28 مامىر, 14:22 510 0 تۋريزم انار لەپەسوۆا

"ينۆەستورلار قاجەت": مينيسترلىك ۇلتتىق تابيعي پاركتەردە ءتۋريزمدى دامىتۋ جوسپارىن تانىستىردى

ۇلتتىق تابيعي پاركتەردە ءتۋريزمدى دامىتۋ ءۇشىن ينۆەستورلار ىزدەستىرىلۋدە. 

بۇل تۋرالى قر مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسبەكوۆ ايتتى، دەپ حابارلايدى قازاقپارات.

«ەكولوگيا مينيسترلىگىمەن بىرلەسىپ جۇزەگە اسىرىپ جاتقان تاعى ءبىر باعىت - ۇلتتىق تابيعي پاركتەردە ءتۋريزمدى دامىتۋ. ماسەلەن، «ىلە-الاتاۋى» مەملەكەتتىك ۇلتتىق تابيعي پاركىندە ەكولوگيالىق ءتۋريزمدى دامىتۋ ءۇشىن «قۇلتاۋ» جشس جەكە ينۆەستورى انىقتالدى. 7 ۆيزيت-ورتالىق، 156 شاقىرىم جاياۋ جۇرگىنشى سوقپاعى، اۆتوكولىكتەرگە ارنالعان 2 مىڭ تۇراق ورنى، گلەمپينگ، كەمپينگ، شامامەن 3 مىڭ ورىنعا ارنالعان پالاتالىق لاگەر سالۋ جوسپارلانعان. ينۆەستيتسيانىڭ جالپى كولەمى شامامەن 17,3 ملرد تەڭگەنى قۇرايدى»، - دەدى داستان رىسبەكوۆ ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ ايتۋىنشا، مۇنان بولەك، «التىن ەمەل»، «كولساي كولدەرى» جانە «شارىن» مەملەكەتتىك ۇلتتىق تابيعي پاركتەرىن دامىتۋ بويىنشا جوسپار ازىرلەنگەن. بۇل پاركتەردى دە دامىتۋعا جەكە ينۆەستورلار تارتىلاتىن بولادى. قازىرگى ۋاقىتتا الەۋەتتى ينۆەستورلاردى ىزدەۋ جۇمىستارى جۇرگىزىلىپ جاتىر.

«تاياۋ كەلەشەكتە ءدال وسىنداي كونكۋرستىق پروتسەدۋرالاردى اتالعان ۇلتتىق تابيعي پاركتەرگە قاتىستى وتكىزۋ جوسپارلانىپ وتىر»، - دەدى ول.

 

سوڭعى جاڭالىقتار