتفەلى $4,3 ملرد دەيىن 25,6%-عا ۇلعايدى. بالانستىق پورتفەل 31%-عا $2,8 ملرد دەيىن ءوستى. پورتفەلىندە ەڭ كوپ ۇلەسى بار ەلدەر — رەسەي (45,7%) جانە قازاقستان (40,1%). 2019 جىلدىڭ قورىتىندىسى بويىنشا اعىمداعى ينۆەستيتسيالىق پورتفەلدىڭ سالالىق قۇرىلىمى وزگەرگەن جوق – ەڭ ۇلكەن ۇلەس ەنەرگەتيكاداعى (21,1%), كولىكتەگى (18,9%), قارجى سەكتورىنداعى (18,7%) جوبالارعا تيەسىلى. 2019 جىلى جالپى سوماسى $1,3 ملرد بولاتىن 27 جاڭا جوبا بويىنشا كەلىسىمگە قول قويىلدى.

بانك بارلىق قاتىسۋشى مەملەكەتتەردە ءوزىنىڭ قاتىسۋىن بەلسەندى تۇردە دامىتىپ، قولدانىستاعى ستراتەگيانى ەسكەرە وتىرىپ، ۇلتتىق دامۋ جوبالارى مەن ەلەۋلى ينتەگراتسيالىق تيىمدىلىگى بار جوبالاردى قارجىلاندىرۋدى جۇزەگە اسىردى. بانك پورتفەلىندەگى ينتەگراتسيالىق جوبالاردىڭ ۇلەسى ماقساتتى ماننەن اسىپ، 54,4%-عا جەتتى. بانكتىڭ قارىز الۋىنىڭ جيىنتىق كولەمى $2,6 ملرد قۇرادى. 2019 جىلى ەادب جالپى سوماسى 80 ملرد تەڭگەگە بەس وبليگاتسيا شىعارىلىمىن، جالپى سوماسى 23 ملرد رۋبلگە بەس وبليگاتسيا شىعارىلىمىن ورنالاستىردى، سونداي-اق $201 ملن ەۋرووبليگاتسيالار شىعارىلىمىن ەكىنشى رەت ورنالاستىردى. ينۆەستيتسيالىق پورتفەلدىڭ ايتارلىقتاي ءوسۋىن ەسكەرە وتىرىپ، ەادب ونىڭ ساپاسىن ءتيىستى دەڭگەيدە ساقتاي الدى. بالانستىق پورتفەلدەگى پروۆيزيالار ۇلەسى 2019 جىلى 3,2%-دان 2,4%-عا دەيىن تومەندەدى. 2019 جىلدىڭ قورىتىندىسى بويىنشا بانكتىڭ كىرىسى $68,9 ملن قۇرادى. كاپيتالدىڭ تابىستىلىعى – 3,8%.

قازاقستاندا ينۆەستيتسيالىق قىزمەتتى دامىتۋ ءۇشىن قازاقستاننىڭ ۇلتتىق بانكىمەن ەادب-گە 200 ملرد تەڭگە ليميتىمەن قارجى تارتۋعا مۇمكىندىك بەرەتىن كەلىسىمگە قول قويۋدىڭ ماڭىزى زور. حالىقارالىق رەيتينگتىك اگەنتتىكتەر ەادب قارجىلىق تۇراقتىلىعىنا جوعارى باعا بەردى: Standard&Poor's بانكتىڭ رەيتينگىن ۆۆۆ دەيىن كوتەردى، Moody's اگەنتتىگى Baa1 راستادى، ال Fitch اگەنتتىگى BBB+ رەيتينگىن بەردى.

سوڭعى جاڭالىقتار