27 مامىر, 12:56 351 0 زاڭ انار لەپەسوۆا

بۋكمەكەرلىك كەڭسەلەر جاپپاي بۋراباي مەن قاپشاعايعا كوشىرىلەدى

ءماجىلىس «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا ماقۇلدادى. 

«زاڭ جوباسى ويىن بيزنەسى سالاسىنداعى زاڭنامانى جەتىلدىرۋگە، بۋكمەكەرلىك كەڭسەلەر مەن توتاليزاتوردىڭ قىزمەتىن باقىلاۋدىڭ تيىمدىلىگىن ارتىرۋعا باعىتتالعان. زاڭ جوباسىن قاراۋ بارىسىندا دەپۋتاتتار جاڭا ويىن ايماقتارىن اشۋ تۋرالى نورمالاردى الىپ تاستاۋ بويىنشا ۇسىنىس ەنگىزدى. سونىمەن بىرگە، قۇجاتقا دەپۋتاتتار بۋكمەكەرلىك كەڭسەلەر مەن توتاليزاتورلاردىڭ كاسسالارىن الماتى وبلىسى قاپشاعاي سۋ قويماسىنىڭ جاعالاۋىنداعى جانە اقمولا وبلىسى بۋراباي اۋدانىنداعى ەكى ويىن ايماعى اۋماقتارىندا ورنالاستىرۋ بويىنشا تۇزەتۋلەر ەنگىزدى. وسىعان بايلانىستى ەندى بۋكمەكەرلىك كەڭسەلەر مەن توتاليزاتورلاردىڭ كاسسالارى ەلدى مەكەندەردەن اتالعان ويىن ايماقتارىنا كوشىرىلەتىن بولادى»، - دەدى دەپۋتات ساكەن وتەباەۆ.

ونىڭ سوزىنە قاراعاندا، دەپۋتاتتار جاقىن تۋىستارىنىڭ ءوتىنىشى بويىنشا سوتتىڭ قۇمار ويىنداردى جانە ءباس تىگۋدى تەرىس پايدالاناتىن ادامداردى ارەكەت قابىلەتى شەكتەۋلى دەپ تانۋ بويىنشا ۇسىنىس ەنگىزدى. ياعني، ەندى وتباسى مۇشەلەرى مەن جاقىن تۋىستارى ءوز جاقىندارىن زياندى ارەكەتتەن شەكتەۋ قۇقىعىنا يە بولا الادى.

«زاڭ جوباسىنا سوت اكتىسى نەگىزىندە قازاقستان رەسپۋبليكاسىنىڭ اۋماعىندا قىزمەتى زاڭسىز دەپ تانىلعان ويىن بيزنەسىن شەتەلدىك ۇيىمداستىرۋشىلاردىڭ پايداسىنا تولەمدەردى جۇزەگە اسىرۋ بويىنشا قىزمەتتەر كورسەتۋگە تىيىم سالۋعا باعىتتالعان تۇزەتۋلەر ەنگىزىلدى»، - دەدى س. وتەباەۆ.

ەسكە سالا كەتەيىك، بيىل 13 مامىردا پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى .

 

سوڭعى جاڭالىقتار