26 مامىر, 18:40 2285 0 جاڭالىقتار اسىل تۇمار

پويىز ۆاگونىنىڭ ۇستىنە ءمىنىپ سۋرەتكە تۇسپەك بولعان جىگىت كۇيىپ قالدى

سۋرەت عالامتوردان الىندى
سۋرەت عالامتوردان الىندى

جامبىل وبلىسىندا پويىزدىڭ ۆاگون-تسيستەرناسىنا ءمىنىپ، فوتوعا تۇسپەك بولعان شۋ قالاسىنىڭ 20 جاستاعى تۇرعىنى كۇيىپ قالدى، – دەپ حابارلادى جەرگىلىكتى پوليتسيا دەپارتامەنتىنىڭ ءباسپاسوز قىزمەتى.

قازاقپارات ۇسىنعان اقپاراتتا 24 مامىر كۇنى شۋ قالالىق اۋرۋحاناسىنىڭ قىزمەتكەرىنەن جەدەل مەديتسينالىق جاردەم بريگاداسىنىڭ كۇيىك شالعان جاس جىگىتتى شۇعىل جەتكىزگەنى تۋرالى حابارلاما كەلىپ تۇسكەنى جازىلعان. تەكسەرۋ بارىسىندا پوليتسەيلەر زارداپ شەككەن ازاماتتىڭ شۋ قالاسىنىڭ 20 جاستاعى تۇرعىنى ەكەنىن انىقتادى.

«بۇل ازامات 24 مامىر كۇنى ساعات 20.30-دا فوتوسۋرەتكە ءتۇسۋ ءۇشىن شۋ ستانتسياسى پاركىنىڭ ەلەكترلەندىرىلگەن جولىنداعى جۇك پويىزىنىڭ قۇرامىندا تۇرعان ۆاگون-تسيستەرناعا ورمەلەپ شىققان. ابايسىزدا ول جوعارى ۆولتتى جەلى سىمىنا ءتۇسىپ قالعان. ناتيجەسىندە ول 50 پايىز دەنە جانە اياق-قولىنىڭ ءى-ءىى-ءىىى دارەجەلى ەلەكتروتەرميالىق كۇيىگىن الدى. بۇل فاكت قر قك-ءنىڭ 344-بابى 1-بولىگى، ياعني، تەمىر جول كولىگى قوزعالىسىنىڭ قاۋىپسىزدىك ەرەجەلەرىن بۇزۋ فاكتىسى بويىنشا سوتقا دەيىنگى تەرگەۋدىڭ بىرىڭعاي تىزىلىمىندە تىركەلدى. جازاتايىم وقيعا بويىنشا تەرگەپ-تەكسەرۋ امالدارى جۇرگىزىلۋدە»، – دەلىنگەن كپد ءباسپاسوز قىزمەتىنىڭ حابارلاماسىندا.

سونداي-اق، كولىكتەگى پوليتسيا دەپارتامەنتىنىڭ باستىعى وڭال بەكەەۆتىڭ ايتۋىنشا، بيىل جىل باسىنان بەرى كولىك پوليتسەيلەرى تەمىر جول توسەمىنىڭ بەلگىلەنبەگەن جەرىنەن وتكەن 9 569 ازاماتتى انىقتاپ، اكىمشىلىك جاۋاپقا تارتقان. سونىمەن قاتار، ادامداردىڭ بولۋىنا بايلانىستى پوەزداردى شۇعىل تەجەۋدىڭ 184 فاكتىسى تىركەلگەن. ونىڭ ىشىندە اعىمداعى كەزەڭدە تەمىر جول كولىگىنەن جاراقات الۋدىڭ 44 فاكتىسى تىركەلىپ، وكىنىشكە قاراي ونىڭ جارتىسىنان كوبى قايتىس بولعان.

«تەمىر جولدار – جەكە قاۋىپسىزدىك تالاپتارىن ساقتاعان ازاماتتار ءۇشىن قاۋىپتى ەمەس. ءاربىر ازامات قاۋىپسىزدىك تالاپتارىن تولىق ورىنداۋعا مىندەتتى. بۇل ءوز دەنساۋلىعى مەن ءومىرى ءۇشىن وتە ماڭىزدى»، – دەدى پوليتسيا پولكوۆنيگى.

سوڭعى جاڭالىقتار