5 ماۋسىم, 19:25 503 0 جاڭالىقتار اسىل تۇمار

توكيو وليمپياداسىنا قازاقستاننان قانشا سپورتشى قاتىسادى

سۋرەت عالامتوردان الىندى
سۋرەت عالامتوردان الىندى

2021 جىلى جاپونيادا وتەتىن توكيو وليمپيادا ويىندارىندا قازاقستان نامىسىن 110-نان استام سپورتشى قورعايدى.

قازاقپاراتتىڭ جازۋىنشا، ورتالىق كوممۋنيكاتسيالار قىزمەتى الاڭىندا وتكەن بريفينگىدە قر مادەنيەت جانە سپورت ۆيتسە-ءمينيسترى ساكەن مۇسايبەكوۆ: «قازىرگى ۋاقىتتا ءبىزدىڭ كوماندامىزدىڭ قورجىنىندا توكيو ويىندارىنىڭ 52 ليتسەنزياسى بار. وزدەرىڭىز بىلەسىزدەر، وليمپيادا ويىندارى 2021 جىلعا اۋىستىرىلدى جانە 23 شىلدە مەن 5 تامىز ارالىعىندا وتەدى. ەلىمىزدىڭ تاريحىندا العاش رەت جۇزۋدەن دميتري بالاندين سىندى وليمپيادا چەمپيونى شىقتى ءارى ول ليتسەنزيا الىپ ۇلگەردى. سوڭعى 20 جىلدا العاش رەت ساداق اتۋدان كوماندالىق سايىسقا قاتىسامىز. سپورتتىڭ كوماندالىق تۇرىنەن ۆاتەرپولشىلارىمىز دا ليتسەنزيا الدى»، – دەپ اتاپ وتكەن.

ۆيتسە-ءمينيستردىڭ اتاپ وتۋىنشە، قازىرگى ۋاقىتتا وليمپياداعا بارۋعا ۇمىتتەنەتىن سپورتشىلارىمىزدىڭ بارلىعى قىزۋ دايىندىققا كىرىسىپ كەتكەن. ولارعا 1 ماۋسىمنان باستاپ قاۋىپسىزدىكتىڭ بارلىق شارالارىن ساقتاي وتىرىپ، جاتتىعۋعا رۇقسات بەرىلگەن.

«جوسپارلاعانىمىزداي 100-دەن استام ليتسەنزيا ۇتىپ الامىز. وليمپيادا ويىندارىنا 110-نان استام سپورتشىمىز قاتىسادى. ءبىز قىز-جىگىتتەرىمىزدىڭ، كوماندامىزدىڭ تابىستى ونەر كورسەتەتىنىنە سەنىمدىمىز»، – دەدى ساكەن مۇسايبەكوۆ.

سوڭعى جاڭالىقتار