31 مامىر, 20:53 541 0 جاڭالىقتار اسىل تۇمار

ءالى دە اشىلماعان اقتاڭداقتارىمىز قانشاما – باۋىرجان بايبەك

Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى پاراقشاسىندا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي جازبا جاريالادى.

قادىرلى وتانداستار!
بۇگىن – ەلىمىزدە ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى.
تۇتاس ۇلتتىڭ جارتىسىنا جۋىعىنىڭ عۇمىرىن قيعان الاپات اشتىق قۇرباندارى مەن ايگىلى 37-ءنىڭ، ودان بەرگىدەگى قۋعىنداۋلاردا وپات بولعان ۇلتتىڭ بەتكە ۇستار تۇلعالارىنىڭ عازيز رۋحتارىنا باس يەر تاعزىم كۇنى. ۇلت تاريحىنىڭ زوبالاڭعا تولى كۇردەلى كەزەڭىن، اۋىر زاردابىن زەردەلەر، سانا سۇزگىسىنەن وتكىزەر تاعلىم مەزەتى.
وتكەن عاسىردىڭ 20-50 جىلدارىنداعى كەڭەستىك ساياسي قۋعىن-سۇرگىننىڭ ۇلتىمىزعا كەلتىرگەن قاسىرەتى وراسان.
قولدا بار دەرەكتەرگە سۇيەنسەك، 1930 جىلدارداعى اشتىقتا ۇلتىمىزدىڭ جارتىسىنا جۋىعى قىرىلدى. ءبىر ميلليونداي قانداسىمىز تارىداي شاشىراپ، شەت ەلدەرگە بوسىپ كەتتى.
وزىق ويلى، الدىڭعى قاتارلى 100 مىڭداي ازاماتىمىز جازىقسىز قۋعىن-سۇرگىنگە ۇشىراپ، 20 مىڭدايى اتىلدى.
زۇلمات جىلدارى كەڭەس وداعىنىڭ جەر-جەرىنەن قازاق ەلىنە ءتۇرلى ۇلت وكىلدەرى ماجبۇرلەپ جەر اۋدارىلىپ، ولاردىڭ دا كوپشىلىگى تاعدىر تاۋقىمەتىن بىرگە تارتتى. قانشاماسى وسى جەردە ماڭگىلىك تىنىس تاپتى.
ۇلت باسىنا وسىنشاما عالامات قايعى-قاسىرەت اكەلگەن بۇل ناۋبەت ەشقاشان ۇمىتىلمايدى.
وسىنى ەسكەرىپ، ەلىمىزدىڭ تۇڭعىش پرەزيدەنتى، ەلباسى نۇرسۇلتان نازارباەۆ 1997 جىلى ءوز جارلىعىمەن 31 مامىردى ساياسي قۋعىن-سۇرگىن قۇرباندارىن ەسكە الۋ كۇنى دەپ بەلگىلەدى.
سودان بەرى ەلىمىزدىڭ جەر-جەرىندە قۋعىن-سۇرگىن قۇرباندارىنا ارناپ كوپتەگەن ەسكەرتكىشتەر سالىندى، مۋزەيلەر اشىلدى، قۇربانداردىڭ ەسىمدەرى ءمارمار تاقتالارعا ويىپ جازىلدى. ارحيۆ دەرەكتەرى اشىلىپ، كوپتەگەن زەرتتەۋلەر جۇرگىزىلدى.
ءالى دە اشىلماعان اقتاڭداقتارىمىز قانشاما. مەملەكەت باسشىسى قاسىم-جومارت توقاەۆتىڭ كەشەگى ۇندەۋىندە «تاريحي ادىلدىكتى قالپىنا كەلتىرۋ جۇمىستارىن اياقتاپ، ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى» تاپسىرۋى وسى ولقىلىقتاردىڭ ورنىن تولتىرۋعا زور سەرپىن بەرمەك.
قاشاندا ەل بىرلىگى مەن ىنتىماعىن ماقسات تۇتقان «Nur Otan» پارتياسى دا ۇلتىمىزدىڭ تاريحىنداعى مۇنداي قاسىرەتتى كەزەڭدەردى ۇرپاق جادىندا ساقتاۋعا، وتكەننەن ساباق الۋعا ۇندەيتىن شارالارعا مۇرىندىق بولىپ كەلەدى. پارتيا جانىنداعى «ميراس» كەڭەسى دە بۇل ىسكە تيىسىنشە اتسالىساتىن بولادى.
تاعدىردىڭ تەزىنەن، توزاقتىڭ وزىنەن وتسە دە ۇلتىمىزدىڭ قايسار رۋحى، الماستاي جىگەرى مۇقالمادى. كەشەگى الاش ارىستارىنىڭ اسىل ارماندارى ورىندالىپ، ءوز الدىنا دەربەس، الەم تانىعان قۋاتتى ەل بولدى. ەندى جوعىمىزدى تۇگەندەپ، بارىمىزدى باعالاپ، ەلدىگىمىزدى نىعايتۋ - بارىمىزگە ورتاق پارىز. اتالى سوزگە، ساليقالى باسشىعا جۇگىنسەك، ءبىزدى سىرتىمىزدان جاۋ، ىشىمىزدەن داۋ المايدى. الاش ارداقتىسى ءاليحان بوكەيحان ايتقانداي، «بوستاندىققا اپاراتىن جالعىز جول – ۇلتتىق ىنتىماق قانا».
ۇلتىمىزدىڭ باسىندا مۇنداي ناۋبەت ەشقاشان قايتالانباسىن.
ەلىمىزدىڭ ىرگەسى بەرىك، بىرلىگى بەكەم، بولاشاعى جارقىن بولسىن.

سوڭعى جاڭالىقتار