18 ماۋسىم, 19:07 815 0 دەنساۋلىق ارايلىم بيمەنديەۆا

نەسىپبەك ءداۋتايۇلى: ەلباسى دا ەت پەن سۇيەكتەن جارالعان ادام

– دۇنيە ءجۇزىن دۇرلىكتىرىپ وتىرعان بۇل اۋرۋ ادامدى جاسىنا، قىزمەتىنە، الەۋمەتتىك جاعدايىنا قاراپ تاڭدامايدى. ادام اتاقتى، داڭقتى بولسا، ولار اۋىرمايتىنداي كورەتىن ءبىر كوزقاراس بار. جەر بەتىندە ءومىر ءسۇرىپ جاتقان بارشامىز جاراتۋشىنىڭ الدىندا الەم ءۇشىن، قوعام ءۇشىن، جالپى ءبىزدىڭ ار-ۇياتىمىز ءۇشىن ادامنىڭ بارلىعى بىردەي.

وسى كەزەڭدە ءبىز تاريحي، رۋحاني قۋاتىمىزدىڭ السىزدىگىن سەزىندىك، ياعني ەشنارسەگە ءبىز دايىن ەمەسپىز. مىناداي قاتتى دۇربەلەڭ كەلگەن كەزدە ءبىز ءبارىن ۇمىتتىق. ۇلت رەتىندە كىم ەكەنىمىز كورىنىپ جاتىر، ورتاق مۇددە جولىندا ەمەس، ارقايسىسىمىز ءوز بەتىمىزگە جۇرگەن سياقتى ەلەستەيدى. ەل-جۇرتتىڭ ساۋلىعىنا قاراعاندا، ءوز باسىمىزدىڭ ساۋلىعىن ويلاپ جاتىرمىز. ەل-جۇرت بولماسا ساۋلىقتىڭ كەرەگى نە؟ ەل-جۇرتىمىز امان بولسىن دەۋ كەرەك. سودان كەيىن مەملەكەت تالاپ ەتكەن سانيتارلىق تالاپتاردى ورىنداۋىمىز قاجەت. بىراق وسى تالاپتاردىڭ اياق استى قالىپ، ورىندالماي وتىرعانى قىنجىلتادى. كوپشىلىك ۆيرۋستىڭ بار ەكەنىنە سەنبەي، ءمان بەرمەي، ءتىپتى سول ويىنا وزگەلەردى دە يلاندىرعىسى كەلىپ ءجۇر. ودان بولەك، كوشەدە ەمىن-ەركىن قىدىرىستاپ، قالىپتى ومىرگە كوشىپ كەتتى.

ەلباسى دا ەت پەن سۇيەكتەن جارالعان ادام. پرەزيدەنت تە، ەل-جۇرتىمىز دا امان بولسىن دەپ تىلەيمىن. ءار ادام ءوزىنىڭ عانا ەمەس، ەل-جۇرتتىڭ دا اماندىعىن ويلاپ، تىلەكتەس بولعانى كەرەك. اۋىرعاننىڭ ءبارى امان-ەسەن جازىلىپ كەتسىن دەپ وتىرمىز. قازاقتىڭ سانى ونسىز دا از. اۋرۋدان ءبىر ادام ومىردەن وتكەن سايىن، سانىمىز ازايا بەرەدى. ەلباسىنىڭ دەنساۋلىعىن تىلەيتىن حالىق ەل-جۇرتتىڭ دا اماندىعىن ويلايدى.

سوڭعى جاڭالىقتار