26 مامىر, 15:20 434 0 جاڭالىقتار اسىل تۇمار

بيىل ەلوردادا 350 گا اۋماققا اعاش وتىرعىزىلادى

سۋرەت عالامتوردان الىندى
سۋرەت عالامتوردان الىندى

نۇر-سۇلتان قالاسى اكىمىنىڭ ورىنباسارى التىنبەك قايساعاليەۆ بيىل ەلوردا اۋماعىندا 350 گا اۋماققا اعاش وتىرعىزىلاتىنىن ايتتى.

«نۇر-سۇلتان قالاسى بويىنشا بۇگىنگە دەيىن 1 ميلليونعا جۋىق ءتۇپ اعاش وتىرعىزىلعان. جاپىراقتى جانە قىلقاندى اعاشتاردىڭ 2018 جىلى 19 مىڭ ءتۇبى، 2019 جىلى 114 مىڭ ءتۇبى ەگىلدى. بيىل بۇل جۇمىس جالعاسادى. قالادا قازىر ساياباقتاردىڭ سانى ءوسىپ كەلەدى. بيىل ارنايى 50 قوعامدىق ورىن سالىنۋدا. حالىق دەمالاتىن ونداي ورىنداردا دا اعاش تۇپتەرى كۇزدە جانە كوكتەمدە ەگىلەدى. جىلدان جىلعا بۇل جۇمىستى ارتتىرساق دەيمىز. ەڭ باستى ءبىزدى قۋانتاتىنى – ەلباسى نۇرسۇلتان نازارباەۆتىڭ باستاماسىمەن ەگىلگەن جاسىل بەلدەۋ – بۇگىنگى كۇنى ماقتانىشىمىزعا اينالىپ وتىر»، – دەدى التىنبەك قايساعاليەۆ «ASTANA TV» تەلەارناسىنداعى Elorda live-تا بەرگەن سۇحباتىندا.

ونىڭ ايتۋىنشا 1998 جىلدان باستاپ استانانى قورشاي ەگىلگەن قالىڭ ورمان قازىر قالانى ءبىر جاعىنان جەلدەن قورعاسا، ەكىنشىدەن اۋانى تازارتىپ تۇرادى.

«20 جىلدان بەرى وتىرعىزىلعان اعاش تۇپتەرى توعايعا اينالدى. ارتىنشا بۇل اۋماقتى تۋريستەر كەلىپ دەمالاتىن ورىنعا اينالدىرماقپىز. اعاش ەگىلگەن 15 مىڭ گەكتار اۋماق – نۇر-سۇلتان قالاسىنىڭ وكپەسى دەپ ايتۋعا بولادى. 98 پايىزى – جاپىراقتى اعاشتار. بيىل تاعى 350 گەكتارعا اعاش وتىرعىزىلادى»، – دەدى ول.

سوڭعى جاڭالىقتار