4 ماۋسىم, 18:56 2041 0 دەنساۋلىق انار لەپەسوۆا

كوروناۆيرۋستى سيمپتومسىز وتكەرەتىن ناۋقاستاردى ەمدەۋ ءتاسىلى وزگەرەدى – مينيستر

بۇدان بىلاي كوروناۆيرۋستى سيمپتومسىز وتكەرەتىن ناۋقاستار ۇيدەن ەمدەلەدى.  بۇل تۋرالى قر دەنساۋلىق ساقتاۋ ءمينيسترى ەلجان ءبىرتانوۆ مالىمدەدى.

«بۇگىنگى كۇنى ەلىمىزدە كوروناۆيرۋس ينفەكتسياسىمەن 12 124 ادام اۋىرىپ، تىركەۋگە الىندى. قازىرگى ۋاقىتتا وسى ازاماتتارعا قاتىستى اقپاراتتاردى تولىق زەرتتەدىك. ولاردىڭ 77 پايىزى سيمپتومسىز ناۋقاستار دەپ انىقتالدى. سوعان قاراماستان تىركەۋگە الىنعان ازاماتتارعا مەملەكەت تاراپىنان تولىقتاي مەديتسينالىق-دياگنوستيكالىق كومەك تەگىن كورسەتىلەدى. بۇل مەديتسينالىق كومەك تەك قانا حالىقارالىق ارىپتەستەرمەن اقىلداسقان، عىلىمي-زەرتتەۋ جۇمىستارىنا نەگىزدەلگەن كلينيكالىق حاتتاما ارقىلى وتكىزىلەدى. بۇل حاتتامانى ەلىمىزدىڭ ەڭ بەلگىلى مەديتسينا ماماندارى ازىرلەپ بەكىتكەن»، - دەدى مينيستر.

ە.ءبىرتانوۆتىڭ ايتۋىنشا،  اتالعان نۇسقاۋلىق ەپيدەميا باستالعاننان بەرى 8 رەداكتسيالاۋدان وتكەن. حاتتامانى قولدانۋدىڭ ارقاسىندا ناۋقاستاردىڭ 58 پايىزى، ياعني 6 288 ادام دەرتىنەن ايىقتى. قازىرگى كۇنى 5 836 ناۋقاس دارىگەرلەردىڭ باقىلاۋىمەن ەم قابىلداۋدا. 

«جاقىندا ءبىز وسى عىلىمي-زەرتتەۋ جۇمىسىمىزدىڭ نەگىزىندە ەلىمىزدەگى كوروناۆيرۋسقا قارسى شارالاردى وزگەرتىپ، جاڭا ءتاسىل ەنگىزدىك. ول حالىقارالىق ستاندارتقا دا ساي كەلەدى. ءبىز سيمپتومسىز ناۋقاستاردى اۋرۋحاناعا جاتقىزباي جەرگىلىكتى ەمحانالاردا، ۇيلەرىندە، ياعني ستاتسيونارلىق كارانتينگە جاتقىزباي ءۇي كارانتينىندە باقىلاۋعا الامىز. مۇنداي ناۋقاستاردى باقىلاۋ جاۋاپكەرشىلىگى جەرگىلىكتى ەمحانالارعا جۇكتەلەدى. ۋچاسكەلىك دارىگەرلەر ارنايى دايىندىقتان وتكەن. بۇگىندە اۋرۋى جەڭىل دەڭگەيدەگى ناۋقاستاردىڭ كوپشىلىگى ينفەكتسيالىق اۋرۋحانالاردا جاتىر. بىراق، وسى اپتادان باستاپ جاڭا حاتتامانى ەنگىزەمىز»، - دەدى مينيستر.

ايتا كەتەيىك، وتكەن تاۋلىكتە ەلىمىزدە كوروناۆيرۋس جۇقتىرۋدىڭ 271 جاڭا دەرەگى تىركەلىپ, ءوسىم 2,3 پايىزدى قۇرادى. 

بۇگىنگە دەيىن رەسپۋبليكا بويىنشا ىندەتتەن 6469 ناۋقاس ەمدەلىپ شىقتى. دەرتى اسقىنعان 48 ناۋقاس كوز جۇمدى. 

سوڭعى جاڭالىقتار