26 مامىر, 14:38 557 0 جاڭالىقتار اسىل تۇمار

الماتىداعى كوروناۆيرۋس تاراعان ورتالىق اۋرۋحاناعا قاتىستى تەكسەرىس ناتيجەسى شىقتى

قر دەنساۋلىق ساقتاۋ ءمينيسترى ەلجان ءبىرتانوۆ الماتىنىڭ ورتالىق قالالىق كلينيكالىق اۋرۋحاناسىندا كوروناۆيرۋستىڭ تارالۋىنا بايلانىستى جۇرگىزىلگەن كوميسسيا تەكسەرىسىنىڭ ناتيجەسىن جاريالادى. 

مينيستر Facebook-پاراقشاسىندا: «2020 جىلدىڭ 5-14 مامىرى ارالىعىندا 14 ادامنان، ونىڭ ىشىندە ۇلتتىق جانە حالىقارالىق دەڭگەيدەگى ەپيدەميولوگتاردان، سونداي-اق مەديتسينا قىزمەتكەرلەرى كاسىپوداعىنىڭ، الماتى قالاسى اكىمدىگى قوعامدىق كەڭەسىنىڭ، مەديتسينالىق قاۋىمداستىقتاردىڭ وكىلدەرىنەن جاساقتالعان كوميسسيا الماتىداعى ورتالىق قالالىق كلينيكالىق اۋرۋحانادا كوروناۆيرۋس ينفەكتسياسىنىڭ تارالۋى فاكتىسى بويىنشا تەكسەرۋ جۇرگىزدى. بۇگىن وسىناۋ ەپيدەميولوگيالىق تەكسەرۋگە قاتىستى قورىتىندىنى الدىم. ناتيجەسىندە مۇنداي بۇزۋشىلىقتاردى جويۋعا قاتىستى ۇسىنىس ازىرلەندى»، – دەپ جازدى.

ەلجان ءبىرتانوۆ ورىنباسارى ليۋدميلا بيۋرابەكوۆاعا الماتىعا بارىپ، كوميسسيا شەشىمىن جانە بۇزۋشىلىقتاردى جويۋ بويىنشا قابىلداناتىن شارالاردى تانىستىرۋ ءۇشىن ۇيىم باسشىلىعىمەن، مەديتسينا قىزمەتكەرلەرىمەن كەزدەسۋدى تاپسىرعانىن اتاپ ءوتتى.

«بىرلەسىپ باعالاۋ ءارى مۇنان ارى شەشىم قابىلداۋ ءۇشىن بۇل مالىمەتتەردىڭ پروكۋراتۋراعا بەرىلەتىندىگىن دە اتاپ وتكەن ماڭىزدى. بۇعان قوسا، جەرگىلىكتى دەنساۋلىق ساقتاۋ باسقارماسىنىڭ باسشىسىنا مەديتسينا قىزمەتكەرلەرىن نىسانعا سانيتارلىق تازالاۋ جۇمىستارى جۇرگىزىلگەن كەزەڭدە جانە كوپبەيىندى ستاتسيونار جۇمىسىن بۇرىنعى رەجيمدە جانداندىرعانعا دەيىن قالانىڭ باسقا مەديتسينالىق ۇيىمدارىنا جۇمىسقا ورنالاستىرۋ، سونىمەن قاتار قوسىمشا جالاقى تولەۋ جانە الەۋمەتتىك قولداۋ ماسەلەلەرىن شەشۋدى تاپسىردىم»، – دەدى ول.

ءمينيستردىڭ ايتۋىنشا، ورتالىق قالالىق كلينيكالىق اۋرۋحانانىڭ كوروناۆيرۋسپەن اۋىرعان قىزمەتكەرلەرىنە تولەم جاساۋ جۇمىسقا ۋاقىتشا جارامسىزدىق پاراعىن ۇسىنعاننان كەيىن جۇرگىزىلەتىن بولادى.

«11-23 ءساۋىر كۇندەرى ينفەكتسيالىق، پروۆيزورلىق جانە كارانتيندىك جاعدايدا جۇمىس اتقارعان ورتالىقتىڭ 350 قىزمەتكەرىنە ينفەكتسيالىق جانە پروۆيزورلىق ناۋقاستارمەن جۇمىس ىستەگەنى ءۇشىن جالاقىلارىنا جالپى سوماسى 59 ملن تەڭگە ۇستەمەاقى تولەندى»، – دەدى ەلجان ءبىرتانوۆ.

سوڭعى جاڭالىقتار