27 مامىر, 17:57 1103 0 جاڭالىقتار اسىل تۇمار

بيۋدجەت قاراجاتىن جىمقىرعان ءبىلىم مەكەمەلەرىنىڭ باسشىلارى سوتتالدى

سۋرەت عالامتوردان الىندى
سۋرەت عالامتوردان الىندى

قوستاناي وبلىسىندا ءبىلىم سالاسىندا جەمقورلىققا جول بەرگەن ەكى لاۋازىمدى تۇلعا قىلمىستىق جاۋاپقا تارتىلدى. بۇل تۋرالى بۇگىن قوستاناي وبلىستىق ءماسليحاتىنىڭ كەزەكتەن تىس سەسسياسىندا بەلگىلى بولدى، – دەپ جازدى قازاقپارات.

سەسسيا بارىسىندا قوستاناي وبلىسى بويىنشا تەكسەرۋ كوميسسياسىنىڭ توراعاسى دميتري كوستيۋكوۆتىڭ بايانداماسى تىڭدالدى. ول وبلىستىق بيۋدجەتتىڭ ورىندالۋ ساپاسى، اۋديت جانە ساراپتامالىق-تالداۋ ءىس-شارالارىنىڭ ناتيجەلەرىنە توقتالدى.

«بيۋدجەتتى جۇزەگە اسىرۋدا 435,8 ملن.تەڭگە سوماسىندا قارجىلىق بۇزۋشىلىقتار انىقتالدى. ونىڭ ىشىندە 21,2 ملن تەڭگە وبلىستىق ۇيىمدار بويىنشا ەسەپكە الىندى. بۋحگالتەرلىك ەسەپتى جۇرگىزۋ كەزىندە 833,4 ملن تەڭگە رەتسىز نەمەسە زاڭسىز جۇمسالعان. 1315 قۇجاتتى راسىمدەۋ كەزىندە ءتارتىپ بۇزىلعان. وبلىستىق بيۋدجەتتەن قارجىلاندىرىلاتىن وبەكتىلەر بويىنشا 32 زاڭبۇزۋشىلىق تىركەلدى»، – دەدى دميتري كوستيۋكوۆ.

دميتري كوستيۋكوۆتىڭ ايتۋىنشا، قارجىلىق تالاپتاردىڭ بۇزىلۋىنا قاتىستى 10 ماتەريال قۇقىق قورعاۋ ورگاندارىنا جىبەرىلدى. ونىڭ ىشىندە وبلىستىق بيۋدجەتتەن قارجىلاندىرىلاتىن 2 اۋديت نىسانى بار.

«ەكى لاۋازىمدى تۇلعا ءار ءتۇرلى مەرزىمگە قىلمىستىق جاۋاپقا تارتىلدى. ولار 4,7 ملن تەڭگەگە جۋىق بيۋدجەت قاراجاتىن ۇرلاعانى جانە ىسىراپ ەتكەنى ءۇشىن سوتتالدى. اتاپ ايتقاندا «قامىستى اۋدانى اكىمدىگىنىڭ ءبىلىم ءبولىمى» مەملەكەتتىك مەكەمەسىنىڭ باسشىسى 1,1 ملن تەڭگەنى جىمقىرسا، سارىكول اۋدانى اكىمدىگىنىڭ ءبىلىم ءبولىمىنىڭ «بوبەك» بالاباقشاسى 3,6 ملن تەڭگەنى ىسىراپ ەتكەن. مەملەكەتتىك اۋديت قورىتىندىسى بويىنشا تەكسەرۋ كوميسسياسى جانە ۋاكىلەتتى ورگاندار زاڭبۇزۋشىلىقتارعا جول بەرگەن تۇلعالارعا قاتىستى 170 حاتتاما تولتىردى»، – دەدى تەكسەرۋ كوميسسياسىنىڭ توراعاسى.

سوڭعى جاڭالىقتار