23 مامىر 2020, 15:44 799 0 جاڭالىقتار اسىل تۇمار

باتىس قازاقستاندا كارانتين 15 ماۋسىمعا دەيىن ۇزارتىلدى

سۋرەت عالامتوردان الىندى
سۋرەت عالامتوردان الىندى

بقو باس مەملەكەتتىك سانيتار دارىگەرىنىڭ قاۋلىسىنا سايكەس، كارانتين شەكتەۋ شارالارى 15 ماۋسىمعا دەيىن ۇزارتىلدى.

بقو تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ بريفينگتە ءمالىم ەتكەندەي، وڭىردە كوروناۆيرۋس جۇقتىرۋ دەڭگەيى ءالى دە تومەندەمەي وتىر. كۇن سايىن ەپيدەميولوگيالىق احۋالعا مونيتورينگ جۇرگىزىلۋدە. مىسالى، 22 مامىردا كوروناۆيرۋس جۇقتىرۋ ءوسىمى – 2,8 پايىز بولسا، ودان ءبىر كۇن بۇرىن – 2,5, اپتا ىشىندە 3,8-4 پايىزدى كورسەتكەن.

كۇنى بۇگىن وبلىستا 370 ناۋقاس تىركەلسە، سونىڭ 144-ءى وبلىستىق جۇقپالى اۋرۋلار اۋرۋحاناسىندا ەمدەلۋدە. 226 ادام جازىلىپ شىقتى. ناۋقاستاردىڭ 67 پايىزى (251 ادام رەسەي مەن اتىراۋدان) – سىرتتان كەلگەندەر. 114-ءى – بۇرىن اۋىرعاندارمەن قارىم-قاتىناستا بولعاندار. سونىمەن قاتار 24 ادام پروۆيزورلىق، 217 ادام كارانتيندىك ستاتسيوناردا جاتسا، 1208 ادام ۇيلەرىندە وقشاۋلانۋدا.

«ەگەر 15 ماۋسىمعا دەيىن جۇقتىرۋ دەڭگەيى 2 پايىزدان تومەندەسە، كارانتيندىك شەكتەۋ شارالارى جەڭىلدەتىلۋى مۇمكىن. ءبارى دە ادامداردىڭ سانيتارلىق تالاپتاردى بۇلجىتپاي ساقتاۋىنا بايلانىستى. ايتالىق، كەيبىرەۋلەر اۋرۋ بەلگىلەرى بايقالعانىن دارىگەرلەردەن جاسىرادى. تەك اۋرۋ دەندەگەن كەزدە عانا ايتادى. نەمەسە جەدەل جاردەم شاقىرۋدىڭ ورنىنا وزدەرى مەديتسينالىق مەكەمەگە بارىپ، تارالۋ قاۋپىن ۇلعايتا تۇسەدى»، – دەدى نۇرلىبەك مۇستاەۆ.

سوڭعى جاڭالىقتار