4 ماۋسىم, 11:48 351 0 الەۋمەت انار لەپەسوۆا

الماتىدا دارىگەرلەرگە ۇستەماقى تولەۋگە 5,5 ملرد تەڭگە ءبولىندى

الماتىدا كوروناۆيرۋس ەپيدەمياسىنا قارسى شارالارعا 9 ميلليارد تەڭگەگە جۋىق قارجى بولىنگەن. ونىڭ 5,5 ميلليارد تەڭگەدەن استامى كوروناۆيرۋسقا قارسى كۇرەسىپ جاتقان دەنساۋلىق ساقتاۋ نىساندارى قىزمەتكەرلەرىنىڭ جالاقىسىنا قوسىمشا ۇستەمەاقى رەتىندە قاراستىرىلعان.

بۇل تۋرالى «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالى ءمالىم ەتتى، دەپ حابارلايدى قازاقپارات.

قوردىڭ حابارلاۋىنشا، ۆيرۋسقا قارسى كۇرەسكە جۇمىلدىرىلعان مەديتسينا نىساندارىنىڭ ءتىزىمىن الماتى اكىمدىگىندەگى ارنايى كوميسسيا بەكىتكەن. تىزىمگە سايكەس، ءساۋىر ايى ءۇشىن مەديتسينا ماماندارىنا تولەنەتىن ۇستەماقى 1,5 ميلليارد تەڭگەنى قۇرادى.

«ماۋسىمنىڭ بىرىندەگى مالىمەت بويىنشا، الماتىلىق 5398 مەديتسينا قىزمەتكەرىنىڭ جالاقىسىنا قوسىمشا اقى رەتىندە 1,5 ميلليارد تەڭگە تولەندى. قازىرگى تاڭدا قالادا ەپيدەمياعا قارسى ءىس-شارالارعا 86 دەنساۋلىق ساقتاۋ نىسانى جۇمىلدىرىلعان. ەستەرىڭىزگە سالا كەتسەك، قوسىمشا تولەمدەر دەنساۋلىق ساقتاۋ سالاسى قىزمەتكەرىنىڭ ومىرىنە توندىرەتىن قاۋىپ دەڭگەيىنە قاراي تولەنەدى» ، - دەدى امسق الماتى فيليالى باسشىسى تىلەۋحان ابىلداەۆ.

 

سوڭعى جاڭالىقتار