23 مامىر 2020, 18:58 728 0 جاڭالىقتار اسىل تۇمار

قىزىلاعاش سۋ قويماسى بيىل پايدالانۋعا بەرىلەدى – مينيستر

سۋرەت دەرەككوزدەن الىندى
سۋرەت دەرەككوزدەن الىندى

ەكولوگيا، گەولوگيا جəنە تابيعي رەسۋرستار ءمينيسترى ماعزۇم مىرزاعاليەۆ الماتى وبلىسىنداعى بىرقاتار سۋ شارۋاشىلىعى نىساندارىن ارالادى.

مينيستر ءوزىنىڭ Twitter پاراقشاسىندا: «الماتى وبلىسىنىڭ سۋ شارۋاشىلىعى نىساندارىنىڭ جۇمىسىمەن تانىستىم. «جۇمىسپەن قامتۋدىڭ جول كارتاسىن» ىسكە اسىرۋ اياسىندا بۇل وڭىردە كوكسۋ توعانىن، قاراتال بوگەنىن، ۇسەك وزەنىندەگى سۋ شارۋاشىلىعىن قايتا سالۋ، تالدىقورعانعا جاقىن جەردەگى يرريگاتسيالىق جۇيەنى قايتا قالپىنا كەلتىرۋ بويىنشا 4 جوبا ىسكە اسىرىلادى»، – دەپ جازدى.

«بۇل جوبالار بويىنشا جۇمىس باستالىپ كەتتى. ولاردىڭ ىسكە اسىرىلۋى اپاتتىق جاعدايداعى نىسانداردى قالپىنا كەلتىرۋگە، ءوڭىردى سۋمەن قامتاماسىز ەتۋگە، سۋارمالى جەرلەردى كوبەيتۋگە جول اشىپ، نىساندى قالپىنا كەلتىرۋ مەن اۋىل شارۋاشىلىعىندا ەڭبەك ەتكەن حالىقتى جۇمىسپەن قامتۋعا مۇمكىندىك بەرەدى»، – دەپ اتاپ ءوتتى ول.

ۆەدومستۆا باسشىسى بۇدان بولەك قىزىلاعاش سۋ قويماسىن قالپىنا كەلتىرۋ جۇمىسىمەن تانىستى.

«اقسۋ اۋدانىنداعى قىزىلاعاش سۋ قويماسىن قالپىنا كەلتىرۋ بارىسىمەن تانىسىپ، جۇمىس ساپاسىنا كوز جەتكىزدىم. بۇل جوبا اۋداندى سۋمەن قامتاماسىز ەتۋدە، اۋىل شارۋاشىلىعىن دامىتۋدا ماڭىزدى. قالپىنا كەلتىرۋ جۇمىسىنىڭ 90% ورىندالدى. بيىل سۋ قويماسى پايدالانۋعا تاپسىرىلادى»، – دەيدى م.مىرزاعاليەۆ.

سوڭعى جاڭالىقتار