30 مامىر 2020, 16:48 720 0 ايماق انار لەپەسوۆا

اتىراۋدا 5 جىل ۇزىلىستەن كەيىن وزەن پورتىنىڭ جۇمىسى قايتا جانداندى

اتىراۋدا بەس جىل ۇزىلىستەن كەيىن وزەن پورتى جۇمىسىن قايتادان باستادى.

بۇدان بەس جىل بۇرىن اتىراۋ وزەن پورتىنىڭ جۇمىسى توقتاعان ەدى. وعان باستى سەبەپ – جايىق-كاسپي كانالىنىڭ ءتۇبىن تەرەڭدەتۋ جۇمىسىنىڭ جۇرگىزىلمەۋى، دەپ جازادى قازاقپارات.

«بۇل پورت بۇرىنعى گۋرەۆ قالاسىندا 1926 جىلى اشىلعان. سودان بەرى ءبىر عاسىرعا جۋىق كەمەمەن جۇك تاسىمالدانىپ كەلدى. ال 2010 جىلى پورتقا رەكونسترۋكتسيا جۇرگىزىلىپ، جىل سايىنعى جۇك قابىلداۋ قۋاتىن 15 مىڭ تونناعا جەتكىزگەن ەدىك. الايدا بەس جىل بۇرىن جۇمىسىمىزدى توقتاتۋعا ءماجبۇر بولدىق. ويتكەنى جايىق-كاسپي كانالىمەن جۇك تاسىمالداۋ مۇمكىن بولمادى. كانال جولى بىتەلىپ، تەرەڭدەتۋ جۇمىستارىن جۇرگىزۋ قاجەت بولدى»، - دەيدى اتىراۋ وزەن پورتىنىڭ ديرەكتورى ازامات زۇلحارناەۆ.

ونىڭ ايتۋىنشا، پورتقا سۋ جولىمەن سوڭعى رەت 2015 جىلى جۇك كەلگەن. سول كەزدە شەتەلدىك مۇناي جانە وسى سالاداعى سەرۆيستىك كومپانيالارىنىڭ تاپسىرىسىمەن جەتكىزىلگەن جۇك قابىلدانعان. سودان كەيىن اتىراۋعا سۋ جولىمەن كەلەتىن جۇكتەر ماڭعىستاۋداعى باۋتين پورتىنا جەتكىزىلگەن.

ەندى مىنە، اتىراۋ وزەن پورتىنا بەس جىلدان كەيىن ءىرى گاباريتتى جۇك جەتكىزىلدى. بۇل – گاز-حيميا كەشەنى ءۇشىن وڭتۇستىك كورەيادا قۇراستىرىلعان پروپان ساقتايتىن رەزەرۆۋارلار.

«ءبىز گاز-حيميا كەشەنىنىڭ قۇرىلىسىنا قاجەتتى رەزەرۆۋارلاردى قابىلداپ الدىق. ونىڭ سالماعى –532 توننا. ءىرى گاباريتتى جۇكتى ەكى بارجامەن جەتكىزدى. جاقىندا تاعى وسىنداي ءۇش بارجامەن كەلەتىن اۋىر جۇكتى كۇتىپ وتىرمىز»، – دەيدى وزەن پورتىنىڭ قىزمەتكەرى رۋسلان اسانوۆ.

وزەن پورتىنىڭ ديرەكتورى ازامات زۇلحارناەۆتىڭ ايتۋىنشا، ەندى مۇندا الىس جانە جاقىن شەتەلدەردەن تاۋاردىڭ كەز كەلگەن ءتۇرى تيەلگەن سۋ كولىكتەرىن قابىلداۋعا تولىق مۇمكىندىك بار.

سوڭعى جاڭالىقتار