29 مامىر, 10:19 536 0 كولىك انار لەپەسوۆا

بۋرابايدا پوليتسيا قىزمەتكەرى ادام قاعىپ ءولتىرىپ، وقيعا ورنىنان قاشىپ كەتكەن

ءتارتىپ ساقشىسىنىڭ قاتىسۋىمەن تاعى جول اپاتى تىركەلدى.

بۇل جولى اقمولا وبلىسىندا پوليتسيا قىزمەتكەرى ەر ادامدى بۋرابايعا كىرە بەرىستە قاعىپ كەتكەن. تولەم تەرمينالىنا بارىپ، جولاقىسىن تولەمەك بولعان كىسى سول جەردە كوز جۇمعان. ال قۇقىق قورعاۋ قىزمەتكەرى وقيعا ورنىنان ءىز سۋىتقان، دەپ حابارلايدى "كتك" تەلەارناسى.

نۇرلان ءجۇنىسوۆ كوكشەتاۋداعى ەلەكتر جەلىلەرى تورابىندا باعانالار تاسيتىن جۇك كولىگىنىڭ جۇرگىزۋشىسى بولعان. قازا بولار كۇنى تاڭەرتەڭگىسىن ماكينسك قالاسىنا ءىس-ساپارعا كەتكەن. جولدا كولىكتەن ءتۇسىپ تولەم تەرمينالىنا جول اقىسىن تولەمەك بولىپ جاقىنداعاندا، جۇيتكىگەن كولىك كەپ سوققان.

"40-43 مەترگە ۇشىپ كەتكەنىن ايتتى. ۇشقانى سونشالىق، ششۋچەدە سوققاننان كەيىن توقتاماعان، ارى قاراي كەتىپ قالعان. ماس بولعان دەيدى", - دەيدى مارقۇمنىڭ قىزى مارجانگۇل نۇكەنوۆا.

تۋىسقاندارى "مۇسىلماندىق جولمەن شاڭىراعىندا ءبىر تۇنەتىپ، ارۋلاپ بارىپ جەرلەي المادىق" دەپ وكىنەتىندەرىن جەتكىزگەن. سەبەبى مارقۇمنىڭ دەنەسى بولشەكتەنىپ قالعان، ءمايىتحانادان اكەلە ەسىك الدىنان زيراتقا جونەلتىپتى. ال وقيعا ورنىنان قاراسىن باتىرعان ماكينسك قالالىق جەلىلىك پوليتسيا بولىمشەسىنىڭ باستىعى بولىپ شىققان. باسشىلارى ونى قىزمەتىنەن شىعارىپ ۇلگەرىپتى.

"كولىكتەگى پوليتسيا دەپارتامەنتى باستىعىنىڭ اعىمداعى جىلعى 27 مامىرداعى بۇيرىعىمەن ماكينكا ستانتسياسىنداعى جەلىلىك پوليتسيا باستىعى، مايور روللان قانعوجين ىشكى ىستەر ورگاندارىنان شىعارىلدى. سونىمەن قاتار كوكشەتاۋ ستانتسياسىنىڭ جەلىلىك پوليتسيا ءبولىمىنىڭ باستىعى اتقارىپ وتىرعان لاۋازىمىنان بوساتىلدى", - دەدى قر ءىىم كولىكتەگى پوليتسيا دەپارتامەنتى ءباسپاسوز حاتشىسى ءلاززات قاسىمجانوۆا.

قازىر پوليتسيا مايورى قاماۋعا الىنىپ، "جول ەرەجەسىن ورەسكەل بۇزۋ" بابى بويىنشا تەرگەلىپ جاتىر.

سوڭعى جاڭالىقتار