26 مامىر, 11:34 593 0 جاڭالىقتار اسىل تۇمار

بلوكبەكەتتە كولىك اپاتىن جاساعان ماس جۇرگىزۋشى بۇرىن پوليتسيا قىزمەتكەرى بولعان

سۋرەت - inform.kz
سۋرەت - inform.kz

الماتى وبلىسى اۋماعىنداعى بلوكپوستى قيراتىپ، ەكى پوليتسيا قىزمەتكەرىن مەرت قىلعان جۇرگىزۋشى بۇرىن ىشكى ىستەر ورگاندارىندا جۇمىس ىستەگەن.

BMW ماركالى اۆتوكولىكتىڭ جۇرگىزۋشىسى 1994 جىلى تۋعان ازامات، بۇرىن قۇقىق قورعاۋ ورگاندارىندا قىزمەت ەتكەن. الايدا ول ءوز مىندەتتىنە نەمقۇرايلىق تانىتقانى ءۇشىن جۇمىستان بوساتىلعان.

«وتكىزۋ پۋنكتىندە بولعان قايعىلى وقيعا بىردەن ىشكى ىستەر ورگاندارىندا قىزمەت ەتكەن ەكى پوليتسيا قىزمەتكەرىنىڭ ءومىرىن قيدى. ەڭ وكىنىشتىسى، جانتۇرشىگەرلىك اپاتتى جاساعان جۇرگىزۋشى بۇرىن پوليتسيادا ىستەگەن. ول پوليتسيادا التى جىل قىزمەت ەتتى، قىزمەتتىك مىندەتتەرىن تيىسىنشە ورىنداماعانى ءۇشىن ءتورت تارتىپتىك جازا الدى. بۇل ونىڭ ىشكى ىستەر ورگاندارىنان كەتۋىنە سەبەپ بولدى. بىراق ودان كەيىن دە ول ءوزى ءۇشىن دۇرىس قورىتىندى جاساي المادى. زاڭدى بۇزىپ، ول رۋلگە ماس كۇيىندە وتىرىپ، قىلمىس جاسادى»، – دەدى الماتى پوليتسيا دەپارتامەنتىنىڭ باستىعى قانات تايمەردەنوۆ.

قانات تايمەردەنوۆتىڭ ايتۋىنشا، ەكى نەمەسە ودان دا كوپ ادامدى ولتىرگەنى ءۇشىن ا. ەسىمدى ازاماتقا قاتىستى قر قك 99-بابىنىڭ 2-بولىگى بويىنشا سوتقا دەيىنگى تەرگەۋ باستالدى (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋعا جازالانادى). قازىر ول قاماۋدا.

ەسكە سالساق، قايعىلى وقيعا 25 مامىر كۇنى تاڭعا جۋىق №4 بلوكپوستا بولعان. BMW جۇرگىزۋشىسى ماس كۇيىندە بەتون قورشاۋعا سوعىلىپ بارىپ، ينەرتسيامەن پاترۋلدىك پوليتسيا كولىگىن سوققان. سونىڭ كەسىرىنەن ەكى پوليتسيا قىزمەتكەرى كوز جۇمدى. ءۇشىنشى پوليتسيا قىزمەتكەرى جانساقتاۋ بولىمىندە جاتىر.

سوڭعى جاڭالىقتار