2 ماۋسىم, 10:55 644 0 جاڭالىقتار اسىل تۇمار

جىل سوڭىندا جۇمىسسىزدىق دەڭگەيى 6,1 پايىزعا جەتۋى ىقتيمال – مينيستر

سۋرەت عالامتوردان الىندى
سۋرەت عالامتوردان الىندى

بيىل ناۋرىز-ءساۋىر ايىندا ەلىمىزدە 4 ميلليوننان استام ادام جۇمىسسىز قالدى. بۇل تۋرالى ۇكىمەت وتىرىسىندا قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى.

«كوروناۆيرۋس ىندەتىنە بايلانىستى جاريالانعان توتەنشە جاعدايعا بايلانىستى ەڭبەك نارىعىنداعى احۋال كۇردەلى بولدى. ناۋرىز-ءساۋىر ايلارىندا بولجام بويىنشا تابىسسىز، جۇمىسسىز قالعان ازاماتتار سانى 4 ميلليوننان استام بولدى. 20 ساۋىردەن باستاپ كارانتين شارالارىنىڭ جەڭىلدەتىلۋىنە بايلانىستى بۇل كورسەتكىش مامىر ايىندا 1 ملن ادامعا دەيىن تومەندەدى دەپ بولجاپ وتىرمىز. ۇكىمەت تاراپىنان ەكونوميكانى جاڭعىرتۋ، بيزنەستى قولداۋ، ونىڭ ىشىندە جۇمىسپەن قامتۋ مۇمكىندىكتەرىن كەڭىنەن كوزدەۋ ناتيجەسىندە شىلدە ايىنان باستاپ ەڭبەك نارىعىنداعى جاعدايدىڭ تۇراقتانۋىنا قول جەتكىزۋ مۇمكىن دەپ سانايمىز»، – دەدى ءبىرجان نۇرىمبەتوۆ.

ءمينيستردىڭ ايتۋىنشا، جىل سوڭىندا جۇمىسسىزدىقتىڭ بولجامدى دەڭگەيى 6,1 پايىزدى قۇراۋى ىقتيمال.

«جالپى بيىل 1 ملن 220 مىڭ ادامدى جۇمىسپەن قامتۋ شارالارىنا تارتۋعا تولىق مۇمكىندىگىمىز بار. وعان ەكونوميكانى، بيزنەستى قولداۋ شارالارىنىڭ بارىنشا جۇمىس ورىندارىن ساقتاپ قالۋ مۇمكىندىگى جانە بارلىق مەملەكەتتىك باعدارلامالار اياسىندا جاڭا جۇمىس ورىندارىن قۇرۋ الەۋەتى تولىعىمەن پايدالانىلاتىن بولادى. ونىڭ ىشىندە جاڭا جۇمىسپەن قامتۋدىڭ جول كارتاسى اياسىندا 255 مىڭ جۇمىس ورنى قۇرىلماق. بۇگىندە جول كارتاسىنا كىرگەن 6,5 مىڭ جوبانىڭ 5 300 جوباسى باستالىپ، 103 مىڭ جۇمىس ورنىنا 91 مىڭ ادام تارتىلدى. ونىڭ 35 پايىزى – جاستار»، – دەدى ءبىرجان نۇرىمبەتوۆ.

سوڭعى جاڭالىقتار