6 ماۋسىم, 13:17 326 0 دەنساۋلىق انار لەپەسوۆا

COVID-19: الەمدە ىندەتتەن كوز جۇمۋ كورسەتكىشى تومەندەدى

الەمدە كوروناۆيرۋستىڭ تارالۋ قارقىنى كۇشەيدى.

Daily Mail باسىلىمىنىڭ جازۋىنشا، مامىردىڭ العاشقى اپتاسىندا كۇن سايىن ىندەت جۇقتىرۋدىڭ 86 مىڭعا جۋىق جاڭا دەرەگى تىركەلدى. الايدا سوڭعى اپتادا بۇل كورسەتكىش كۇرت كوبەيىپ، تاۋلىگىنە شامامەن 114 مىڭ ناۋقاس انىقتالدى. ىندەتتىڭ تارالۋ قارقىنىنىڭ كۇشەيۋىنە ءۇندىستان، رەسەي جانە وڭتۇستىك امەريكا ەلدەرىندە  ناۋقاستار سانىنىڭ ارتۋى سەبەپ.

دەسە دە، الەمدە COVID-19 ىندەتىنەن كوز جۇمۋ كورسەتكىشى تومەنداي باستادى. ەڭ جوعارى كورسەتكىش 16 ساۋىردە تىركەلىپ، 1 ميلليون ادامعا شاققاندا 1,35 ءولىمدى قۇرادى. بۇگىندە ءولىم كورسەتكىشى ەكى ەسە تومەندەپ، 1 ميلليون ادامعا شاققاندا 0,67-گە ءتۇستى. مامىردىڭ باسىندا تاۋلىگىنە 5,1 مىڭ ناۋقاس كوز جۇمسا، سوڭعى كۇندەرى ىندەتتەن قايتىس بولعاندار سانى 4,3 مىڭعا دەيىن ازايدى.

ميلانداعى سان-راففاەل اۋرۋحاناسىنىڭ باسشىسى البەرتو زانگريلونىڭ ايتۋىنشا، بۇل كورسەتكىشتەر ۆيرۋستىڭ السىرەي باستاعانىن كورسەتەدى. دارىگەردىڭ بولجامىنا سۇيەنسەك، ىندەتتى بۇرىنىراق جۇقتىرعاندارعا قاراعاندا سوڭعى تىركەلگەن ناۋقاستاردا پاتوگەندەر سانى ءبىرشاما از. الايدا بۇل تەوريا ءالى دالەلدەنبەگەن.

ايتا كەتەيىك، دجونس حوپكينس ۋنيۆەرسيتەتىنىڭ سوڭعى دەرەگى بويىنشا الەمدە كوروناۆيرۋس جۇقتىرعاندار سانى 6,7 ميلليوننان اسىپ جىعىلدى. قاتەرلى ۆيرۋستان 394 984 ناۋقاس كوز جۇمدى.

ال قازاقستاندا 12511 ادامنان كوروناۆيرۋس انىقتالدى. ىندەتتەن 6903 ادام ەمدەلىپ شىقتى. دەرتى اسقىنعان 52 ناۋقاس كوز جۇمدى.

سوڭعى جاڭالىقتار