3 ماۋسىم, 13:04 553 0 جاڭالىقتار اسىل تۇمار

لاتىن الىپبيىنە كوشۋدە اسىعىستىق بولماۋى كەرەك - پرەزيدەنت

مەملەكەت باسشىسى قاسىم-جومارت توقاەۆ رەسەيدىڭ «كومسومولسكايا پراۆدا» گازەتىنە بەرگەن سۇحباتىندا كيريلليتسادان لاتىن الىپبيىنە كوشۋ بارىسى تۋرالى ايتتى.

«بۇل ۇدەرىستى ءبىزدىڭ تۇڭعىش پرەزيدەنتىمىز نۇرسۇلتان نازارباەۆ «رۋحاني جاڭعىرۋ» تۇجىرىمداماسى اياسىندا كوتەردى. ول لاتىن قارپىنە كوشۋدىڭ تەك قازاق تىلىنە قاتىستى ەكەنىن، ورىس ءتىلىنىڭ جاعدايىنا اسەر ەتپەيتىنىن بىرنەشە رەت مالىمدەدى. جاڭا تەحنولوگيالاردىڭ جەدەل ەنگىزىلۋىنە بايلانىستى جاھاندىق اقپاراتتىق كەڭىستىك تە قارقىندى تۇردە وزگەرىپ كەلەدى. نەگىزگى اقپاراتتار لاتىن گرافيكاسىنا نەگىزدەلگەندىكتەن، ءبىزدىڭ بالالارىمىز جاڭا جاعدايعا بەيىمدەلۋى كەرەك»، - دەدى پرەزيدەنت.
پرەزيدەنت قازاق ءالىپبيىن جاڭعىرتۋدىڭ قازاق ءتىلىنىڭ كوممۋنيكاتسيالىق مۇمكىندىكتەرىن كەڭەيتۋ نيەتىنەن تۋىنداعانىن جەتكىزدى.

«سونىمەن قاتار ءبىز ورتالىق ازيا مەملەكەتتەرىنىڭ تاجىريبەسىن ەسكەرە وتىرىپ، لاتىن قارپىنە بىرتىندەپ كوشەمىز. قولدان جەدەلدەتۋگە جول بەرىلمەيدى. سەبەبى، مۇندا كيريلليتسادان لاتىنعا جاي عانا كوشۋ ەمەس، قازاق ءتىلىنىڭ ورفوگرافياسىن قايتا قۇرۋ جونىندە ايتىلىپ وتىر. ودان بولەك، قازاق ادەبيەتىنىڭ كلاسسيكتەرىنىڭ بارلىق ماڭىزدى ەڭبەكتەرى كيريلليتسادا جازىلعانىن، كوپتەگەن قازاق ۇرپاقتارىنىڭ كيريلل الىپبيىندە ءبىلىم العانىن جانە قازىر دە وقىپ جاتقانىن ەستەن شىعارۋعا بولمايدى. اسىعىس قادام جاساۋ مۇنداي ۇلكەن ىسكە زيانىن تيگىزىپ، شالىس باستىرۋى مۇمكىن. سوندىقتان بۇل ماسەلەنى اقىلعا سالىپ، پاراساتتىلىقپەن شەشۋ كەرەك»، - دەدى قاسىم-جومارت توقاەۆ.

سوڭعى جاڭالىقتار