27 مامىر, 12:28 626 0 ءبىلىم انار لەپەسوۆا

قازاقستاندىق مەكتەپتەردى ءبىر اۋىسىمدى وقۋ رەجيمىنە كوشىرۋ كەرەك – راۋان كەنجەحانۇلى

سۋرەت ينتەرنەتتەن الىندى
سۋرەت ينتەرنەتتەن الىندى

ەلىمىزدە ءبىلىم بەرۋ ساپاسىن ارتتىرۋ ءۇشىن وتاندىق مەكتەپتەردى ءبىر اۋىسىمدى وقۋ رەجيمىنە كوشىرۋ كەرەك. ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا كەڭەس مۇشەسى، ۇلتتىق اۋدارما بيۋروسىنىڭ باسشىسى  راۋان كەنجەحانۇلى وسىنداي ۇسىنىس ايتتى. 

«قازاقستاندا ءبىلىم بەرۋ ساپاسىن ارتتىرۋعا باستى كەدەرگى – مەكتەپ جاعدايى دەپ ويلايمىز. ناقتىراق ايتساق، قازاقستانعا مەكتەپ جەتىسپەيدى. قازىرگى تاڭدا ەلىمىزدەگى 7400 مەكتەپتە جالپى سانى 3,5 ملن اسا بالا بار. ونىڭ 70% - ەكى اۋىسىمدا، ال 200 مىڭ بالا ءۇش اۋىسىمدا وقيدى»، - دەدى ر.كەنجەحانۇلى.

سپيكەر قازاقستاننىڭ ىلگەرى دامىعان ەلدەردىڭ تاجىريبەسىنە ۇمىتىلىپ وتىرعانىن، الايدا مۇنداي مەملەكەتتەردىڭ ەشقايسىسىندا ءۇش نەمەسە ەكى اۋىسىمدا وقىتاتىن مەكتەپ جوق ەكەنىن العا تارتتى.

«ساپالى ءبىلىم بەرۋ ءۇشىن مەكتەپتىڭ ءبىر اۋىسىمدا جۇمىس ىستەۋى ماڭىزدى. ءبىزدىڭ ەسەبىمىزشە، ورتا ءبىلىم بەرۋ جۇيەسىن تولىقتاي ءبىر اۋىسىمعا وتكىزۋ ءۇشىن قازاقستانعا شامامەن 3 مىڭداي جاڭا مەكتەپ قاجەت»، - دەدى ۇلتتىق اۋدارما بيۋروسىنىڭ باسشىسى.

راۋان كەنجەحانۇلى مۇنداي اسا اۋقىمدى ماسەلەنى  شەشۋ ءۇشىن مەكتەپ سالۋعا جەكە قورلاردى كەڭىنەن تارتۋدى ۇسىندى. ونىڭ ايتۋىنشا، قازىرگى مەملەكەتتىك-جەكەمەنشىك ارىپتەستىك قۇرالى جانە ءبىلىم بەرۋدى جان باسىنا قارجىلاندىرۋ تەتىگى مەكتەپ سالۋعا جەكە قاراجاتتى، سونىڭ ىشىندە شەتەلدىك قورلاردى تارتۋعا مۇمكىندىك بەرەدى.

«الايدا، وسى اتالعان تەتىكتەر اياسىنداعى بيزنەستى ەكونوميكالىق تۇرعىدان ىنتالاندىرۋ شارالارى جەتكىلىكسىز. ولاردى قايتا قاراپ، كەڭەيتۋ قاجەت دەپ سانايمىز. سونىمەن بىرگە، داعدارىستان كەيىنگى ەكونوميكانى جانداندىرۋدىڭ ءبىر امالى رەتىندە مەكتەپ قۇرىلىسىن دا قاراستىرۋعا بولار ەدى. اۋقىمدى مەكتەپ قۇرىلىسىنىڭ ەكونوميكا مەن قوعامعا ۇزاق مەرزىمدە بەرەرى مول ەكەنىنە سەنىمدىمىز. ءتيىستى ەسەپتەرىمىز بەن ناقتى ۇسىنىستارىمىزدى ءبىلىم جانە عىلىم مينيسترلىگىنە بەردىك»، - دەدى سپيكەر.

ايتا كەتەيىك، بۇعان دەيىن ۇلتتىق قوعامدىق سەنىم كەڭەسىنىڭ مۇشەسى اسىلبەك قوجاحمەتوۆ "جوو-لاردىڭ باسەكەگە قابىلەتتىلىك باعدارلاماسىن" ەنگىزۋدى ۇسىنعانىن حابارلاعانبىز.

 

سوڭعى جاڭالىقتار