4 ماۋسىم, 13:09 460 0 رۋحانيات Túrkistan Gazeti

رىمعالي نۇرعاليدىڭ اتىنا كوشە بەرۋ ۇسىنىلدى

قازاق ادەبيەتى مەن رۋحاني الەمىنە ولشەۋسىز ۇلەس قوسقان ايتۋلى عالىمداردىڭ ءبىرى رىمعالي نۇرعالي بولاتىن. ول كەڭەستىك جۇيەنىڭ تار شەڭبەرىندە ءومىر سۇرە ءجۇرىپ ، ىشتەي كەشەگى وتكەن الاش ارىستارىمەن رۋحتاس بولا ءبىلدى. بيىل داڭقتى عالىمنىڭ تۋعانىنا 80 جىل تولادى.   

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى رىمعالي نۇرعاليدىڭ 80  جىلدىعىنا وراي «ادەبيەتتانۋ عىلىمىنىڭ ايقاناتتى ارعىماعى» اتتى حالىقارالىق ونلاين كونفەرەنتسيا وتكىزدى.

حالىقارالىق ونلاين كونفەرەنتسيا جۇمىسىنا  نۇر-سۇلتان، الماتى، اتىراۋ، اقتاۋ، وسكەمەن، سەمەي، قىزىلوردا، قاراعاندى تاعى باسقا قازاقستاننىڭ ءار ايماعىنان قاتىسۋشىلار لەبىزدەرىن جولدادى. سونىمەن قاتار رەسەيدەن، تاتارستاننان اكادەميكتىڭ دوسى، قازان ۋنيۆەرسيتەتىنىڭ پروفەسسورى ح.يۋ.ميننەگۋلوۆ ونلاين بايلانىسقا شىعىپ، سالەم جولدادى.

عالىمعا ارنالعان ونلاين جيىن ەۋرازيا ۇلتتىق ۋنيۆەرسيتەتىنىڭ رەكتورى اكادەميك ە.ب. سىدىقوۆتىڭ، اتالعان ءبىلىم ورداسىنىڭ پرورەكتورى اكادەميك د.قامزابەكۇلىنىڭ جولداعان يگى تىلەكتەرمەن اشىلدى. قر ۇعا اكادەميگى عاريفوللا ەسىم: «جولداس، سىرلاس، ساپارلاس بولدىق. رىمعالي نۇرعالي ۇلكەن الاش جولىن جالعاستىرۋشى. ول ادەبيەت الەمىندە باسەكە قالىپتاستىرۋ ارقىلى، ادەبي مايتالماندار جايلى ءوز ەستەلىكتەرىمەن بولىسە وتىرا، ادەبي سىننىڭ دا دامۋىنا وراسان زور ۇلەس قوستى»، – دەپ اتاپ ءوتتى.

اكادەميكتىڭ شاكىرتى، نۇر-سۇلتان قالاسىنداعى قازاقستان جازۋشىلار وداعى فيليالىنىڭ ديرەكتورى، بەلگىلى اقىن داۋلەتكەرەي كاپۇلى عالىمنىڭ  ادامدىق بولمىسىن،  ازاماتتىق قاسيەتتەرىن سارالاي كەلە، ۇستاز ارمانىن ەسكە الا وتىرىپ،  نۇر-سۇلتان قالاسىنا ا.بايتۇرسىنوۆتىڭ ەسكەرتكىشىن ورناتۋ تۋرالى ۇسىنىسىنىڭ جۇزەگە اسۋىن قولداۋدى عىلىمي قاۋىمنان سۇرادى. جانە ەلوردا تورىنەن مەكتەپتىڭ اتىن بەرۋ ماسەلەسى شەشىلىپ جاتقانىن ايتتى.

ل.ن.گۋميلەۆ اتىنداعى ەۇۋ تەلەراديو جانە قوعاممەن بايلانىس كافەدراسىنىڭ مەڭگەرۋشىسى، عالىمنىڭ شاكىرتى سەرىكزات دۇيسەنعازى: «رىمعالي نۇرعاليدىڭ قازاق ادەبيەتى مەن تاريحىنا قوسقان ۇلەسى زور ەكەندىگى ءسوزسىز. سوعان بايلانىستى ەلىمىزدە مەكتەپتەر مەن كوشەلەرگە ول كىسىنىڭ اتىن  بەرۋ تۋرالى ۇسىنىستى قولداۋىمىز كەرەك»  – دەگەن پىكىر ءبىلدىردى.

ب.بالىقباي

 

سوڭعى جاڭالىقتار