4 ماۋسىم, 10:19 414 0 قوعام انار لەپەسوۆا

ايدا بالاەۆا: رامىزدەرىمىز – اسقاق رۋح، ازاتتىق، قاھارماندىق پەن دانالىقتىڭ قاستەرلى نىشانى

قر اقپارات جانە قوعامدىق دامۋ ءمينيسترى ايدا بالاەۆا ەل ازاماتتارىن مەملەكەتتىك رامىزدەر كۇنى مەرەكەسىمەن قۇتتىقتادى.

«بۇگىن - قازاقستان رەسپۋبليكاسىنىڭ مەملەكەتتىك رامىزدەرى كۇنى! 1992 جىلعى ءدال وسى كۇنى تاۋەلسىز قازاقستاننىڭ جاڭا مەملەكەتتىك رامىزدەرى العاش رەت بەكىتىلدى. مەملەكەتتىك رامىزدەر - مەملەكەتتىڭ مىزعىماس نەگىزدەرىنىڭ ءبىرى. مەملەكەتتىك رامىزدەر بارلىق ۋاقىتتا قوعامداعى ءار ادام ءۇشىن قاستەرلى دە، قاسيەتتى بولدى. رامىزدەر حالىقتىڭ بوستاندىعى مەن تاۋەلسىزدىگىن بەينەلەيدى، ونىڭ قۇندىلىقتارى مەن قاسيەتتى جەرلەرىن، اتا-بابالار جادىن جانە جاڭا ۇرپاقتىڭ بولاشاق جەتىستىكتەرىن بىلدىرەدى» دەپ جازدى ايدا بالاەۆا  Facebook-تەگى پاراقشاسىندا.

مينيستر ءوز سوزىندە قازاقستاننىڭ تۋى اسقارالى بيىك تاۋ شىڭدارىنا ورناتىلىپ، عارىشتان جەر شارىن اينالىپ ۇشقانىن، الەمدىك دەڭگەيدەگى سپورتتىق جەڭىستەردە جەلبىرەپ، ادامداردى ازاماتتىق جانە كاسىبي ەرلىكتەرگە شابىتتاندىرعانىن اتاپ ءوتتى.

«قاي قايسىمىز دا تۋىمىز، ءانۇرانىمىز جانە ەلتاڭبامىزدىڭ اسقاق رۋح، ازاتتىق، قاھارماندىق پەن دانالىقتىڭ قاستەرلى نىشانى ەكەنىن جاقسى بىلەمىز. ءبىز اركەز قاسيەتتى تۋىمىزدىڭ استىندا وتانىمىزدىڭ تاۋەلسىزدىگى مەن حالقىمىزدىڭ باقىتتى دا بەيبىت ءومىرىن قورعايمىز. بەيبىت ۋاقىتتا مەملەكەتتىلىك ءاربىر قازاقستاندىقتىڭ جەتىستىكتەرىن نىعايتادى - ءبىزدىڭ ارقايسىمىز نەعۇرلىم تابىستى بولساق، تاۋەلسىز قازاقستان سوعۇرلىم قۋاتتى بولادى» دەيدى مينيستر.

ايدا بالاەۆا ءسوز سوڭىندا ەلىمىزدىڭ بارلىق ازاماتتارىن وسى قاسيەتتى دە ماڭىزدى كۇنمەن قۇتتىقتادى.

«بارشاڭىزعا ءوسىپ-وركەندەۋ، ۋاقىتشا قيىن كەزەڭدى لايىقتى ەڭسەرۋ، ومىرلىك كۇش-جىگەر مەن جاسامپازدىق تىلەيمىن!» دەپ جازدى ايدا بالاەۆا.

 

سوڭعى جاڭالىقتار